ខេត្តមណ្ឌលគិរី ៖ អាជ្ញាធរបានសម្រេចបិទផ្សារសែនមនោរម្យទាំងស្រុង ដោយផ្សារនេះ ស្ថិតនៅក្នុងភូមិចំប៉ក់ និងភូមិកណ្តាល សង្កាត់ស្ពានមានជ័យ ក្រុងសែនមនោរម្យ ក្រោយរកឃើញអ្នកជំងឺកូវីដជាបន្តបន្ទាប់ ហើយអាជីវករដែលគ្មានការប៉ះពាល់ ឬទំនាក់ទំនងជាមួយអ្នកជំងឺកូវីដ តម្រូវឲ្យទៅលក់ដូរទំនិញ និងបន្លែបង្ការ ម្ហូបត្រីសាច់ នៅលើអតីតព្រលានយន្តហោះជាប៉ុណ្ណោះអាសន្ន។
លោក ជាក់ ម៉េងហ៊ាង អភិបាលរងខេត្តមណ្ឌលគិរី និងមន្ត្រីពាក់ព័ន្ធ នាថ្ងៃទី១៨ ខែមិថុនា ឆ្នាំ២០២១ បានអញ្ជើញចុះត្រួតពិនិត្យ និងរៀបចំសណ្ដាប់ធ្នាប់ជូនបងប្អូនប្រជាពលរដ្ឋដែលបានដាក់លក់ បន្លែ ត្រីសាច់ នៅលើសួនច្បារក្រុងសែនមនោរម្យ បន្ទាប់ពីផ្សារជនជាតិ ស្ថិតនៅក្នុងក្រុងសែនមនោរម្យ ត្រូវបានធ្វើការបិទខ្ទប់នាពេលថ្មីៗនេះ ដោយសារជំងឺកូវីដ១៩ ។
នាឱកាសនោះដែរ លោក ជាក់ ម៉េងហ៊ាង បានអំពាវនាវដល់បងប្អូនប្រជាពលរដ្ឋត្រូវអនុវត្ត ៣កុំ ៣ការពារ របស់រាជរដ្ឋាភិបាល ក៏ដូចក្រសួងសុខាភិបាល ជាពិសេសបងប្អូនប្រជាពលរដ្ឋដែលពាក់ព័ន្ធដោយផ្ទាល់ ឬប្រយោលជាមួយអ្នកផ្ទុកជំងឺកូវីដ១៩ សូមទៅយកសំណាកនៅមន្ទីរពេទ្យបង្អែកខេត្ត ឬទីតាំងណាមួយដែលក្រុមគ្រូពេទ្យបានកំណត់ ។
សូមបញ្ជាក់ថា គិតត្រឹមព្រឹកថ្ងៃទី១៩ មិថុនា ២០២១ ចំនួនអ្នកជំងឺកូវីដ១៩ក្នុងខេត្តមណ្ឌលគិរី បានកើនឡើងចំនួន៥៧នាក់ ក្នុងនោះក៏មានម្នាក់ជាកុមារវ័យត្រឹម១៨ខែដែរ៕
ចែករំលែកព័តមាននេះ