ខេត្តព្រៃវែង ៖ សោកនាថកម្មដ៏អាក្រក់តែមួយប្រព្រិចភ្នែកធ្វើឲ្យបុរសម្នាក់យំស្ទើគាំងបេះដូង ដោយប្រពន្ធ និងកូនជួបគ្រោះថ្នាក់ចរាចរណ៍ស្លាប់ប្រពន្ធ និងកូន០២នាក់ ហើយកូន០២នាក់ទៀតរងរបួសធ្ងន់ធ្ងរ តើនណាអាចទទួលយកបាន ។
គ្រោះថ្នាក់ចរាចរណ៍ដ៏អាក្រក់នេះបានកើតឡើង នៅវេលាម៉ោង៣និង០០នាទីរសៀល ថ្ងៃទី១៩ មិថុនា ២០២១ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ៩០_៩១ ស្ថិតក្នុងភូមិជ្រលងឃុំប្រសាទ ស្រុកកំពង់ត្របែក ខេត្តព្រៃវែង ។
ស្ត្រីរងគ្រោះមិនទាន់ស្គាល់អត្តសញ្ញាណទេ មានអាយុ៤៦ឆ្នាំ សមត្ថកិច្ចបានឲ្យដឹងថា មានទីលំនៅភូមិត្របែក ប្រហោង ឃុំតាសួស ស្រុកស្វាយជ្រំ ខេត្តស្វាយរៀង ។
បើតាមប្រជាពលរដ្ឋដែលបានឃើញហេតុការណ៍ផ្ទាល់ភ្នែកបានឲ្យដឹងថា មុនពេលកើតហេតុគេឃើញស្ត្រីរងគ្រោះ ជិះម៉ូតូ០១គ្រឿងម៉ាកហុងដា សេ១២៥ ពណ៌ខ្មៅ ពាក់ស្លាកលេខស្វាយរៀង 1L-2286 បើកបរពីទិសខាងលិចមកទិសខាងកើត ដោយឌុបកូនស្រី កូនប្រុស ចំនួន០៤នាក់ «ខាងមុខ២នាក់ អង្គុយលើកកាបូបខោអាវ និងខាងក្រោយ២នាក់» លុះមកដល់ចំណុចខាងលើបានបុកជាមួយម៉ូតូសណ្តោងរ៉ឺម៉កចំពីក្រោយពេញទំហ៊ឹងបណ្តាលឲ្យកូនប្រុសស្រីអង្គុយខាងមុខបែកក្បាលស្លា.ប់ ភ្លាមៗ ចំណែកស្ត្រីជាម្តាយដាច់ក្បាល ចេញពីដងខ្លួន ស្លាប់ភ្លាមៗដែរ ចំណែកកូនប្រុសស្រី នៅពីខាងក្រោយរងរបួសធ្ងន់ធ្ងរសន្លប់ស្តូកស្តឹងគួរឲ្យសង្វេគ ។
ចំណែកម៉ូតូសណ្តោងរ៉ឺម៉កប្រភេទយក្សបានរ៉េចង្កូតធ្លាក់ទៅក្នុងស្រែ បន្ទាប់មកអ្នកបើកបរម៉ូតូរ៉ឺម៉កបានរត់គេចពីកន្លែងកើតហេតុបាត់ស្រមោលបន្សល់ទុក តែម៉ូតូសណ្តោងរ៉ឺម៉កនៅកន្លែងកើតហេតុ និងជនរងគ្រោះ០៥នាក់ ម្តាយ និងកូន នៅលើថ្នល់គួរឲ្យញាក់សាច់ ។
ក្រោយពីកើតហេតុសមត្ថកិច្ចបានមកដល់ធ្វើការវាស់វែង និងហៅរថយន្តដឹកជនរងគ្រោះបញ្ជូនមកមន្ទីរពេទ្យ ស្រុកកំពង់ត្របែកដើម្បីសង្គ្រោះ និងលើកសពម្តាយ និងកូនដាក់មកចិញ្ចើមថ្នល់រង់ចាំប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។
ប្រភពបន្តថា កន្លះម៉ោងក្រោយមកគេឃើញបុរសជាប្តីជាឳពុកមកដល់យំសោកស្ទើគាំងបេះដូង តើនណាអាចទទួលយកបាន បាត់បង់ប្រពន្ធ និងកូនបែបនេះ ។ ហើយសាច់ញាតិម្នាក់បានប្រាប់ថា ជនរងគ្រោះមានកូន០៦នាក់ ស្លាប់ ប្រពន្ធ និងកូនប្រុសស្រី០២នាក់ ចំណែកកូនប្រុស អាយុ១៣ឆ្នាំ និងកូនស្រី អាយុ២ឆ្នាំ រងរបួសធ្ងន់ ហើយនៅសល់ម្នាក់នៅផ្ទះជាមួយប្តី និងជាឳពុកទើបផុតគ្រោះ ។
ប្រភពបន្តទៀតថា ស្ត្រីរងគ្រោះ គឺបើកបរម៉ូតូឌុបកូនៗមកពីរាជធានីភ្នំពេញត្រឡប់មកស្រុកកំណើតវិញក៏ជួបគ្រោះបែបនេះ ៕
ចែករំលែកព័តមាននេះ