ទីក្រុងម៉ាកាវធ្លាប់ស្ថិតក្រោមការគ្រប់គ្រងរបស់ពួកព័រទុយហ្គាល់អស់រយៈពេលជាង៤០០ឆ្នាំ ដូច្នេះកោះនោះមានសំណង់ស្ថាបត្យកម្ម និងវប្បធម៌នៅលាយឡំគ្នារវាងចិន និងព័រទុយហ្គាល់ ក្លាយជាកោះដ៏ផូរផង់មួយ ។
ក្រៅពីមានវត្ថុបុរាណតាំងពីសម័យព័រទុយហ្គាល់ចូលកាន់កាប់ ក្នុងរយៈពេលចុងក្រោយនេះម៉ាកាវមានសំណង់ ថ្មីៗដែលសាងសង់ឡើងដើម្បីទាក់ទាញអ្នកទេសចរពីគ្រប់ទិសទីទៅទស្សនានៅក្នុងទីក្រុងដ៏តូចនោះ ពិសេសល្បីខាងកាស៊ីណូទូទាំងពិភពលោក ។
ដោយសារតែភាពចំណាស់ និងថ្មីនៅលាយឡំបែបនេះ តម្រូវឱ្យកោះម៉ាកាវក្លាយជាមន្តស្នេហ៍ក្នុងពេលបច្ចុប្បន្ន និងមានអ្នកទេសចរចូលទស្សនា ។
ក្រុងម៉ាកាវស្ថិតក្រោមការគ្រប់គ្រងរបស់ចិន មានទីតាំងក្នុងខេត្តក្វាងទុង ។ ផ្ទៃដីរបស់ម៉ាកាវស្ថិតក្នុងឈូងសមុទ្រម៉ាកាវ កោះតៃប៉ា កោះកូឡូអាន និងកូថៃ ។ ឈូងសមុទ្រម៉ាកាវ និងកោះតៃប៉ា តភ្ជាប់គ្នាដោយស្ពាន២ខ្សែ បច្ចុប្បន្នកំពុងសាងសង់ស្ពានមានប្រវែងជាង៥០គីឡូម៉ែត្រ តភ្ជាប់រវាងម៉ាកាវ ហុងកុង និងជូហៃ ស្ថិតនៅដែនដីរបស់ចិន ធ្វើឱ្យការធ្វើដំណើរនឹងមានលក្ខណៈងាយស្រួលជាងមុន ។
នៅក្រុងម៉ាកាវជាធម្មតាអ្នកទេសចរនឹងបានឃើញរូបសំណាកព្រះម៉ែគង់ស៊ីអីុម ដែលទម្រង់់មុខស្រដៀងនឹងព្រះម៉ែម៉ារី មានន័យថា ព័រទុយហ្គាល់ជាអ្នកសាងសង់ទុកជាអនុស្សាវរីយ៍ក្នុងនាមជាអ្នកធ្លាប់គ្រប់គ្រងម៉ាកាវអស់រយៈពេលជាង៤០០ឆ្នាំ ។ ពិធីបើកសម្ពោធវិមានអនុស្សាវរីយ៍នោះរៀបចំឡើងនៅថ្ងៃទី៨ ខែ៨ ឆ្នាំ១៩៩៨ ចំណែកតួខ្លួនរបស់ព្រះម៉ែគង់ស៊ីអីុម មានទម្ងន់១,៨តោន និងកម្ពស់១៨ម៉ែត្រ ។
នៅបរិវេណក្បែរព្រះម៉ែគង់ស៊ីអីុម មានហុងស៊ុយលេខ៨ ចំនួន៣កន្លែង ស្ថិតនៅបរិវេណច្រកចូលនៅបរិវេណព្រះកេសរបស់ព្រះម៉ែ និងបរិវេណផ្លូវខាងក្រោយ ដោយនៅទីតាំងនោះអ្នកទេសចររមែងនាំគ្នាអុជធូបបន់ស្រន់ ព្រោះមានជំនឿថាហុងស៊ុយលេខ៨ នៅបរិវេណនោះជាហុងស៊ុយផ្តល់នូវភាពមានទ្រព្យស្តុកស្តម្ភ ។
និមិត្តរូបមួយផ្សេងទៀតរបស់ក្រុងម៉ាកាវ គឺអគារប៉មម៉ាកាវ ដោយទីនោះគឺជាទីតាំងឡើងឈរមើលទិដ្ឋភាពក្រុងម៉ាកាវទាំងមូលម្តង ។
ប៉មនោះមានកម្ពស់ប្រហែល៣៣៨ម៉ែត្រដោយនៅផ្នែកខាងក្រោមមានហាងទំនិញ អាហារដ្ឋាន និងកាស៊ីណូ ។
ភាពចំណាស់រួមទាំងទិដ្ឋភាពដ៏ទាន់សម័យនៅម៉ាកាវតម្រូវឱ្យក្លាយជាទីកន្លែងមានមន្តស្នេហ៍ ខុសពីក្រុងដទៃទៀត និងជាប្រភពទេចរណ៍គ្មានគូប្រៀបនៅលើពិភពលោក៕
ចែករំលែកព័តមាននេះ