គ្រោះថ្នាក់ចរាចរណ៍ដ៏អាក្រក់មួយបង្កឡើងដោយសារអ្នកបើកបររថយន្តម៉ាករ៉េវហ្វ័របើកលឿនដូចហោះបុកម៉ូតូ NOVO ពីក្រោយពេញទំហឹងលាន់ដូចរន្ទះខែប្រាំង បង្កឲ្យម៉ូតូប៉ើងទៅមុខចម្ងាយប្រមាណ១០ម៉ែត្រផ្ទុះឆេះយ៉ាងសន្ធោសន្ធៅ
ខេត្តស្វាយរៀង ៖ គ្រោះថ្នាក់ចរាចរណ៍ដ៏អាក្រក់មួយបង្កឡើងដោយសារអ្នកបើកបររថយន្តម៉ាករ៉េវហ្វ័របើកលឿនដូចហោះបុកម៉ូតូ NOVO ពីក្រោយពេញទំហឹងលាន់ដូចរន្ទះខែប្រាំង បង្កឲ្យម៉ូតូប៉ើងទៅមុខចម្ងាយប្រមាណ១០ម៉ែត្រផ្ទុះឆេះយ៉ាងសន្ធោសន្ធៅខ្ទេចអស់នៅសល់តែគ្រោងឆ្អឹង ចំណែកជនរងគ្រោះវិញប៉ើងខ្ទាតចេញពីម៉ូតូបោកក្បាលទៅលើថ្នល់កៅស៊ូបែកក្បាលស្លា.ប់ភ្លាមៗនៅនឹងកន្លែងគួរឲ្យសង្វេគ។ករណីនេះកើតឡើងកាលពីវេលាម៉ោង១០និង៣២នាទីយប់ ថ្ងៃទី២០ ខែមិថុនា ឆ្នាំ២០២១ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៤៣/១៤៤ ស្ថិតក្នុងភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀង។
បើតាមសមត្ថកិច្ចបានឲ្យដឹងថា មុនពេលកើតហេតុ គេបានឃើញមានម៉ូតូ០១គ្រឿង ម៉ាក NOVO គ្មានស្លាកលេខ បើកបរក្នុងទិសដៅពីកើតទៅលិច លុះមកដល់ចំណុចកើតហេតុខាងលើ ក៏មានរថយន្ត១គ្រឿងម៉ាក RAVE4 ពណ៌ទឹកប្រាក់ ពាក់ស្លាកលេខភ្នំពេញ 2AP-2028 ក្នុងទិសដៅស្របគ្នា ក្នុងល្បឿនយ៉ាងលឿន មកបុកម៉ូតូជនរងគ្រោះចំពីក្រោយពេញទំហឹង បណ្តាលឲ្យជនរងគ្រោះខ្ទាតចេញពីលើម៉ូតូបោកក្បាលទៅលើនឹងថ្នល់ស្លា.ប់ភ្លាមៗតែម្តង ចំណែកម៉ូតូវិញប៉ើងទៅមុខចម្ងាយប្រមាណ១០ម៉ែត្រ ធ្វើម៉ូតូជនរងគ្រោះផ្ទុះឆេះយ៉ាងសន្ធោសន្ធៅខ្ទេចអស់នៅសល់តែគ្រោងឆ្អឹង។
ប្រភពដដែលបន្តទៀតថា ជនរងគ្រោះខាងលើមានឈ្មោះ អែម វ៉ា ភេទប្រុស អាយុ៣៤ឆ្នាំ ជនជាតិខ្មែរ មុខរបរកម្មករសំណង់ រស់នៅភូមិព្រៃទប់ សង្កាត់ច្រកម្ទេស ក្រុងបាវិត ខេត្តស្វាយរៀង ស្លា.ប់នៅនឹងកន្លែងកើតហេតុ (មិនពាក់មួកសុវត្ថិភាព) ចំណែកម៉ូតូរងការខូចខាតធ្ងន់ (ឆេះសល់តែគ្រោងដែក)។ រីឯរថយន្តបង្កវិញ ម៉ាក RAVE4 ពាក់ស្លាកលេខភ្នំពេញ 2AP-2028 បើកបរដោយឈ្មោះនន់ ឡា ភេទប្រុស អាយុ៣៥ឆ្នាំ រស់នៅភូមិពោធិ៍ថ្មី ឃុំស្វាយតាយាន ស្រុកកំពង់រោទិ៍ខេត្តស្វាយរៀង បន្ទាប់ពីបុកម៉ូតូជនរងគ្រោះហើយ ជនបង្កបានរត់គេចខ្លួនបាត់ភ្លាមៗ បន្សល់ទុកតែរថយន្តនៅកន្លែងកើតហេតុប៉ុណ្ណោះ (រថយន្តខូចខាតស្រាល)។
ក្រោយពេលកើតហេតុ សមត្ថកិច្ចបានធ្វើការវាស់វែងរួច សមត្ថកិច្ចក៏បានប្រគល់ស.ពជនរងគ្រោះទៅអោយក្រុមគ្រួសារធ្វើបុណ្យតាមប្រពៃណី រីឯមធ្យោបាយទាំង២គ្រឿង ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកស្វាយទាប ដើម្បីដោះស្រាយតាមនីតិវិធី។
ចែករំលែកព័តមាននេះ