- ភ្នំពេញ
ភ្នំពេញ៖ ក្នុងអំឡុងពេលកូវីដ១៩ ឆ្លងរាលដាល ក្នុងព្រឹត្តិការណ៍សហគមន៍ ថ្ងៃ២០កុម្ភៈ រហូតដល់ពេលនេះ មិនទាន់ស្ងប់ស្ងាត់នៅឡើយនោះ គឺអ្នកជំងឺដទៃផ្សេងទៀត ដែលឈឺក្រៅពីជំងឺកូវីដ១៩ ហាក់ដូចជាជួបការលំបាកជាខ្លាំង…
ភ្នំពេញ៖ ក្នុងអំឡុងពេលកូវីដ១៩ ឆ្លងរាលដាល ក្នុងព្រឹត្តិការណ៍សហគមន៍ ថ្ងៃ២០កុម្ភៈ រហូតដល់ពេលនេះ មិនទាន់ស្ងប់ស្ងាត់នៅឡើយនោះ គឺអ្នកជំងឺដទៃផ្សេងទៀត ដែលឈឺក្រៅពីជំងឺកូវីដ១៩ ហាក់ដូចជាជួបការលំបាកជាខ្លាំង…
ភ្នំពេញ៖ ក្នុងអំឡុងពេលកូវីដ១៩ ឆ្លងរាលដាល ក្នុងព្រឹត្តិការណ៍សហគមន៍ ថ្ងៃ២០កុម្ភៈ រហូតដល់ពេលនេះ មិនទាន់ស្ងប់ស្ងាត់នៅឡើយនោះ គឺអ្នកជំងឺដទៃផ្សេងទៀត ដែលឈឺក្រៅពីជំងឺកូវីដ១៩ ហាក់ដូចជាជួបការលំបាកជាខ្លាំង ពិសេសនៅមន្ទីរពេទ្យរដ្ឋ។
កាលពីថ្ងៃទី១៦ ខែមិថុនា ឆ្នាំ២០២១ កម្មករសំណង់ម្នាក់ មានទីលំនៅក្នុងសង្កាត់ស្ទឹងមានជ័យ មិនស្រួលខ្លួន (ខ្យល់គរ) ហើយត្រូវបានកម្មករដូចគ្នា ដឹកតាមម៉ូតូកង់៣ បញ្ជូនទៅកាន់មន្ទីរពេទ្យជាបន្ទាន់។ តែគ្រូពេទ្យនៅពេទ្យរដ្ឋផង និងនៅពេទ្យឯកជនផង មិនទទួល រហូតដល់បុរសនោះ បានដាច់ខ្យល់ស្លាប់ នៅតាមផ្លូវលើម៉ូតូកង់៣។ ម្ចាស់កង់៣ ក៏បានទម្លាក់សពចោល នៅចំណតរថយន្តក្រុង តាមបណ្តោយមហាវិថីសហព័ន្ធរុស្ស៊ី ខាងកើតមន្ទីរពេទ្យ រ៉ូយ៉ាល់ភ្នំពេញ ក្នុងភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
កម្មករសំណង់ ដែលជាអ្នករួមការងារជាមួយសព បានឲ្យដឹងថា នៅវេលាម៉ោងប្រមាណ ១រសៀល ថ្ងៃទី១៦ ខែមិថុនា ឆ្នាំ២០២១ ខណៈពេលដែលកម្មកររូបនោះ ធ្វើការនៅការដ្ឋានសំណង់មួយ ក្នុងសង្កាត់បឹងសាឡាង ខណ្ឌទួលគោក ក៏មានអាការៈមិនស្រួលខ្លួន ហើយត្រូវបានកម្មករដូចគ្នា នាំគ្នាកោសខ្យល់អោយ រួចក៏បានដឹកតាមម៉ូតូកង់៣ បញ្ជូនទៅកាន់មន្ទីរពេទ្យមិត្តភាពកម្ពុជា-សូវៀត ឬមន្ទីរពេទ្យរុស្ស៊ី តែគ្រូពេទ្យ ពុំទទួល ក៏បានដឹកបញ្ជូនតាមម៉ូតូកង់បីដដែល មកកាន់មន្ទីរពេទ្យព្រះកុសមៈ ឬមន្ទីរលោកសង្ឃ ហើយគ្រូពេទ្យ មិនទទួលទៀត ក៏បានដឹកបញ្ជូនទៅកាន់មន្ទីរពេទ្យ រ៉ូយ៉ាល់ភ្នំពេញ។ ទៅដល់មន្ទីរពេទ្យឯកជន លំដាប់ផ្កាយ ៥នេះ ក៏ត្រូវគ្រូពេទ្យ មិនទទួលពិនិត្យព្យាបាលទៀត។
ដោយសារតែបញ្ជូនពីមន្ទីរពេទ្យមួយ ទៅមន្ទីរពេទ្យមួយ ហើយពេទ្យមិនទទួល អ្នកជំងឺក៏បានដាច់ខ្យល់ស្លាប់ នៅលើម៉ូតូកង់ ៣ នៅមុខមន្ទីរពេទ្យ រ៉ូយ៉ាល់ភ្នំពេញ ហើយក៏ត្រូវបានម៉ូតូកង់៣ ទម្លាក់ទុកចោល នៅចំណតរថយន្តក្រុង អោយដេកលើកន្លែងអង្គុយរង់ចាំ បង្កអោយមានការភ្ញាក់ផ្អើលយ៉ាងខ្លាំង។ នៅរសៀលនោះ នគរបាលមូលដ្ឋាន បានចុះទៅហ៊ុំព័ទ្ធសព រង់ចាំក្រុមគ្រូពេទ្យ មកធ្វើតេស្តរកកូវីដ។ ដោយសារតែមិនទាន់ពិនិត្យសព រកមេរោគកូវីដ១៩ គឺសមត្ថកិច្ច ពុំអនុញ្ញាតអោយកូនប្រុស ចូលទៅជិត ឬក៏យកសព ទៅធ្វើបុណ្យនោះឡើយ។
នៅមានករណីជាច្រើនទៀត អ្នកឈឺក្នុងសម័យកូវីដនេះ ទោះឈឺអ្វីក៏ដោយ ឲ្យតែទៅដល់ពេទ្យ មិនថា ពេទ្យរដ្ឋ ឬពេទ្យឯកជនទេ ទោះបីជាត្រូវសង្គ្រោះបន្ទាន់ក៏ដោយ គឺខ្លាច តែពេទ្យមិនហ៊ានទទួល។ តែបើពេទ្យទទួលឲ្យសម្រាកព្យាបាល គឺអ្នកជំងឺនោះ និងអ្នកកំដរ មុនគេត្រូវពិនិត្យ ធ្វើតេស្តរកកូវីដ១៩ តាមរយៈតេស្តរហ័ស។ សព្វថ្ងៃ ការធ្វើតេស្តរកមេរោគកូវីដ នៅពេទ្យរដ្ឋ ម្នាក់ ៦ម៉ឺនរៀល នៅមន្ទីរពេទ្យព្រះកុសមៈ ឬមន្ទីរពេទ្យលោកសង្ឃ ហើយតម្លៃ ២០ដុល្លារ ឬ ៨ម៉ឺនរៀល នៅមន្ទីរពេទ្យមិត្តភាពកម្ពុជា-សូវៀត ឬមន្ទីរពេទ្យរុស្ស៊ី ក្នុងរាជធានីភ្នំពេញ។ ចំណែកនៅមន្ទីរពេទ្យឯកជន ការធ្វើតេស្តរកកូវីដ ថ្លៃជាងនេះ ឆ្ងាយណាស់។
មានហេតុផលម្យ៉ាង ដែលពេទ្យរដ្ឋ ក៏ដូចជាពេទ្យឯកជន មិនទទួលអ្នកជំងឺ នោះគឺពេទ្យ ប្រាប់ថា ពេញអស់ហើយ មិនមានកន្លែង សម្រាប់អ្នកជំងឺសម្រាកព្យាបាលទេ។ មួយវិញទៀត នៅមន្ទីរពេទ្យខ្លះ ដូចជា មន្ទីរពេទ្យកាល់ម៉ែត គឺតេស្តរកកូវីដ ប្រភេទតេស្តរហ័ស តាមរយៈ Rapid Test គឺត្រូវបានក្រុមគ្រួសារអ្នកជំងឺ លើកឡើងថា ពេទ្យកាល់ម៉ែតមិនទទួលស្គាល់ទេ ដោយតម្រូវឲ្យអ្នកជំងឺ និងក្រុមគ្រួសារ ដែលត្រូវចូលកំដរអ្នកជំងឺ ត្រូវធ្វើតេស្តតាមម៉ាស៊ីនរបស់ក្រសួងសុខាភិបាល ដែលចំណាយពេលដល់ទៅ ១ថ្ងៃ ទៅ ២ថ្ងៃ ទើបដឹងលទ្ធផល។ ដូច្នេះទម្រាំតែទទួលបានលទ្ធផលពីការធ្វើតេស្តរកកូវីដតាមម៉ាស៊ីននេះ គឺអ្នកជំងឺ ដែលត្រូវសង្គ្រោះបន្ទាន់ មុខជាត្រូវស្លាប់ ឬក៏បើមិនស្លាប់ ក៏ចូលដល់ស្ថានភាពជំងឺធ្ងន់ធ្ងរដែរ។ ករណីនេះ កើតមានរួចមកហើយ រហូតដល់អ្នកជំងឺ ត្រូវបង្ខំចិត្ត ប្តូរទៅសម្រាកព្យាបាល នៅមន្ទីរពេទ្យឯកជន ដែលត្រូវចំណាយថ្លៃជាងនៅពេទ្យរដ្ឋ។
ជាការពិត ការធ្វើតេស្តរកកូវីដ លើអ្នកជំងឺ និងអ្នកទៅកំដរអ្នកជំងឺ គឺជាការត្រឹមត្រូវ ក្នុងកិច្ចការពារ កុំឲ្យឆ្លងកូវីដ១៩ ចូលក្នុងមន្ទីរពេទ្យ។ ប៉ុន្តែក៏គួរតែធ្វើដោយមិនគិតថ្លៃ ហើយបើត្រូវយកលុយ ក៏កុំឲ្យថ្លៃពេក ព្រោះអ្នកក្រ ឬមន្ត្រីរាជការមួយចំនួន អាចនឹងពិបាករកប្រាក់បង់លើថ្លៃធ្វើតេស្តនេះ ខណៈឧបករណ៍ធ្វើតេស្តរហ័ស រកកូវីដ Rapid Test ត្រូវបានរាជរដ្ឋាភិបាល ទិញចែកឲ្យតាមមន្ទីរពេទ្យ ហើយពេលនេះទៀត ឧកញ៉ា មហាសេដ្ឋីជាច្រើន ក៏ចាប់ផ្តើមចូលរួមវិភាគទានរាប់លានដុល្លារ ដើម្បីទិញសម្ភារៈឧបករណ៍ធ្វើតេស្តរហ័សនេះ។
ជាងនេះទៅទៀត ជាសីលធម៌គ្រូពេទ្យ គឺដំបូងបំផុត គ្រូពេទ្យត្រូវសង្គ្រោះជីវិតមនុស្ស។ លុយកាកជារឿងបន្ទាប់ ហើយករណីបុរសកម្មករសំណង់ បើថា គាត់កើតកូវីដមែន ក៏រឹងរឹតតែត្រូវជួយសង្គ្រោះជីវិតគាត់ថែមទៀត មិនគួរបណ្តោយរហូតដល់គាត់ស្លាប់ដូច្នេះទេ។
ឆ្លងតាមករណីកន្លងមកនេះ នៅពេទ្យរដ្ឋ ក៏ដូចជាពេទ្យឯកជនមួយចំនួន គួរតែប្តូរការគិតបន្តិច ហើយតម្កល់ទុកក្រមសីលធម៌ វិជ្ជាជីវៈគ្រូពេទ្យ ជាចម្បង។ អាយុជីវិតអ្នកជំងឺ ជារឿងអាទិភាពទី១។ គេអាចសង្គ្រោះបឋមលើអ្នកជំងឺនោះ ដោយអាចសន្មតថា អ្នកជំងឺ ដែលត្រូវសង្គ្រោះបន្ទាន់នោះ កើតកូវីដ ហើយត្រូវសង្គ្រោះដោយប្រុងប្រយ័ត្ន ដោយពេទ្យ ត្រូវពាក់អាវ និងឧបករណ៍សម្ភារៈបរិក្ខារការពារជំងឺកូវីដ ព្រមទាំងដាក់អ្នកជំងឺនោះ ក្នុងបន្ទប់ដាច់ដោយឡែក។ ពោលគឺទន្ទឹមនឹងការពិនិត្យសំណាក រកកូវីដ ក៏ការសង្គ្រោះអ្នកជំងឺ ត្រូវធ្វើដំណាលគ្នាដែរ។
ផ្ទុយទៅវិញ នៅពេលនេះ អ្នកជំងឺកូវីដ ត្រូវបានយកចិត្តទុកដាក់ ហើយបើជាជនជាតិខ្មែរយើងផង គឺរដ្ឋ ពិនិត្យព្យាបាលដោយពុំគិតថ្លៃឡើយ។ គ្រាន់តែពិនិត្យឃើញឈឺកូវីដ ឡានពេទ្យ ទៅដឹកដល់ផ្ទះ ដល់បន្ទប់ជួល។ និយាយដូច្នេះ មិនមែន ច្រណែន ហើយថា ចង់ឈឺកូវីដដូចគេនោះទេ។ តែនៅតាមមន្ទីរពេទ្យនិមួយៗ មិនថា ពេទ្យរដ្ឋ ឬពេទ្យឯកជនទេ គឺមានផ្នែកពិនិត្យព្យាបាលកូវីដផ្សេងពិសេស ដាច់ដោយឡែកពីផ្នែកជំងឺទូទៅ។ ដូច្នេះគួរតែមន្ទីរពេទ្យនិមួយៗ ពិសេសពេទ្យរដ្ឋធំៗ នៅភ្នំពេញ ពិនិត្យប្រព័ន្ធគ្រប់គ្រង បែងចែកការងាររបស់ខ្លួនឡើងវិញ ដើម្បីកុំឲ្យមានគ្រែ តែមិនមានអ្នកជំងឺ រហូតដល់អ្នកជំងឺ ត្រូវស្លាប់តទៅទៀត ដោយសារតែពេទ្យរុញពីមួយទៅពេទ្យមួយ៕
ចែករំលែកព័តមាននេះ