ការប្រកាសអាសន្នត្រូវបានធ្វើជាថ្មីកាលពីយប់ថ្ងៃទី២៤ វិច្ឆិកា នៅប្រទេសទុយនីស៊ីបន្ទាប់ពីការស្លា.ប់ភ្នាក់ងារការពារសន្តិសុខប្រធានាធិបតីយ៉ាងតិច១២នាក់ ក្នុងការវាយប្រហារភេរវកម្មមួយប្រឆាំងរថយន្តបឺស
ការប្រកាសអាសន្នត្រូវបានធ្វើជាថ្មីកាលពីយប់ថ្ងៃទី២៤ វិច្ឆិកា នៅប្រទេសទុយនីស៊ីបន្ទាប់ពីការស្លាប់ភ្នាក់ងារការពារសន្តិសុខប្រធានាធិបតីយ៉ាងតិច១២នាក់ ក្នុងការវាយប្រហារភេរវកម្មមួយប្រឆាំងរថយន្តបឺសពួកគេនៅកណ្តាលរដ្ឋធានីទុយនីស ។
លោក WALID LOUGUINI អ្នកនាំពាក្យក្រសួងមហាផ្ទៃទុយនីស៊ីថ្លែងប្រាប់ AFP ថា ការផ្ទុះដែលកើតមាននាចុងរសៀលជិតមហាវិថីសំខាន់មួយនៃក្រុងទុយនីសគឺជាអំពើភេរវកម្មមួយ ។ ការវាយប្រហារនេះ បណ្តាលឱ្យមនុស្សស្លាប់១២នាក់ ហើយភ្នាក់ងារការពារសន្តិសុខ២០នាក់ទៀតរងរបួស ។ អ្នកស្លាប់ទាំងអស់សុទ្ធតែជាសមាជិកកងកម្លាំងសន្តិសុខការពារប្រធានាធិបតី ។
ក្នុងសង្កថាមួយតាមទូរទស្សន៍ ប្រមុខរដ្ឋ លោក BEJI CAID ESSEBSI ដែលលុបចោលទស្សនកិច្ចផ្លូវរដ្ឋរបស់លោកនៅប្រទេសស្វ៊ីសនោះប្រកាសថា ការប្រកាសអាសន្នត្រូវមានជាថ្មីក្នុងទូទាំងប្រទេស ។ ការប្រកាសអាសន្នត្រូវបានលុបចោលកាលពីដើមខែតុលា ប៉ុន្មានខែក្រោយការវាយប្រហារភេរវកម្មនៅជិតទីក្រុង SOUSSE បណ្តាលឱ្យមនុស្សស្លាប់៣៨នាក់មក ។
លោក ESSEBSI ក៏ប្រកាសផងដែរពីបំរាមគោចរនៅក្រុងទុយនីសចាប់ពីម៉ោង២១រហូតដល់ម៉ោង៥ព្រឹករួចវិធានការនេះនឹងនៅជាធរមានរហូតដល់មានបទបញ្ជាជាថ្មី ។
នៅកន្លែងវាយប្រហារក្បែរមហាវិថី MOHAMED-V អ្នកកាសែតរបស់ AFP ម្នាក់និយាយថា បានឃើញរថយន្តបឺសមួយគ្រឿងត្រូវភ្លើងឆេះខ្លោចអស់មួយផ្នែកធំ ។ រថយន្តសង្គ្រោះ និងរថយន្តពន្លត់ភ្លើងជាច្រើនស្ថិតនៅទីនោះ ។
ប្រទេសទុយនីស៊ីចាប់តាំងពីបដិវត្តន៍ខែមករា ឆ្នាំ២០១១ មក ប្រឈមមុខនឹងចលនាជីហាដជាអ្នកទទួលខុសត្រូវលើការស្លាប់ទាហាន និងប៉ូលិសជាច្រើនសិបនាក់ ។ រួចនាឆ្នាំនេះមានការវាយប្រហារភេរវកម្ម២ ប្រកាសទទួលខុសត្រូវដោយក្រុមរដ្ឋអ៊ិស្លាមសម្លាប់អ្នកទេសចរបរទេស៥៩នាក់ និងប៉ូលិសម្នាក់ក្នុងការវាយប្រហារនៅតំបន់ SOUSSE កាលពីខែមិថុនា និងការវាយប្រហារនៅសារមន្ទីរ BARDO ក្រុងទុយនីស កាលពីខែមីនា ៕
ចែករំលែកព័តមាននេះ