រាជធានីភ្នំពេញ៖ ស្របពេលដែលធនាគារពិភពលោកចេញរបាយការណ៍ព្យាករណ៍ទុកអំពីកំណើនសេដ្ឋកិច្ចរបស់កម្ពុជាថា នៅឆ្នាំ២០២១នេះអាចនឹងងើបឡើងវិញក្នុងរង្វង់៤% បន្ទាប់រួចទំហំអស់៣,១%កាលពីឆ្នាំ២០២០ ប៉ុន្តែសម្រាប់អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានបង្ហាញការយល់ឃើញរបស់ខ្លួនឬវាយតម្លៃថាកំណើនសេដ្ឋកិច្ចកម្ពុជាមិនអាចកើនឡើងដល់៤%បាននោះទេ ពោលគឺអាចមានសន្ទុះប្រហាក់ប្រហែលទៅនឹងឆ្នាំ២០២០។
លោក បណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាលើកឡើងថា ការព្យាករណ៍សេដ្ឋកិច្ចរបស់ធនាគារពិភពលោកនេះគឺជាការចូលរួមចំណែកមួយឱ្យប្រជាពលរដ្ឋមានភាពសប្បាយរីករាយ,ប្រជាពលរដ្ឋមានភាព សោមនស្សនិងមានសុទិដ្ឋិនិយមក្នុងការរស់នៅ អីចឹងវានឹងធ្វើឱ្យការចាយវាយនៅក្នុងប្រទេសមានកំណើន ហើយជាចលករមួយជំរុញកំណើនសេដ្ឋកិច្ចចេញពីផ្ទៃក្នុងប្រទេសរបស់ខ្លួនឯង។
លោកបណ្ឌិត គី សេរីវឌ្ឍន៍ សង្កត់ធ្ងន់ថា« ប៉ុន្តែស្ថានការណ៍នឹង វាមានភាពផុយស្រួយ ហើយខ្ញុំខ្លួនឯង យល់ឃើញថាកំណើនសេដ្ឋកិច្ចរបស់ប្រទេសកម្ពុជានៅក្នុងឆ្នាំ២០២១នេះ វាមិនអាចឡើងដល់៤%នោះទេ ក្នុងរង្វង់ពីសូន្យ(០)ដល់១%។សូន្យ(០)%មានន័យថាកំលាំងសេដ្ឋកិច្ចកម្ពុជាឆ្នាំ២០២១និងឆ្នាំ២០២០មានកំលាំងប្រហាក់ប្រហែលគ្នា មិនមានកំណើនលើសពីឆ្នាំ២០២០ទេ ដោយសារព្រឹត្តិការណ៍សហគមន៍២០កុម្ភៈ២០២១ វាបានអូសបន្លាយអស់រយៈពេលជិត៦ខែមកហើយ»។
បើតាមបណ្ឌិតសេដ្ឋកិច្ចរូបនេះលើកឡើងដូច្នេះថា បើសិនការចាក់វ៉ាក់សាំងរបស់រាជរដ្ឋាភិបាលបានទប់ស្កាត់ការឆ្លងជំងឺកូវីដ១៩បានល្អឥតខ្ចោះមែននោះ បានធ្វើឱ្យសន្ទុះរបស់យើងបានឡើងមកវិញ ហើយនៅឆ្នាំ២០២២អាចនឹងឡើងមក៦%។
ប្រធានគ្រប់គ្រងការិយាល័យធនាគាពិភពលោកប្រចាំកម្ពុជាលោកស្រី អ៊ិនហ្គូណា ដូប្រាចា មានសាសន៍ថា« ដូចប្រទេសជាច្រើនទៀតនៅក្នុងតំបន់ដែរ កម្ពុជាបានរងការប៉ះទង្គិចខ្លាំងពីការធ្លាក់ចុះនៃតម្រូវការលើសកលលោកដោយសារតែកូវីដ១៩។ ប៉ុន្តែដំណឹងល្អនៅត្រង់ថា កម្ពុជាបានចាក់វ៉ាក់សាំងឱ្យមនុស្សក្នុងប្រទេសបានជាង ៣លាននាក់ រួចហើយ ដែលជាអត្រាខ្ពស់មួយនៅក្នុងតំបន់។ធនាគារពិភពលោកនៅតែបន្តធ្វើការជាមួយកម្ពុជាដើម្បីជួយប្រទេសនេះបន្ថែមទៀតក្នុងការប្រយុទ្ធនឹងការឆ្លងរាតត្បាតនៃវីរុសកូវីដ១៩ និងជួយស្តារសេដ្ឋកិច្ច និងសង្គមឱ្យមានភាពធន់រឹងមាំឡើងវិញ»។
ពាក់ព័ន្ធនិងការព្យាករណ៍កំណើនសេដ្ឋកិច្ចរបស់កម្ពុជា ឯកឧត្តម វង្សី វិស្សុត រដ្ឋមន្ដ្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ចនិងហិរញ្ញវត្ថុធ្លាប់មានប្រសាសន៍ថា សេដ្ឋកិច្ចរបស់យើងនឹងងើបឡើងវិញនៅឆ្នាំ២០២១ ប៉ុន្តែការងើបឡើងនេះ នៅមានភាពមិនប្រាកដប្រជាកម្រិតខ្ពស់នៅឡើយ ប្រសិនបើការរាតត្បាតជំងឺកូវីដ-១៩ ក្នុងព្រឹត្តិការណ៍២០កុម្ភះ មានកម្រិតនៃផលប៉ះពាល់នៅតែខ្ពស់ និងមានជម្រៅជ្រៅ ហើយកម្មវិធីចាក់វ៉ាក់សាំងមិនអាចសម្រេចបានឆាប់រហ័ស។
ឯកឧត្តមរដ្ឋមន្ត្រីប្រតិភូ គូសបញ្ជាក់ដូច្នេះថា« សម្រាប់ដំណើរឆ្ពោះទៅមុខ កម្ពុជាបានដាក់ចេញនូវយុទ្ធសាស្ត្រស្តារសេដ្ឋកិច្ច ឆ្នាំ២០២១-២០២៣ ក្រោយវិបត្តិជំងឺកូវីដ-១៩ ដើម្បីស្តារសេដ្ឋកិច្ច ដោយផ្អែកលើសសរស្តម្ភចំនួន៣៖ ១)- ការរស់ឡើងវិញ និងរស់រានមានជីវិត៖ ដោយគ្រប់គ្រងការរីករាលដាលជំងឺកូវីដ-១៩ និងរក្សាឱ្យបាននូវដង្ហើមសេដ្ឋកិច្ច និងការរស់រានរបស់ប្រជាជន ព្រមទាំងការស្តារ និងកសាងមូលដ្ឋានគ្រឹះសេដ្ឋកិច្ចឡើងវិញ, ២)- កំណែទម្រង់៖ ប្រែក្លាយវិបត្តិទៅជាឱកាសដោយបង្កើនការធ្វើពិពិធកម្មនិងបង្កើនភាពប្រកួតប្រជែងសេដ្ឋកិច្ច ក្នុងនោះជាពិសេសតាមរយៈការធ្វើឌីជីថលនីយកម្ម និង ៣)- ពង្រឹងភាពធន់៖ តាមរយៈការពង្រឹង និងត្រៀមខ្លួន នៅក្នុងស្ថាប័នសាធារណៈ វិស័យសេដ្ឋកិច្ច និងហិរញ្ញវត្ថុធនធានមនុស្ស រួមទាំងប្រព័ន្ធសុខភាពសាធារណៈ បណ្តុះបណ្តាលជំនាញ និងសុវត្ថិភាពសង្គម ដើម្បីឆ្លើយតបទៅនឹងបញ្ហាស្រដៀងគ្នា ដែលអាចនឹងផ្ទុះឡើងនាពេលអនាគត»។
ឯកឧត្តមរដ្ឋមន្ត្រីប្រតិភូលើកឡើងថា មូលដ្ឋានសម្រាប់ការរៀបចំគម្រោងអនាគត និងកិច្ចសហការគោលនយោបាយ ត្រូវរៀបចំឡើង ជាលក្ខណៈយុទ្ធសាស្ត្រ ដើម្បីធ្វើឱ្យប្រទេសកម្ពុជាមានភាពរឹងមាំ និងមានភាពធន់ ដែលជាមូលដ្ឋានសម្រាប់កំណើនសេដ្ឋកិច្ច និងរក្សាភាពប្រកួតប្រជែងរបស់កម្ពុជា។
ក្នុងន័យនេះ កម្ពុជាត្រូវការលើកជំរុញការអភិវឌ្ឍវិស័យវិទ្យាសាស្ត្រ និងបច្ចេកវិទ្យា ដើម្បី ពន្លឿនកំណើនសេដ្ឋកិច្ច និងពង្រីកមូលដ្ឋានកំណើន ដោយមិនអាចកាត់ផ្តាច់ពីការបង្កើនសហគ្រិនភាព និងនវានុវត្តន៍បន្ថែមទៀត ទាំងក្នុងវិស័យសាធារណៈ និងឯកជនតាមរយៈការបង្កើនបច្ចេកវិទ្យាឌីជីថល នៅក្នុងបណ្តាញផលិតកម្ម និងជំរុញការធ្វើពាណិជ្ជកម្មតាមប្រព័ន្ធអេឡិចត្រូនិចសម្រាប់សហ- គ្រាសខ្នាតតូច និងមធ្យម។ សមាសធាតុទាំងនេះ គឺជាមូលដ្ឋានដ៏សំខាន់ សម្រាប់រៀបចំគម្រោងអនាគតរបស់យើង ដោយប្រើប្រាស់ធនធានមានកំណត់របស់យើងប្រកបដោយប្រសិទ្ធភាព និងនិរន្តភាព៕
ចែករំលែកព័តមាននេះ