តាមក្រុមអ្នកវិទ្យាសាស្ត្រសាកលវិទ្យាល័យ Tokyo University របស់ប្រទេសជប៉ុនបានអះអាងថា បុរសដែលចាប់ជ្រុះសក់ទំពែកចំកណ្តាលក្បាលមុនអាយុ៥០ឆ្នាំប្រឈមនឹងការកើតមានជំងឺបេះដូងរហូតដល់៥២ភាគរយ
តាមក្រុមអ្នកវិទ្យាសាស្ត្រសាកលវិទ្យាល័យ Tokyo University របស់ប្រទេសជប៉ុនបានអះអាងថា បុរសដែលចាប់ជ្រុះសក់ទំពែកចំកណ្តាលក្បាលមុនអាយុ៥០ឆ្នាំប្រឈមនឹងការកើតមានជំងឺបេះដូងរហូតដល់៥២ភាគរយធៀបនឹងអ្នកដែលមិនទំពែក ។
ដោយឡែក សម្រាប់អ្នកទំពែកខាងមុខការសិក្សាដែលបានពិសោធលើមនុស្សប្រមាណ៤ម៉ឺននាក់បង្ហាញថា ពួកគេប្រឈមនឹងជំងឺបេះដូងតែ២២ភាគរយប៉ុណ្ណោះ ។ ចំណែកអ្នកដែលទំពែកចំកណ្តាលក្បាល និងទំពែកខាងមុខផងនោះ ការប្រឈមនឹងជំងឺបេះដូងឡើងដល់៦៩ភាគរយ ។ យ៉ាងណាក៏ដោយ ក្រុមអ្នកស្រាវជ្រាវនៅមិនទាន់យល់ស៊ីជម្រៅពីទំនាក់ទំនងរវាងក្បាលទំពែក និងជំងឺបេះដូងនោះទេ តែពួកគេជឿថា កម្រិតអ័រម៉ូនភេទ Testosterone ខ្ពស់ជាមូលហេតុនាំឱ្យបុរសជ្រុះសក់ ជាពិសេសបុរសដែលមានពូជអម្បូរក្បាលទំពែក ។ មួយវិញទៀត អ័រម៉ូនភេទ Testosterone ក៏ជាប់ទាក់ទងនឹងជំងឺបេះដូង ដែលអាចបំផ្លាញឫសសក់ផងដែរ ។ ក្រុមអ្នកស្រាវជ្រាវបានពន្យល់ថា ភាគច្រើននៃការទំពែកក្បាលបង្កឡើងនៅពេលរណ្តៅឫសសក់ពេញទៅដោយ Dihydrotestosterone ឬ DHT-ជាសារធាតុគីមីផលិតដោយអ័រម៉ូនភេទឈ្មោល Testosterone ។ នៅពេលដែលសារធាតុ DHT ដ៏ច្រើនលើសលប់ចរាចរណ៍ក្នុងឈាម ឫសសក់ក៏រួញធ្វើឱ្យសក់ស្តើងទៅៗហើយដុះតិចជាងពេលធម្មតា ។
លោកដេវីដ ហ្វេនតុនអ្នកឯកទេសសុខភាពសក់នៅទីក្រុងឡុងដ៍ ប្រទេសអង់គ្លេសបាននិយាយថា គ្រោះថ្នាក់ដ៏ធំបំផុតគឺការបញ្ជាក់មិនច្បាស់លាស់ចំពោះបុរសវ័យក្មេងដែលទំពែកខាងមុខ ។ លោកថា បុរសដែលទំពែកខាងមុខក្នុងវ័យក្មេង និងទំពែកចំកណ្តាលក្បាលនៅពេលគេឈានចូលវ័យចាស់បន្តិច ពួកគេទាំងនោះប្រហែលជាមិនអាចគេចផុតពីការប្រឈមបានទេ តែវាមានប្រយោជន៍ម្យ៉ាងដែរដាសតឿនឲ្យប្តូរបែបបទនៃការរស់នៅចាប់ពីវ័យក្មេងទៅ ៕
ចែករំលែកព័តមាននេះ