រាជធានីភ្នំពេញ ៖ ប៉ុន្មានថ្ងៃចុងក្រោយនេះ នៅតាមបណ្តាញសង្គមហ្វេសប៊ុក មានការជជែកវែកញ៉ែកខ្វែងគំនិតគ្នាពាក់ព័ន្ធការសម្តែងសិល្បៈបុរាណខ្មែរ ពោលគឺរបាំល្ខោនខោល ដែលអាចសម្តែងនៅក្នុងពិធីបុណ្យស.ពបាន ខណៈពេលដែលរឿងរ៉ាវនេះ ត្រូវបានក្លាយជាប្រធានបទមួយដែលអ្នកសិល្បៈបុរាណសុទ្ធតែបានបកស្រាយយកត្រូវរៀងៗខ្លួន។
ការផ្ទុះហើយមានការជជែកវែកញ៉ែកពាក់ព័ន្ធរឿងរ៉ាវខាងលើនេះ បានកើតឡើង បន្ទាប់លោក ហង់ ភូមិរ៉ា ដែលជាគ្រូបង្ហាត់ និងជាប្រធានក្រុមសិល្បៈយុវជនល្ខោនខោលជំនាន់ថ្មី បានឡើងនៅក្នុងកម្មវិធីរបស់ស្ថានីយទូរទស្សន៍នៅក្នុងស្រុកមួយ ដែលលោកបញ្ជាក់ថា ល្ខោនខោល ក៏អាចសម្តែងនៅក្នុងពិធីបុណ្យស.ពផងដែរ។
ត្រង់ចំណុចនេះ លោកបញ្ជាក់ថា របាំបុរាណល្ខោនខោល ក៏អាចសម្តែងនៅក្នុងពិធីបុណ្យស.ពបានដូចគ្នា ប៉ុន្តែនៅប្រទេសខ្មែរយើងនៅមិនទាន់មានឃើញនៅឡើយទេ ព្រោះអាចមិនទាន់មានការយល់ដឹងឲ្យបានទូលំទូលាយ។
ការនិយាយខាងលើនេះ ត្រូវបានក្រុមអ្នកសិល្បៈ និងគ្រូផ្នែកសិល្បៈបុរាណមួយចំនួនតូចបានសម្តែងការមិនយល់ស្រប និងបានបកស្រាយផ្សេងពីនេះ ព្រមទាំងបានបញ្ចេញនូវមតិរិះគន់មួយចំនួនទៅលើអ្វីដែលលោក ហង់ ភូមិរ៉ា បានបកស្រាយនាពេលនេះ។
ផេកហ្វេសប៊ុកដែលមានឈ្មោះថា របាំក្បាច់បុរាណខ្មែរ ឬរបាំព្រះរាជទ្រព្យ បានបង្ហោះសារតាមគណនេយ្យហ្វេសប៊ុករបស់ខ្លួនថា សូមបញ្ជាក់យ៉ាងច្បាស់ៗថា សិល្បៈសក្ការៈ (មានល្ខោនព្រះរាជទ្រព្យ ល្ខោនខោល និងល្ខោនស្បែកធំ) មិនអាចយកទៅលេងក្នុងពិធីបុណ្យស.ពបានទេ។ តែបើមានកាលសម័យពីបុព្វកាលក៏ជាហ្លួនដែរ ដែលបានលេងជាមហោស្រពសម្ពោធសម្រាប់ជាការអរគុណដល់ប្រជារាស្ត្រដែលខិតខំអញ្ជើញមកធ្វើបុណ្យថ្វាយឲព្រះស.ពហ្លួងតែប៉ុណ្ណោះ។
មិនដូចជាការលើកឡើងរបស់គ្រូល្ខោនខោលម្នាក់ បានលើកឡើងថា «ល្ខោនខោល អាចរាំក្នុងពិធីបុណ្យស.ព ហើយបញ្ជូនស.ពឱ្យទៅស្ថានសួគ៌បាន» នោះមិនពិតទេ សូមកុំយល់ច្រឡំដែលជាហេតុធ្វើឱ្យសិល្បៈសក្ការៈបាត់បង់រសតម្លៃរបស់ខ្លួន។ សូមកុំយល់ច្រឡំ ឬធ្វើឱ្យមានវប្បធម៌វិប្បលាបនេះជាដាច់ខាត។ សូមធ្វើការពិចារណាដោយការគួរ។
ចំណែកអ្នកគ្រូផ្នែកសិល្បៈ អ្នកស្រី យ៊ុគ វណ្ឌី ក៏បានបង្ហោះសារតាមគណនេយ្យហ្វេសប៊ុកដែរថា ត្រឹមត្រូវណាស់ អរគុណ ដែលមានកូនខ្មែរមួយចំនួននៅគោរពស្រឡាញ់ ថែរក្សាប្រពៃណីទំនៀមទំលាប់ជាតិ និងសិល្ប:វប្បធម៌ជាតិ។ អ្នកស្រីបញ្ជាក់ថា អ្នកដែលមានបំណងយករបាំសក្ការ: ទៅលេងក្នុងពិធីបុណ្យស.ព និងមានបាបពីរជាន់ មួយបាបក្នុងកាប្រមាថដ៏របាំទេវ:ពីរធ្វើអោយព្រលឹងស.ពវិលវល់រងទុក្ខវេទនាមិនបានទៅចាប់ជាតិក្លាយជាព្រាយអសុរកាយ។
បើតាមអ្នកស្រី យ៊ុគ វណ្ឌី ថា មិនគួរចង់បង្កើតសក្ករាជថ្មី ក្បត់ទស្សនៈគតិបណ្ឌឹតរបស់បុព្វបុរស ក្បត់ប្រវត្តិសាស្ត្រ ក្បត់ប្រវត្តិរបាំ ដូច្នេះសោះ ។ អ្នកជំនាញគំនិតមិនល្អមួយចំនួនកំពុងធ្វើខុសដោយមិនដឹងខ្លួនហើយ ចាញ់យុវជនជំនាន់ជាអ្នកវិជ្ជាសាស្ត្រ គេចេះយល់ដឹងជាងអ្នកជំនាញសិល្ប:ទៅវិញ គួរអាម៉ាស់ណាស់ ក្នុងលោកនេះបាបមានពិត កុំលលេង។
ដោយឡែកពាក់ព័ន្ធនឹងការបកស្រាយខាងលើនេះ លោក ហង់ ភូមិរ៉ា បានលើកឡើងថា ការរិះគន់នេះមួយចំនួន គឺចេញពីបុគ្គលដែលមិនបានហាត់រៀនផ្នែកសិល្បៈអោយបានច្បាស់នោះឡើយ ខណៈពេលដែលលោកចាត់ទុកការរិះគន់នោះ គឺជាការដុតឲ្យឆេះតែប៉ុណ្ណោះ។ លោកបញ្ជាក់ថា ប្រសិនបើការនិយាយនៅក្នុងកម្មវិធីទូរទស្សន៍នោះ មានការខុសឆ្គងនោះ ប្រហែលជាគ្រូជើងចាស់ដែលបង្ហាត់បង្រៀនលោកប្រាកដជាបន្ទោស និងស្តីអោយរូបលោកជាមិនខាន តែនេះលោកនិយាយទៅតាមឯកសារ និងការបង្ហាត់បង្រៀងពីគ្រូចាស់នៅសាលាវិចិត្រសិល្បៈ។
លោកថា តាមឯកសារនៅជំនាន់ហ្លួងព្រះស៊ីវត្ថិ គឺមានការតែងខ្លួនស្លៀកបែបរបាំល្ខោនព្រះរាជទ្រព្យជិះលើដំរីនៅក្នុងព្រះរាជពិធីបុណ្យស.ព ហើយនៅក្នុងនោះក៏ឃើញមានការពាក់មុខឃ្មុខជាតួអង្គស្វា ខណៈពេលដែលរូបភាពនោះក៏មានចងក្រងទុកជាឯកសារផងដែរ។
លោក ហង់ ភូមិរ៉ា បានបន្ថែមថា សាស្ត្រាចារ្យ ព្រាប ចាន់ម៉ារ៉ា ដែលជាអ្នកសិល្បៈផ្នែកបុរាណវិទ្យា ហើយរូបលោកនៅអែបគាត់ និងបានហាត់រៀនពីគាត់យ៉ាងច្បាស់លាស់ពីសិល្បៈបុរាណ ចំណែកអ្នកដែលរិះគន់លោកនោះ ខ្លះគ្រាន់តែដឹងតាមគេនិយាយប៉ុណ្ណោះ។ ទោះជាយ៉ាងណាលោកថា អ្វីដែលគេបានរិះគន់លោកពាក់ព័ន្ធបញ្ហាខាងលើនេះ គឺកើតចេញពីការខ្វែងគំនិតគ្នា និងមានបំណងបញ្ឆេះរូបលោកឲ្យមានការប្រឆាំងទាស់ទៅលើអ្វីដែលខ្លួនមិនពេញចិត្តនូវអ្វីដែលស្ថាប័ន ក្រសួង ឬភាគីពាក់ព័ន្ធមួយចំនួនបានសរសេរបង្ហោះតាមបណ្តាញសង្គមហ្វេសប៊ុកតែប៉ុណ្ណោះ៕
ចែករំលែកព័តមាននេះ