ខេត្តបន្ទាយមានជ័យ៖ អាជ្ញាធរខេត្តបន្ទាយមានជ័យ កាលពីថ្មីនេះ បានជួយទិញកង្កែបសាច់ពីកសិករសហគមន៍ចិញ្ចឹមកង្កែប នៅភូមិភ្នៀត សង្កាត់ភ្នៀត និងភូមិកំព្រីងសង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ។ ក្នុងនាមរដ្ឋបាលខេត្ត…
ខេត្តបន្ទាយមានជ័យ៖ អាជ្ញាធរខេត្តបន្ទាយមានជ័យ កាលពីថ្មីនេះ បានជួយទិញកង្កែបសាច់ពីកសិករសហគមន៍ចិញ្ចឹមកង្កែប នៅភូមិភ្នៀត សង្កាត់ភ្នៀត និងភូមិកំព្រីងសង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ។
ក្នុងនាមរដ្ឋបាលខេត្ត ឯកឧត្តម អ៊ុំ រាត្រី អភិបាលខេត្តបន្ទាយមាជ័យ និងក្រុមការងារ បានទៅជួយទិញកង្កែបសាច់ពីសហគមន៍ចិញ្ចឹមកង្កែបសង្កាត់ភ្នៀត និងសង្កាត់កោះពងសត្វ ចំនួន ១.០០០គ.ក្រ ហើយចែកទៅអោយកងកម្លាំងប្រដាប់អាវុធនៃកងឯកភាពនានា ដែលបាន និងកំពុងឈរជើងទ្រោលសភាពការណ៍ប្រយុទ្ធប្រឆាំងជំងឺកូវីដ១៩ ការទប់ស្កាត់លំហូរពលករខ្មែរឆ្លងដែនខុសច្បាប់ ការស្រាវជ្រាវរកគ្រួសារពលរដ្ឋក្រីក្រ និងរងផលប៉ះពាល់ខ្លាំងពីការរីករាលដាលនៃជំងឺកូវីដ១៩។
កង្កែបមួយចំណែកទៀត ផ្តល់ជូនមណ្ឌលជីវិតថ្មី ភ្នំបាក់ (កន្លែងបន្សាបអ្នកជាប់សារធាតុញៀន) សម្រាប់ទុកធ្វើម្ហូប អោយអ្នកមកបន្សាបសារធាតុញៀន។ នេះក៏ជាការដោះស្រាយជីវភាព បានមួយគ្រាផងដែរ។
សូមរំលឹកថា កាលពីថ្ងៃទី១២ និងថ្ងៃទី១៣ ខែមិថុនា ឆ្នាំ២០២១ កសិករចិញ្ចឹមកង្កែប បានត្អូញត្អែរថា កង្កែបសាច់លក់មិនដាច់ ហើយបានបង្កផលប៉ះពាល់យ៉ាងខ្លាំងដល់ជីវភាព ការសងបំណុល និងការទិញចំណីអោយវាស៊ី។
លោក ស្រី សុខា រស់នៅភូមិភ្នៀត សង្កាត់ភ្នៀត ជាកសិករចិញ្ចឹមបង្កែប បានអោយដឹងថា គាត់បាន ប្រកបរបរចិញ្ចឹមកង្កែបជាច្រើនឆ្នាំមកហើយ ហើយឆ្នាំនេះ ចិញ្ចឹមកង្កែបចំនួន ០៦ស្បៃ។
កសិករបានប្រាប់សារព័ត៌មានថា ពួកគាត់ព្រួយបារម្ភពីបញ្ហាប្រឈមនេះ៖ ទី១ គ្មានប្រាក់បង់ការប្រាក់ខ្ចីបុល នៅធនាគារ ឬស្ថាប័នមីក្រូហិរញ្ញវត្ថុ និងទី២ អត់ប្រាក់ទិញចំណីឲ្យវាកង្កែបស៊ី។
គាត់បន្តថា នាឆ្នាំនេះ គាត់បានចិញ្ចឹមកង្កែប ចំនួន ០៦ស្បៃ។ ក្នុង០១ស្បៃប្រហែល ១,០០០ក្បាល។ ពោលគឺឆ្នាំកន្លងមក វាមានទីផ្សារ ហើយមានម៉ូយមកទិញកង្កែបសាច់ ហើយបានតម្លៃខ្ពស់។
ចំណែកឯបងប្រុស ពុធ ឈួង កសិករចិញ្ចឹមកង្កែប នៅភូមិភ្នៀត សង្កាត់ភ្នៀត អោយដឹងថា សព្វថ្ងៃចិញ្ចឹមកង្កែបចំនួន ១១ស្បៃ ក្នុង ០១ស្បៃក មានជាង ១,០០០ក្បាលផងដែរ។ តែសល់លក់មិនទាន់ចេញ។
ក្រុមអ្នកចិញ្ចឹមកង្កែប ក៏បានសំណូមពរដល់អាជ្ញាធរដែនដី ក៏ដូចជាមន្ទីរជំនាញកសិកម្ម និងមន្ទីរពាណិជ្ជកម្ម ជួយរកទីផ្សារលក់បង្កែប ដើម្បីយកលុយបង់ការប្រាក់នៅធនាគារ និងបានទិញចំណីឲ្យបង្កែប ដែលនៅតូចៗបន្ថែមទៀត។
លោក ហួត សាវី ចៅសង្កាត់ភ្នៀត បានបញ្ជាក់ថា នៅក្នុងទូទាំងសង្កាត់ភ្នៀត មានកសិករចិញ្ចឹមកង្កែប ចំនួន ៥៨គ្រួសារ បច្ចុប្បន្ន កំពុងប្រឈមនឹងបញ្ហាទីផ្សារ គ្មានអ្នកទិញកង្កែបទេ។
ករណីនេះ លោក ដុំ វណ្ណឌី អនុប្រធានមន្ទីរពាណិជ្ជកម្មខេត្តបន្ទាយមានជ័យ បានអោយដឹងថា បញ្ហាទីផ្សាកង្កែបសាច់ និងកូន ដែលកសិករ នៅក្នុងសង្កាត់ភ្នៀត ជួបប្រទះនេះ ក្នុងនាមមន្ទីរ លោកនឹងខិតខំជួយរកទីផ្សារជូន។ មកទល់ថ្ងៃទី១៧ ខែមិថុនា កង្កែបសាច់នៅសហគមន៍ខាងលើ អាចលក់ចេញខ្លះវិញហើយ៕ ណុប រក្សា
ចែករំលែកព័តមាននេះ