រាជធានីភ្នំពេញ ៖ ពិធីអបអរសាទរជ័យលាភី ពានរង្វាន់សន្តិភាពអន្តរជាតិ The Gusi Peace Prize របស់លោក ហ៊ុន ម៉ានី បានធ្វើឡើងយ៉ាងអធិកអធមនៅពហុកីឡដ្ឋានអូឡាំ ពិកនៅរសៀលថ្ងៃទី២៦ វិច្ឆិកា ដោយមានការចូលរួមពីលោកជំទាវឧបនាយករដ្ឋមន្ត្រី ម៉ែន សំអន និងសមាជិក សមាជិកាសហភាពសហព័ន្ធយុវជនកម្ពុជាចូលរួមយ៉ាងច្រើនកុះករ ។
លោក ហ៊ុន ម៉ានី សមាជិករដ្ឋសភា និងជាប្រធានសហភាពសហព័ន្ធយុវជនកម្ពុជា ទទួលបានពានរង្វាន់សន្តិភាពអន្តរជាតិ The Gusi Peace Prize កាលពីថ្ងៃទី២៥ វិច្ឆិកា នៅទីក្រុងម៉ានីល ប្រទេសហ្វ៊ីលីពីន និងបាននាំមកដល់ប្រទេសកម្ពុជា កាលពីរសៀលថ្ងៃទី២៦ វិច្ឆិកា ឆ្នាំ២០១៥ ។ សន្និសីទសារព័ត៌មាន ប្រព្រឹត្តទៅនៅទីតាំងព្រលានយន្តហោះអន្តរជាតិភ្នំពេញ និងពហុកីឡដ្ឋានអូឡាំពិក នាល្ងាចថ្ងៃទី២៦ វិច្ឆិកា ក្រោមអធិបតីភាព លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ។
លោកជំទាវឧបនាយករដ្ឋមន្ត្រីម៉ែន សំអន មានប្រសាសន៍ថា ក្នុងនាមរាជរដ្ឋាភិបាលកម្ពុជា និងរដ្ឋសភាជាតិ សូមអបអរសាទរដែលយើងបានទទួលពានរង្វាន់សន្តិភាព នៅក្នុងប្រទេសហ្វ៊ីលីពីន ។ ពានរង្វាន់នេះបាននាំមកតាមរយៈលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាសមាជិកសភាមណ្ឌលខេត្តកំពង់ស្ពឺ ។
លោកជំទាវបានលើកឡើងថា អ្វីដែលយើងទទួលបាននាពេលនេះបន្ទាប់ពីការខិតខំរបស់យើងទាំងអស់គ្នាកន្លងមក ។ យើងបានជួបឧបសគ្គជាច្រើន និងបានខិតខំតស៊ូជម្នះរហូតបានទទួលជោគជ័យ ។ ការតស៊ូទាំងនោះយើងបានរួមគ្នាជាមួយរាជរដ្ឋាភិបាល កងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋយើង ។
លោកជំទាវបានបញ្ជាក់ថា សុខសន្តិភាពរបស់កម្ពុជា ដែលបានមកនៅពេលនេះ បានធ្វើឲ្យពិភពលោកគេទទួលស្គាល់ថា កម្ពុជាយើងមានសុខសន្តិភាពពិតប្រាកដ ទើបគេសម្រេចផ្តល់នូវពានរង្វាន់ដល់យើងនៅពេលនេះ ។ យើងទាំងអស់គ្នាសូមចូលរួមអបអរសាទរចំពោះជ័យលាភីនេះ ។
ក្នុងឱកាសនោះដែរ លោក ហ៊ុន ម៉ានី បានថ្លែងថា ជ័យលាភីនេះបានមកពីការរួបរួមគ្នារបស់ខ្មែរ ដែលពេលនេះដល់ពេលដែលយើងត្រូវរួមគ្នាដើម្បីប្រទេសជាតិរបស់យើងទាំងអស់គ្នាក្នុងនាមជាពលរដ្ឋខ្មែរ ។ លោកបានលើកឡើងថា៖ «ថ្ងៃនេះយើងបានច្បាស់លាស់ហើយសម្រាប់ការទទួលនូវជ័យលាភីនេះជាភាពអស្ចារ្យមួយ» ។ ការទទួលបាននូវពានរង្វាន់សន្តិភាពThe Gusi Peace Prize នេះបង្ហាញពីភាពរួមគ្នាមួយក្នុងការធ្វើមនុស្សធម៌ និងសមចិត្តព្រមគ្នា ។
លោកបានលើកឡើងថា ការទទួលបានពាន់រង្វាន់សន្តិភាពពិភពលោកនេះ មិនមែនបានមកដោយសាររូបលោកតែម្នាក់ឯងទេ គឺវាពិតណាស់បានមកពីការចូលរួមពីប្រជាពលរដ្ឋយើងទាំងអស និងជាមោទនភាពជាតិទាំងមូល ។ ពេលនេះដល់ពេលដែលកម្ពុជាយើងរួមគ្នាបង្ហាញនូវសក្តានុពលរបស់ប្រទេសយើង ។ ប្រទេសយើងទទួលស្គាល់ថា មានសក្តានុពលច្រើន ប្រទេសយើងមានភាពកក់ក្តៅច្រើនពីប្រជាពលរដ្ឋ ក្តីសង្ឃឹម និងស្នាមញញឹមបានបង្ហាញឡើងដោយប្រជាពលរដ្ឋយើង ។
លោក ហ៊ុន ម៉ានី សមាជិកសភា និងជាប្រធានសហភាពសហព័ន្ធយុវជនកម្ពុជា ទទួលបានពានរង្វាន់សន្តិភាពអន្តរជាតិ The Gusi Peace Prize កាលពីថ្ងៃទី២៥ វិច្ឆិកា ឆ្នាំ២០១៥ នៅទីក្រុងម៉ានីល ប្រទេសហ្វីលីពីន និងបាននាំមកដល់ប្រទេសកម្ពុជាកាលពីរសៀលថ្ងៃទី២៦ វិច្ឆិកា នេះ ។ សន្និសីទសារព័ត៌មាន ប្រព្រឹត្តទៅនៅទីតាំងព្រលានយន្តហោះអន្តរជាតិភ្នំពេញ និងនៅពហុកីឡដ្ឋានជាតិអូឡាំពិកនាល្ងាចថ្ងៃទី២៦ វិច្ឆិកា ឆ្នាំ២០១៥ ក្រោមអធិបតីភាព លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ។
លោក ហ៊ុន ម៉ានី បានថ្លែងថា ក្នុងកម្មវិធីប្រគល់ពានរង្វាន់សន្តិភាពអន្តរជាតិ The Gusi Peace Prize ប្រចាំឆ្នាំលើកទី១៤ Plenary Hall, PICC, នាទីក្រុង Pasay បានប្រព្រឹត្តទៅនៅថ្ងៃទី២៥ វិច្ឆិកា លោកបានថ្លែងសុន្ទរកថាមុនគេក្នុងចំណោមជ័យលាភីផ្សេងទៀត ។ លោកថ្លែងថា ជាបឋមខ្ញុំសូមថ្លែងអំណរគុណ និងសូមឧទ្ទិសភាពជោគជ័យនេះជូនដល់គ្រួសារខ្ញុំ ដែលតែងផ្តល់ការគាំទ្រ ការជឿជាក់ និងទំនុកចិត្តជានិច្ចកាល ហើយកត្តាទាំងនេះបានបន្តជំរុញឲ្យខ្ញុំតាំងចិត្តខ្ពស់ ជាមួយនឹងសេចក្តីស្រឡាញ់ដ៏ជ្រាលជ្រៅចំពោះការងារស្ម័គ្រចិត្ត។
លោក ហ៊ុន ម៉ានី បានលើកឡើងថា ជាពិសេសខ្ញុំសូមថ្លែងនូវគុណូបការៈដ៏ជ្រាលជ្រៅ ជូនចំពោះលោកឪពុករបស់ខ្ញុំ ដែលតែងជំរុញទឹកចិត្តខ្ញុំឱ្យស្គាល់ពីភារកិច្ច ភាពសាមញ្ញ រាក់ទាក់ និងការទទួលខុសត្រូវចំពោះប្រជាពលរដ្ឋ សង្គម និងប្រទេសជាតិរបស់យើង ។
សមិទ្ធផលជោគជ័យ និងការទទួលស្គាល់ ដែលយើងសម្រេចបាននៅពេលនេះ នឹងមិនអាចកើតមានឡើងបានឡើយ ប្រសិនបើគ្មានការព្យាយាម ភាពអង់អាច ថាមពល គំនិតច្នៃប្រឌិតបង្កើតថ្មី និងការតាំងចិត្តរបស់យុវជនស្ម័គ្រចិត្តរបស់យើងរាប់ម៉ឺននាក់ ក្នុងសកម្មភាពមិនគិតពីផលប្រយោជន៍ខ្លួនដើម្បីសង្គមជាតិ។
លោក ហ៊ុន ម៉ានី ថ្លែងបន្តថា យុវជនយើងឲ្យទទួលព័ត៌មានគ្រប់គ្រាន់ចេះត្រិះរិះពិចារណាគ្រប់ជ្រុងជ្រោយ និងមានទំនួលខុសត្រូវខ្ពស់ ។ លើកកម្ពស់ការយល់ដឹងពីហានិភ័យនៃជំងឺមហារីកមាត់ស្បូន យុទ្ធនាការលុបបំបាត់អំពើហិង្សាលើស្ត្រី និងកុមារី តាមរយៈយុទ្ធនាការពណ៌ទឹកក្រូចនៅថ្ងៃទី២៥ វិច្ឆិកា ជារៀងរាល់ខែ ។ ជំរុញ ឯកភាព និងសាមគ្គីភាពក្នុងវប្បធម៌ចម្រុះ ដែលបង្កើនការយោគយល់ពីគ្នាទៅវិញទៅមករវាងវប្បធម៌ និងជំនឿផ្សេងៗ ព្រមទាំងកាត់បន្ថយជាអប្បបរមានូវការមិនយល់ពីគ្នា ក៏ដូចជាការថែរក្សាបេតិកភណ្ឌវប្បធម៌ ។ ក្នុងន័យនេះ ជ័យលាភីដ៏ឧត្តុង្គឧត្តមនេះស័ក្តិសមបានទៅពួកគេទាំងអស់គ្នាផងដែរ ។ ក្នុងឱកាសដ៏ថ្លៃថ្លានេះ ខ្ញុំសូមផ្តាំផ្ញើដល់យុវជនកម្ពុជាយើងទាំងអស់គ្នាថា ប្រសិនបើខ្ញុំអាចធ្វើបាន អ្នកទាំងអស់គ្នាក៏អាចធ្វើបានដូចខ្ញុំដែរ ។
លោក ហ៊ុន ម៉ានី លើកឡើងថា ជាយុវជនកម្ពុជាមួយរូប ជាមួយនឹងកិត្តិយស ទទួលបានពានរង្វាន់សន្តិភាពពិភពលោក The Gusi Peace Prize ដ៏អស្ចារ្យនៅពេលនេះ ខ្ញុំមិនអាចបំភ្លេចនូវវីរភាព ដែលបង្ហាញឲ្យឃើញតាមរយៈការលះបង់គ្រប់បែបយ៉ាង ការតស៊ូជម្នះ ការប្តេជ្ញាចិត្ត និងសមិទ្ធផលនានា សម្រេចបានដោយយុវជនជំនាន់មុន ក៏ដូចជាថ្នាក់ដឹកនាំជំនាន់នេះ ដែលបានផ្តល់ឱកាសឲ្យយើងទាំងអស់គ្នាទទួលបានសង្គមកម្ពុជាមួយប្រកបដោយសន្តិភាព និងជាជាតិមួយប្រកបដោយភាពទាក់ទាញ ស្រស់ស្រាយ រីកចម្រើន ដូចដែលយើងបានឃើញនាពេលបច្ចុប្បន្ន ៕
ចែករំលែកព័តមាននេះ