ក្រុងប៉ោយប៉ែត ៖ អតីតអូរជ្រៅពុះចែកព្រំដែនខ្មែរសៀមដែលមានទឹកជ្រៅមិនដែលរីងហើយសំបូរទៅដោយមច្ឆាចម្រុះផងនោះ ពេលនេះគេសង្កេតឃើញមានហ្វូងមនុស្សមួយក្រុមនៅខាងទឹកដីសៀមបាននាំគ្នាយកប្រដាប់ឆក់ត្រីដែលតចរន្តអគ្គិសនីពីលំនៅឋានក្នុងភូមិសៀមទល់មុខភូមិស្ទឹងបត់ សង្កាត់ប៉ោយប៉ែត ក្រុងប៉ោយប៉ែតឆក់ត្រីក្នុងអូរព្រំដែនយ៉ាងអនាធិបតេយ្យហាក់គ្មានអ្នកណាហាមឃាត់ឡើយ ។ កន្លែងដែលប្រជាជនសៀមនាំគ្នាឆក់ត្រីនោះ គឺទល់មុខច្រកប៉ុសិ៍្តស្ទឹងបត់របស់ប៉ូលិសការពារព្រំដែនគោកវរសេនាតូចលេខ៨៩១របស់កម្ពុជា ។
បើតាមប្រភពពីប្រជាពលរដ្ឋនៅតាមបន្ទាត់ព្រំដែនចំណុចមានការឆក់ត្រីនោះបានបង្ហើបឱ្យដឹងថា ការឆក់ត្រីតាមអូរព្រំដែនរបៀបនេះ គឺមិនមែនមានតែភាគីសៀមទេ ខាងខ្មែរក៏មានដែរ ប៉ុន្តែប្រភពបានប្រាប់ថា កើតឡើងភាគីច្រើនតែពេលយប់ ។ ក្រុមអ្នកឆក់មានគ្នា៥ ទៅ៦នាក់អ្នកខ្លះកាន់ការុងចាំរើសត្រី អ្នកខ្លះចាំចុះរាវចាប់ត្រីក្រោយការឆក់ និងអ្នកខ្លះដើរអូសខ្សែភ្លើង ។ ការឆក់ត្រីរបៀបនេះ បើទោះជាខាងកម្ពុជាក្តី ឬសៀមក្តីគឺមិនគួរឱ្យកើតមាននោះ
ទេ គួរតែមានការហាមប្រាម ព្រោះវាជាអូរព្រំដែនរួមនៃប្រទេសទាំង២ ។ ម្យ៉ាងទៀត ត្រីទាំងឡាយណាដែលឆក់ហើយចាប់មិនបាន គឺវាមិនអាចបន្តពូជបានទៀតទេ ។ គេសង្ឃឹមថា បន្ទាប់ពីមានការរិះគន់នេះទៅសមត្ថកិច្ចនៃប្រទេសទាំង២នឹងមានវិធានការចំពោះជនទាំងឡាយណាដែលប្រព្រឹត្តបទល្មើសនេសាទក្នុងអូរព្រំដែននៃប្រទេសទាំង២ ឬក៏ត្រូវមានការហាមប្រាមដើម្បីរក្សាត្រីក្នុងអូរព្រំដែន ឱ្យបានគង់វង្ស ៕
ចែករំលែកព័តមាននេះ