ខេត្តត្បូងឃ្មុំ ៖ អ្នកផ្ទុកវិជ្ជមានកូវីដ១៩ ត្រូវបានរកឃើញជាបន្តបន្ទាប់នៅតាមបណ្ដាស្រុកក្រុងក្នុងខេត្តត្បូងឃ្មុំ ។ ជាក់ស្ដែង នារសៀលថ្ងៃទី២១ មិថុនា ឆ្នាំ២០២១ នៅភូមិដារកណ្ដោល…
ខេត្តត្បូងឃ្មុំ ៖ អ្នកផ្ទុកវិជ្ជមានកូវីដ១៩ ត្រូវបានរកឃើញជាបន្តបន្ទាប់នៅតាមបណ្ដាស្រុកក្រុងក្នុងខេត្តត្បូងឃ្មុំ ។ ជាក់ស្ដែង នារសៀលថ្ងៃទី២១ មិថុនា ឆ្នាំ២០២១ នៅភូមិដារកណ្ដោល ឃុំដារ ស្រុកមេមត់ ត្រូវបានក្រុមគ្រូពេទ្យចុះស្រាវជ្រាវរកឃើញអ្នកផ្ទុកវិជ្ជមានកូវីដ ចំនួន៤នាក់ ជាសមាជិកក្រុមគ្រួសារតែមួយ ត្រូវបានបញ្ជូនមកព្យាបាលនៅមន្ទីរពេទ្យបង្អែកស្រុកមេមត់ទាំងអស់ ។
វេជ្ជបណ្ឌិតអ៊ិន ម៉ារឌី ប្រធានការិយាល័យប្រតិបត្តិស្រុកមេមត់ មានប្រសាសន៍ឲ្យដឹងថា ក្រុមគ្រូពេទ្យបានចុះទៅយកសំណាកបន្តពីប្រជាពលរដ្ឋរស់នៅភូមិលោ ឃុំកំពាន់ស្រុកមេមត់ នាព្រឹកថ្ងៃទី២១ មិថុនា មានចំនួន១៤នាក់ ដោយប្រើប្រាស់ឧបករណ៍តេស្តរហ័សលទ្ធផល គឺអវិជ្ជមានទាំងអស់ដែលភូមិនេះកន្លងមក ត្រូវបានរកឃើញអ្នកផ្ទុកវិជ្ជមានកូវីដ ។
លោកវេជ្ជបណ្ឌិតរូបនេះមានប្រសាសន៍បន្តថា មានបុរសម្នាក់រស់នៅភូមិដារកណ្ដោល ឃុំដារ គាត់ត្រូវបានសង្ស័យកើតជំងឺគ្រុនឈីក ហើយបានឱ្យពេទ្យឯកជននៅក្នុងភូមិព្យាបាលចំនួន៥ថ្ងៃ ។ រហូតមកដល់ថ្ងៃទី២១ មិថុនា ជំងឺមិនធូរស្រាលក៏បានបញ្ជូនតាមរថយន្តមកព្យាបាលនៅមន្ទីរពេទ្យបង្អែកស្រុកមេមត់ ក្នុងពេលនោះគ្រូពេទ្យសង្ស័យក៏បានធ្វើតេស្តដោយឧបករណ៍រហ័សឃើញវិជ្ជមានកូវីត១៩ រួមទាំងប្រពន្ធ និងកូន និងប្អូនថ្លៃចំនួន៣នាក់ ឃើញវិជ្ជមានកូវីដទាំងអស់គ្នាសរុបចំនួន៤នាក់ ដោយបានបញ្ជូនមកព្យាបាលនៅបន្ទប់ដាច់ដោយឡែក ក្នុងមន្ទីរពេទ្យបង្អែកស្រុកមេមត់ ។
ដោយមានការណែនាំពីសំណាក់លោកអភិបាលស្រុក និងលោកប្រធានមន្ទីរសុខាភិបាលខេត្តជំនាញបានចុះទៅយកសំណាកអ្នកពាក់ព័ន្ធជាង ១០នាក់បន្ថែមទៀត។
លោកជា ណារុន អភិបាលក្រុងសួង បានឲ្យដឹងថា កាលរសៀលថ្ងៃសៅរ៍ ទី១៩ ខែមិថុនា ឆ្នាំ២០២១ ក្រុមការងារស្រាវជ្រាវអ្នកប៉ះពាល់ករណីជំងឺកូវីដ-១៩ ក្រុងបានសហការជាមួយក្រុមគ្រូពេទ្យនៃការិយាល័យសុខាភិបាលស្រុកប្រតិបត្តិសួង ប៉ុស្តិ៍នគរបាលរដ្ឋបាលសង្កាត់សួងចុះពិនិត្យទីតាំងបាញ់ថ្នាំសម្លាប់មេរោគ និងចងខ្សែសុវត្ថិភាពព័ទ្ធតូបចំនួន៥០ដែលនៅជុំវិញតូបលក់ត្រីងៀតរបស់អ្នកវិជ្ជមានកូវីដ-១៩ ឈ្មោះ ឃាន គីមហួន(ស្លាប់) ដើម្បីផ្អាកការលក់ដូរប្លុកលក់ត្រីងៀតបណ្តោះអាសន្ន និងបានផ្សព្វផ្សាយដល់ម្ចាស់តូបដែលបានហ៊ុមព័ទ្ធទាំងអស់ និងអ្នកពាក់ព័ន្ធផ្សេងទៀត ចូលរួមសហការមកពិនិត្យសំណាកទាំងអស់គ្នា ទើបអាចកាត់ផ្តាច់ខ្សែចម្លងជំងឺកូវីដ-១៩បាន ។
ចំណែកលោកវេជ្ជបណ្ឌិតកែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំមានប្រសាសន៍ឲ្យដឹងដែរថា គិតរហូតមកដល់ល្ងាចថ្ងៃទី ២១មិថុនា ឆ្នាំ២០២១ អ្នកជំងឺកូវីដកំពុងសម្រាកព្យាបាលនៅមន្ទីរពេទ្យមានចំនួន១០១នាក់ ក្នុងនោះស្រី៥៦នាក់ និងក្មេង១៧ នាក់ និងស្លាប់ចំនួន៦នាក់(ក្នុងនោះ៣នាក់ស្លាប់ដោយកូវីដ និង៣នាក់ទៀតស្លាប់ដោយជម្ងឺផ្សេងៗ) ។
ជាមួយនោះជំនាញសុខាភិបាល ដោយទទួលបានការណែនាំពីសំណាក់ឯកឧត្តមអភិបាលខេត្ត គឺបន្តចុះស្រាវជ្រាវរកអ្នកជំងឺកូវីដនៅតាមបណ្ដាស្រុកក្រុងនៅក្នុងខេត្តត្បូងឃ្មុំបន្តទៀត ៕
ចែករំលែកព័តមាននេះ