រាជធានីភ្នំពេញ ៖ កម្លាំងសមត្ថកិច្ចនគរបាលជំនាញ នៃមន្ទីរប្រឆាំងបទល្មើសគ្រឿងញៀន បានបើកកិច្ចសហការជាមួយនគរបាលខណ្ឌដង្កោ រាជធានីភ្នំពេញ បង្ក្រាបក្រុមជនទុច្ចរិតមួយក្រុមដែលតែងតែក្លែងបន្លំស្លៀកពាក់ឯកសណ្ឋានជាមន្ត្រីនគរបាល នៃមន្ទីរប្រឆាំងបទល្មើសគ្រឿងញៀន ហើយលួចធ្វើសកម្មភាពចាប់ប្រជាពលរដ្ឋជំរិតយកប្រាក់នៅក្នុងភូមិសាស្ត្ររាជធានីភ្នំពេញ បានចំនួន៤នាក់ ។
ជនសង្ស័យដែលចាប់ខ្លួនបានទាំង៤នាក់ខាងលើនេះ ក្នុងនោះរួមមាន ៖ ១.ឈ្មោះ កេត វីរីយ៉ា ភេទប្រុស អាយុ៣៥ឆ្នាំ (មេក្លោងផ្តើមគំនិត) ២.ឈ្មោះ សយ តុលា ភេទប្រុស អាយុ៣២ឆ្នាំ (អ្នកសមគំនិត) ៣.ឈ្មោះ ផាន់ វីរ:ភក្តី ភេទប្រុស អាយុ ៣១ឆ្នាំ (អ្នកសមគំនិត) និង៤.ឈ្មោះ សល់ ភារ: ភេទប្រុស អាយុ ៣១ឆ្នាំ (អ្នកសមគំនិត) ។
ទាក់ទិននឹងការឃាត់ខ្លួនជនទុច្ចរិតទាំង៤នាក់ខាងលើនេះ លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន បានឲ្យដឹងថា បន្ទាប់ពីបានទទួលព័ត៌មានជាបន្តបន្ទាប់ពីពលរដ្ឋ និងកម្លាំងសមត្ថកិច្ចនៃអធិការដ្ឋាននគរបាលខណ្ឌដង្កោ រាជធានីភ្នំពេញ ស្ដីពីជនសង្ស័យមួយក្រុមបានបង្ហាញអត្តសញ្ញាណ (ស្លាកពាក់ឯកសណ្ឋានជាសមត្ថកិច្ចនគរបាលប្រឆាំងគ្រឿងញៀន) ដោយប្រើធ្យោបាយ រថយន្ត និងម៉ូតូជិះធ្វើសកម្មភាពចាប់ពលរដ្ឋសម្លុតយកប្រាក់ជាថ្នូរនៃការដោះលែងវិញ ។
ដោយអនុវត្តតាមបញ្ជា ឯកឧត្តម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តមនាយឧត្ដមសេនិយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំដោយរូបលោកផ្ទាល់ ក្នុងនាមនាយកមន្ទីរប្រឆាំងបទល្មើសគ្រឿងញៀន។
នៅថ្ងៃទី១៧ ខែមិថុនា ឆ្នាំ២០២១ វេលាម៉ោង២៤និង០០នាទីរំលងអធ្រាត្រ នៅចំណុចភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ កម្លាំងជំនាញនៃមន្ទីរប្រឆាំងបទល្មើសគ្រឿងញៀន(ក៤) សហការជាមួយកម្លាំងជំនាញ នៃអធិការដ្ឋាននគរបាលខណ្ឌដង្កោ ដឹកនាំដោយលោកវរសេនីយ៍ឯក ជឹម ស៊ីថា អធិការបានចុះស្រាវជ្រាវ រហូតឈានទៅបង្ក្រាបជាក់ស្តែងក្រុមក្លែងខ្លួនជាសមត្ថកិច្ចនគរបាល នៃមន្ទីរប្រឆាំងបទល្មើសគ្រឿងញៀន ដែលកំពុងធ្វើសកម្មភាពចាប់ពលរដ្ឋសម្លុតយកប្រាក់ ។
ដែលកន្លងមក ក្រុមជនសង្ស័យនេះបានធ្វើសកម្មភាពចាប់ពលរដ្ឋសម្លុតយកប្រាក់ជាច្រើនលើកមកហើយ នៅក្នុងភូមិសាស្ត្ររាជធានីភ្នំពេញ ហើយមហាជនតែងតែយល់ច្រឡំថា ជាកម្លាំងសមត្ថកិច្ចរបស់អង្គភាពមន្ទីរប្រឆាំបទល្មើសគ្រឿងញៀន តែការពិតត្រូវបានបកស្បែក គឺជនទុច្ចរិតបានក្លែងបន្លំ ។
ជាលទ្ធផលឃាត់ខ្លួនជនសង្ស័យ៤នាក់ខាងលើ និងចាប់យកវត្ថុតាងរួមមាន ៖ ១- រថយន្ត១គ្រឿង, ២- ម៉ូតូ២គ្រឿង, ៣- អាវុធខ្លី(ជ័រ)១ដើម, ៤- វិទ្យុទាក់ទងម៉ាកមូតូរ៉ូឡា១គ្រឿង, ៥- ឯកសណ្ឋាននគរបាល២កំប្លេ និងអាវ១, ៦- មួកនគរបាល១, ៧- ខ្សែក្រវ៉ាត់នគរបាល១, ៨- អាវគ្រោះ ១ មានផ្លាក់សញ្ញាគ្រឿងញៀន. ៩- អាវកាក់ ១ មានផ្លាក់សញ្ញាគ្រឿងញៀន, ១០- កាបូកដៃមានសញ្ញានគរបាលគ្រឿងញៀន ១. ១១- កាតនគរបាលក្លែងក្លាយ ចំនួន ៣សន្លឹក, ១២- កាតសារព័ត៌មានកំពង់សោមប៉ុស្តិ៍ ១សន្លឹក, ១៣- តេស្តទឹកមូត្ររកសារធាតុញៀន ១តេស្ត, ១៤- កាតកម្លាំងមូលដ្ឋានសម្ងាត់ក្លែងក្លាយ ២សន្លឹក(ក៧ ក៥), ១៥- កាតសម្គាល់អាវុធខ្លី ១សន្លឹក, ១៦- អត្តសញ្ញាណប័ណ្ណសញ្ជាតិខ្មែរ ១សន្លឹក និង១៧-កាតចាក់វ៉ាក់សាំង ១សន្លឹក ។
ក្រោយឃាត់ខ្លួនជនសង្ស័យទាំង៤នាក់ និងវត្ថុតាងរួច ត្រូវបានសមត្ថកិច្ចកសាងសំណុំរឿងបញ្ជូនជូនទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់ ៕
ចែករំលែកព័តមាននេះ