សហរដ្ឋអាមេរិក ៖ កងម៉ារីនអាមេរិកបានដឹកនាំធ្វើការសាកល្បងជាលើកដំបូង ដើម្បីកំណត់ថា តើនាវាផ្ទុកយន្តហោះរបស់ខ្លួន ពិតជាអាចទប់ទល់បានដែរឬយ៉ាងណា? ក្នុងការតតាំងជាមួយសត្រូវពេលប្រយុទ្ធគ្នា។
កាសែត LEPOINT.FR បារាំងរាយការណ៍កាលពីថ្ងៃទី២២ ខែមិថុនា ឆ្នាំ២០២១ថា បណ្ដារូបភាពចេញផ្សាយកាលពីថ្ងៃទី១៨ ខែមិថុនា គេឃើញកងម៉ារីនអាមេរិកទម្លាក់គ្រឿងផ្ទុះ ដល់ជាង១៨តោន ទៅក្នុងទឹកនៃដែនសមុទ្ររដ្ឋផ្លរីដា នៅកន្លែងមួយឃ្លាតតែប៉ុន្មានម៉ែត្រប៉ុណ្ណោះ ពីនាវាផ្ទុកយន្តហោះ USS GERALD R. FORD ។ គោលបំណងគឺសាកល្បងភាពអាចធន់បានរបស់នាវាផ្ទុកយន្តហោះនេះ ដែលការកសាងចំណាយប្រាក់ដល់ជាង១០ពាន់លានអឹរ៉ូ។
ដូចការផ្សាយរបស់កាសែត HUFFPOST ការសាកល្បងលើកទី១នោះ គឺការផ្ទុះបង្កឲ្យមានការរញ្ជួយដីមួយ ក្នុងសមុទ្រ កម្លាំង៣,៩រីស្ទ័រត្រង់កន្លែងមួយ ចម្ងាយ១៦០គីឡូម៉ែត្រពីឆ្នេរសមុទ្រ ក្នុងមហាសមុទ្រអត្លង់ទិក។ តាមសេចក្ដីប្រកាសមួយរបស់កងម៉ារីនអាមេរិកថា វិធានការមួយត្រូវបានចាត់ ដើម្បីធានាសន្តិសុខដល់កងយោធានិងបណ្ដាជនស៊ីវិល ដែលចូលរួមក្នុងប្រតិបត្តិការទ្រង់ទ្រាយធំនោះ។
ការប៉ះពាល់ដល់បរិស្ថានក៏ត្រូវបានគិតគូរដែរ ក្នុងតំបន់សាកល្បងនោះ។ គំំនិតនាំឲ្យមានការសាកល្បងបែបនេះ គឹដើម្បីត្រួតពិនិត្យមើលភាពធន់របស់វា ដែលអាចប្រឈមមុខនឹងបណ្ដាលក្ខខណ្ឌលំបាកៗ ក្នុងពេលប្រយុទ្ធគ្នាក្នុងសមុទ្រ។ សម្រាប់ពេលនេះ នាវាផ្ទុកយន្តហោះនោះ ត្រូវឆ្លងកាត់ដំណាក់កាលទំនើបកម្មរយៈពេល៦ខែ និងជួសជុលមុនដាក់ឲ្យប្រើប្រាស់។
នាវាផ្ទុកយន្តហោះនោះមានប្រវែង៣៣៣ម៉ែត្រ ទទឹង៤០ម៉ែត្រនិងចំណុះជិត១០០.០០០តោន។ នាវាផ្ទុកយន្តហោះUSS GERALD R. FORD ជានាវាផ្ទុកយន្តហោះធំមួយ ក្នុងចំណោមនាវាផ្ទុកយន្តហោះធំៗលើពិភពលោក។ កសាងចាប់តាំងពីឆ្នាំ២០០៥មក នាវានេះអាចដាក់ក្នុងសមុទ្រកាលពីឆ្នាំ២០១៧ គឹ៣ឆ្នាំក្រោយកាលបរិច្ឆេទកំណត់ពីដំបូង។ មូលហេតុដោយសារបញ្ហាប្រព័ន្ធអគ្គិសនី ព្រមទាំងបញ្ហាឯទៀតៗ៕ ដកស្រង់ចេញពីវេបសាយ ៖ sputniknews
ចែករំលែកព័តមាននេះ