រាជធានីភ្នំពេញ ៖ អតីតអគ្គនាយក នៃអគ្គនាយកដ្ឋានទឹកស្អាត ក្រសួងឧស្សាហកម្ម និងសិប្បកម្ម លោក ប្រាក់ ប្រាកដ កាលពីរសៀលថ្ងៃទី១៨…
រាជធានីភ្នំពេញ ៖ អតីតអគ្គនាយក នៃអគ្គនាយកដ្ឋានទឹកស្អាត ក្រសួងឧស្សាហកម្ម និងសិប្បកម្ម លោក ប្រាក់ ប្រាកដ កាលពីរសៀលថ្ងៃទី១៨ ខែមិថុនា ឆ្នាំ២០២១ ត្រូវបានកម្លាំងសមត្ថកិច្ចនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ធ្វើការឃាត់ខ្លួន និងបញ្ជូនទៅកាន់សាលាដំបូងរាជធានីភ្នំពេញ ពាក់ពន្ធសំណុំរឿងឆបោកប្រាក់ប្រមាណ ១០ម៉ឺនដុល្លារអាមេរិក យកទៅរត់ការ ផ្ទេរក្រមខណ្ឌ ពីស្ថាប័នយោធា ទៅនគរបាលជាតិ ។
សមត្ថកិច្ចបានឲ្យដឹងថា លោក ប្រាក់ ប្រាកដ ត្រូវបានឃាត់ខ្លួន នៅក្នុងហាងកាហ្វេមួយកន្លែង ស្ថិតតាមបណ្តោយផ្លូវហាណូយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ កាលពីវេលាម៉ោង៩ព្រឹកថ្ងៃទី១៨ ខែមិថុនា ឆ្នាំ២០២១ ដែលធ្វើឡើងតាមពាក្យបណ្តឹងរបស់អ្នកស្រី ចាន់ ធូ មានទីលំនៅភូមិព្រៃនប់២ ឃុំព្រៃនប់ ស្រុកព្រៃនប់ ខេត្តព្រះសីហនុ ប្តឹងចូលទៅសាលាដំបូងរាជធានីភ្នំពេញ កាលពីថ្ងៃទី២៥ ខែឧសភា ឆ្នាំ២០២១ ។
ដើមចមបណ្តាលឲ្យឃាត់ខ្លួន អតីតអគ្គនាយ នៃអគ្គនាយកដ្ឋានរូបនេះ ដោយសារកាលពីថ្ងៃទី១៥ មករា ២០២១ លោក ប្រាក់ ប្រាកដ បានទៅនិយាយធានា រត់ការផ្ទេរឈ្មោះតួនាទី ប្តីរបស់ឈ្មោះ អេង អូន ចេញពីក្របខណ្ឌកងទ័ព ទៅជាក្របខណ្ឌនគរបាលជាតិ និងឡើងធ្វើជាស្នងការរងនគរបាលខេត្តព្រះសីហនុ ដោយទារប្រាក់ថ្លៃរត់ការចំនួន ៣០ម៉ឺនដុល្លារអាមេរិក ។ ក្រោយនិយាយត្រូវគ្នា នៅថ្ងៃទី២៦ មករា ២០២១ ដើមបណ្តឹងបានប្រគល់ប្រាក់ចំនួន ១០ម៉ឺនដុល្លារអាមេរិក ឲ្យទៅឈ្មោះ ប្រាក់ ប្រាកដ ដោយរងចាំលទ្ធផលផ្ទេរឈ្មោះ និងតួនាទីជាស្នងការរងជាផ្លូវការ ទើបប្រគល់ប្រាក់ ២០ម៉ឺនដុល្លារអាមេរិក បន្ថែមទៀត ។
តាមពាក្យបណ្តឹងដដែលបានឲ្យដឹងទៀតថា ក្រោយពីទទួលបានប្រាក់នោះហើយ ឈ្មោះ ប្រាក់ ប្រាកដ ពុំបានធ្វើតាមការសន្យាទេ ថែមទាំងគេចវេស ទូរស័ព្ទក៏លំបាកដែរ ដូច្នោះហើយទើបដើមបណ្តឹងបានប្តឹងទាមទារយកលុយវិញ ។ លុះថ្ងៃទី៣ ខែមិថុនា ឆ្នាំ២០២១ លោក ស៊ិត វណ្ណៈ ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាកោះហៅឈ្មោះ ប្រាក់ ប្រាកដ ឲ្យចូលខ្លួនមកឆ្លើយបំភ្លឺ នៅថ្ងៃទី១៧ ខែមិថុនា តាមពាក្យបណ្តឹងនោះ ប៉ុន្តែឈ្មោះ ប្រាក់ ប្រាកដ មិនព្រមចូលខ្លួន បានជាតំណាងអយ្យការ ចេញដីកា បញ្ជាឲ្យនាំខ្លួនតែម្តង គឺស្មើនឹងចាប់ខ្លួន ។
លោក ប្រាក់ ប្រាកដ ត្រូវបានតំណាងអយ្យការបើកការសាកសួរ រហូតដល់ល្ងាចថ្ងៃដដែលនេះ ប៉ុន្តែនៅមិនទាន់មានលទ្ធផលយ៉ាងណានៅឡើយទេ តំណាងអយ្យការបានផ្ញើជនសង្ស័យឈ្មោះ ប្រាក់ ប្រាកដ ទៅសមត្ថកិច្ចវិញ តម្រូវឲ្យព្រឹកថ្ងៃស្អែក នាំមកសួរបន្តទៀត ដើម្បីសម្រេចជាផ្លូវការ ។
កន្លងមក លោក ប្រាក់ ប្រាកដ ធ្លាប់ចាញ់បោកគេឲ្យជួយរត់ការចង់ឡើងបុណ្យសក្តិ ពីអគ្គនាយក នៃអគ្គនាយកដ្ឋានទឹកស្អាតក្រសួងឧស្សាហកម្ម និងសិប្បកម្ម ទៅជា រដ្ឋលេខាធិការនៃក្រសួងមួយនោះ អស់ប្រាក់ប្រមាណជាង ១០ម៉ឺនដុល្លារអាមេរិកដែរ ដែលរឿងនេះលោក ប្រាក់ ប្រាកដ បានប្តឹងជនឆបោកទៅដល់សាលាដំបូងរាជធានីភ្នំពេញ ។ ក្រោយមករឿងក្តីនោះ ត្រូវបានតុលាការបានកោះហៅជនឆបោកទៅ និងដើមបណ្តឹងទៅសាកសួរ ប៉ុន្តែក្រោយមក ក៏ស្ងាត់ឈឹងដូចចោរលួចសេះ ។ ពេលនេះ ស្រាប់តែលេចធ្លាយរឿងលោក ប្រាក់ ប្រាកដ ឆបោកគេវិញម្តង យកលុយប្រមាណ ១០ដុល្លារអាមេរិក ត្រូវដើមបណ្តឹងប្តឹងចាប់ខ្លួនបញ្ជូនមកតុលាការ នៅពេលនេះ ៕
ចែករំលែកព័តមាននេះ