ខេត្តក្រចេះ ៖ ជនម្នាក់បានក្លាយខ្លួនជាឃាតក ហើយត្រូវប៉ូលិសចាប់ខ្លួន បន្ទាប់ពីបានវាយសម្លាប់ប្អូនថ្លៃស្រីក្នុងបំណងបំបិទមាត់ពីការលួចមានស្នេហាយ៉ាងអាស្រូវកេរិ៍្តជាមួយប្អូនថ្លៃ ខណៈពេលប្រពន្ធរបស់ខ្លួនមានផ្ទៃពោះ ។ ហេតុការណ៍នេះកើតឡើងកាលពីវេលាម៉ោង៣ទៀបភ្លឺថ្ងៃទី២៩ មីនា នៅចំណុចច្រាំងទន្លេ ក្រោយផ្ទះរបស់នារីរងគ្រោះឈ្មោះទំ ស្រីម៉ៅ អាយុ១៨ឆ្នាំ ស្ថិតក្នុងភូមិសំបូរ ឃុំសំបូរ ស្រុកសំបូរ ។
មន្ត្រីប៉ូលិសផ្នែកព្រហ្មទណ្ឌកំរិតធ្ងន់ខេត្តបានឱ្យដឹងថា ជនសង្ស័យក្នុងករណីនេះឈ្មោះលឹម រ៉ងជាតិ ហៅរ៉ង អាយុ២៣ឆ្នាំ មានទីលំនៅជាមួយនារីរងគ្រោះជាប្អូនថ្លៃ មានប្រពន្ធឈ្មោះទំ ស្រីស្តើង អាយុ២១ឆ្នាំ ជាបងស្រីបង្កើតរបស់នារីរងគ្រោះ ។ លោកវរសេនីយ៍ត្រីចាន់ សុខគីម នាយការិយាល័យប្រឆាំងបទល្មើសព្រហ្មទណ្ឌកំរិតធ្ងន់បានឱ្យដឹងថា កាលពីវេលាម៉ោង៥ល្ងាចថ្ងៃទី២៨ មីនា កន្លងមក ខណៈពេលឪពុកម្តាយមិននៅផ្ទះ ជននេះបាននិយាយលួងលោមណាត់ប្អូនថ្លៃស្រីសុំរួមរ័ក លុះដល់វេលាទៀបភ្លឺក៏លួចចុះពីលើផ្ទះ ខណៈនាងជាប្រពន្ធដេកលក់ហើយមកបន្ទប់ដេករបស់ប្អូនថ្លៃស្រីនៅក្រោមផ្ទះ និងបាននែបនិត្យរួមរ័កគ្នារហូតបានសម្រេច។
លោកនាយការិយាល័យបន្តទៀតថា ក្រោយពេលរួមរ័កគ្នារួចហើយ នារីរងគ្រោះបានប្រាប់ឱ្យបុរសជាបងថ្លៃជាអ្នកទទួលខុសត្រូវលើរូបនាង បើមិនដូច្នេះទេ នាងនឹងយករឿងនេះទៅប្រាប់ឪពុកម្តាយ និងបងស្រី។ ដោយសារតែភ័យខ្លាចបែករឿង ជនល្មើសក៏បែកគំនិតវាយសម្លាប់បំបិទមាត់បានឱ្យនាងជាប្អូនថ្លៃចេញទៅក្រៅផ្ទះជិតស្នួហាលខោអាវ ដើម្បីនិយាយគ្នា។ បន្ទាប់មកនារីរងគ្រោះក៏ទៅតាមការកំណត់ ទើបជនល្មើសជាបងថ្លៃយកឈើជ្រុងប្រវែងជាងកន្លះម៉ែត្រ មកវាយចំក្បាលនាងពីក្រោយបណ្តាលឱ្យធ្លាក់ចូលច្រាំងទន្លេ ហើយត្រូវក្រុមគ្រួសារប្រទះឃើញនាំយកមកសង្គ្រោះនៅ មន្ទីរពេទ្យខេត្ត តែដោយមិនអាចសង្គ្រោះនាងបាននាង ក៏ស្លាប់ ។
តាមចម្លើយសារភាពរបស់ជនដៃដល់ប្រាប់សមត្ថកិច្ចថា ខ្លួននិងនារីរងគ្រោះជាប្អូនថ្លៃធ្លាប់មានទំនាក់ទំនងស្នេហាជាមួយគ្នារយៈពេលជាងមួយខែហើយ ប៉ុន្តែទើបបានរួមរ័កគ្នាជាលើកទីមួយ ។ លោកនាយការិយាល័យបានឱ្យដឹងទៀតថា ក្រោយពីចុះទៅធ្វើការស៊ើបអង្កេតនៅកន្លែងកើតហេតុ ក៏បានស្រាវជ្រាវតាមមុខសញ្ញា និងធ្វើការឃាត់ខ្លួនជនសង្ស័យជាបងថ្លៃរូបនេះ ៕
ចែករំលែកព័តមាននេះ