រកឃើញពើងថ្ម ល្អាងគំនូរ បុរាណ នៅភ្នំក្រវាញកណ្តាល ខេត្តពោធិ៍សាត់
ខេត្តពោធិ៍សាត់ ៖ នៅថ្ងៃទី១៥ ដល់១៨ មិថុនា ២០២១ នាយកដ្ឋានព័ត៌មាន និងផ្សព្វផ្សាយបរិស្ថាន សហការគ្នាជាមួយនាយកដ្ឋានតំបន់បេតិកភណ្ឌ នៃក្រសួងបរិស្ថាន…
ខេត្តពោធិ៍សាត់ ៖ នៅថ្ងៃទី១៥ ដល់១៨ មិថុនា ២០២១ នាយកដ្ឋានព័ត៌មាន និងផ្សព្វផ្សាយបរិស្ថាន សហការគ្នាជាមួយនាយកដ្ឋានតំបន់បេតិកភណ្ឌ នៃក្រសួងបរិស្ថាន បានចុះសិក្សាស្រាវជ្រាវ និងផលិតបទយកការណ៍ស្តីពីពើងថ្ម «ល្អាងគំនូរ» បុរាណ នៅឧទ្យាជាតិភ្នំក្រវាញកណ្តាល ខេត្តពោធិ៍សាត់ ។
តាមការបញ្ជាក់របស់លោក លឹម វណ្ណច័ន្ទ ប្រធានការិយាល័យ នៃនាយកដ្ឋានតំបន់បេតិកភណ្ឌ និងជាអ្នកជំនាញបុរាណវិទ្យា បានឲ្យដឹងថា គំនូរក្នុងល្អាងនេះ ជាគំនូរដែលមានវ័យចំណាស់ ប៉ុន្តែយើងក៏មិនហ៊ានសន្និដ្ឋានថា អាយុកាលប៉ុន្មាននោះទេ ពីព្រោះការឲ្យអាយុទៅលើស្នាដៃសិល្បៈមួយ យើងត្រូវតែមានការសិក្សា ដែលមានការចូលរួមពីអ្នកបច្ចេកទេស និងការសិក្សាស្រាវជ្រាវបែបវិទ្យាសាស្ត្រ ។
លោកគិតថា ថ្ងៃណាមួយ អាចមានអ្នកដែលចាប់អារម្មណ៍ផ្នែកគំនូរនៅរូងភ្នំ ពួកគេអាចនឹងមកសិក្សាស្រាវជ្រាវនៅទីនេះ ដើម្បីឲ្យវាមានកាលបរិច្ឆេទត្រឹមត្រូវ ។
លោកបន្តទៀតថា គំនូរនៅក្នុងល្អាងនេះ គឺគេគូរប្រើប្រាស់ថ្នាំប្រភេទពណ៌ក្រហម និងមានស្នាមឆ្កូតខ្លះ ដើម្បីឲ្យចេញជារូបរាង ។ អ្វីដែលសំខាន់ គឺយើងឃើញរូបពាក់ព័ន្ធនឹងសត្វព្រៃ ដូចជា ដំរី ក្តាន់ ប្រើស ជ្រូកព្រៃ ជាដើម ។ ការគូរ មិនមានលក្ខណៈល្អ ឬច្បាស់អ្វីទេ ប៉ុន្តែវាគឺជាចំណុចពិសេសមួយ នៃតំបន់ភ្នំក្រវាញកណ្តាលនេះ ដែលបង្ហាញពីជីវិតប្រជាជន ដែលគាត់ចេះប្រើប្រាស់ដំរី ជាមួយនឹងការរស់នៅជាមួយសត្វព្រៃ ដែលមាននៅក្នុងតំបន់ដែលពួកគាត់រស់នៅ ។
លោក លឹម វណ្ណច័ន្ទ សង្ឃឹមថា ល្អាងគំនូរនេះ នឹងអាចជួយជំរុញឲ្យអ្នកសិក្សាស្រាវជ្រាវពីបុរេប្រវត្តិ និងការធ្វើកំណាយ ឲ្យបានច្បាស់ពីអាយុកាល ហើយល្អាងគំនួរនេះ អាចទាក់ទាញភ្ញៀវទេសចរណ៍ ដែលចូលចិត្តលម្ហែរតាមតំបន់ការពារធម្មជាតិ ហើយនឹងស្វែងរកនូវកន្លែងប្លែកៗ មកកម្សាន្តតាមបែបធ្វើដំណើរផ្សងព្រេងផងដែរ ៕
ចែករំលែកព័តមាននេះ