មីស៊ីលធុន GRAD ដែលអាចបាញ់បានឆ្ងាយទាំងឡាយត្រូវបានបាញ់ចេញពីហ្គាហ្សាកាលពីថ្ងៃទី២៤ មីនា ហើយធ្លាក់ដល់ទីក្រុងកំពង់ផែ ASHDOD របស់អ៊ីស្រាអែល និងតំបន់មួយទៀតនាភាគខាងជើងប្រទេសនេះ ដែលនោះកំណត់ពីការកើនឡើងនៃភាពតានតឹងដែលផ្ទុះឡើងវិញចាប់តាំងពីប៉ុន្មានថ្ងៃមកហើយក្រោយពីស្ងប់ស្ងាត់រយៈពេលជាង២ឆ្នាំមក។
យោងតាមប៉ូលិសអ៊ីស្រាអែលថា ការបាញ់ប្រហារទាំងនោះដែលពុំបណ្តាលឱ្យមានជនរងគ្រោះបានទៅដល់តំបន់ YAVENEH ចម្ងាយ៤៥គីឡូម៉ែត្រពីព្រំដែនហ្គាហ្សា ហើយនៅចម្ងាយតែ២០គីឡូម៉ែត្រទៀតប៉ុណ្ណោះពីទីក្រុងតែលអាវីវ។ តំបន់នេះធ្លាប់រងការបាញ់ប្រហាររបស់ពួកប៉ាឡេស្ទីនលើកចុងក្រោយពេលកងទ័ពអ៊ីស្រាអែលវាយប្រហារប្រឆាំងពួកហាម៉ាស់នៅ ហ្គាហ្សាកាលពីខែធ្នូ ឆ្នាំ២០០៨ និងខែមករា ឆ្នាំ២០០៩។
ពេញមួយថ្ងៃទី២៤ មីនា កងយន្តហោះអ៊ីស្រាអែលបានវាយប្រហារគោលដៅទាំងឡាយនៅជ្រោយហ្គាហ្សា។ ជំរំហ្វឹកហ្វឺនមួយ និងអគាររបស់ភ្នាក់ងារសន្តិសុខ និងជើងទម្របាញ់រ៉ុក្កែតមួយត្រូវរងការវាយប្រហារ ។
អំពើហិង្សាទាំងនេះកើតមានបន្ទាប់ពីការវាយប្រហារភេរវកម្មមួយដែលសម្លាប់ស្ត្រីអ្នកទេសចរជនជាតិអង់គ្លេសម្នាក់ ហើយមនុស្ស៣០នាក់ទៀតត្រូវរបួសក្នុងសង្កាត់ជ្វីហ្វមួយនៃទីក្រុងហ្សេរុយសាឡឹម ដែលជាលើកដំបូងពុំធ្លាប់មានចាប់តាំងពី៧ឆ្នាំមកហើយ ៕
ចែករំលែកព័តមាននេះ