រាជធានីភ្នំពេញ ៖ កសិករដែលបានប្រើប្រាស់ឡជីវឧស្ម័ន បាននិយាយថាចាប់តាំងពីពួកគាត់បានប្រើប្រាស់ឡជីវឧស្ម័នមកចំណូលក្នុងគ្រួសារមួយឆ្នាំមានការកើនឡើងជាងមុនពេលពួកមិនបានប្រើឡជីវឧស្ម័ននេះ និងសូមឱ្យកសិករដទៃទៀតងាកមកប្រើប្រាស់ប្រភេទឡនេះ ដើម្បីចំណេញទាំងថវិកា និងពេលវេលាផងដែរ ។
លោកបៀន យក់ ប្រជាពលរដ្ឋនៅស្រុកប្រាសាទបាគង ខេត្តសៀមរាប ដែលបានប្រើប្រាស់ឡជីវឧស្ម័នសម្រាប់យកចំហេះប្រើប្រាស់ក្នុងផ្ទះនោះបានឱ្យដឹងថា ចាប់តាំងពីលោកបានដំឡើងឡជីវឧស្ម័ន លោកទទួលបានអត្ថប្រយោជន៍ពីឡនេះជាច្រើន ។ អ្វីដែលទទួលបាននោះគឺហ្គាសសម្រាប់ប្រើប្រាស់ក្នុងផ្ទះបាយសម្រាប់ចម្អិនអាហារ ដោយមិនអស់លុយទិញអុស ឬធ្យូងដូចមុនទៀត ដែលជាការសន្សំសំចៃមួយចំណែក ។ ម្យ៉ាងទៀត ក្នុងមួយថ្ងៃ ឡនេះវាត្រូវការលាមកសត្វដូចជាគោ ក្របីជ្រូកជាដើម ហើយសល់ពីចំហេះ វាក៏ផ្ដល់មកវិញនូវជីកសិកម្មសម្រាប់ដាក់ដំណាំរបស់យើងថែមទៀត ។ នេះក៏បានចំណេញថវិកាមួយផ្នែកទៀតពីការទិញជីមកដាក់ដំណាំ ។
ចំណែកអ្នកស្រីហ៊ុត សាវ៉ុន ពលរដ្ឋក្នុងស្រុកប្រាសាទបាគងនេះដែរ ក៏បានឱ្យដឹងផងដែរថា ចាប់តាំងពីអ្នកប្រើប្រាស់ឡជីវឧស្ម័នមក អ្នកស្រី បានចំណេញថវិកាមួយចំនួនពីការចំណាយទៅលើអុស ធ្យូង និងជីសម្រាប់ដាក់ដំណាំ ព្រោះថាក្នុងមួយឆ្នាំ ឡជីវឧស្ម័ននេះបានផ្ដល់ជី មកវិញជាមធ្យម២០តោនឯណោះ ដូច្នេះវាសមល្មមសម្រាប់ដាក់ដំណាំផ្សេងៗ ហើយជាជីធម្មជាតិដោយមិនព្រួយបារម្ភពីផលប៉ះពាល់លើសុខភាពនោះដែរ ។
លោកយ៉ង យឿន អ្នកសម្របសម្រួលក្រុមហ៊ុនឡជីវឧស្ម័នមួយប្រចាំខេត្តសៀមរាបបានឱ្យដឹងថា បើសិនជាពលរដ្ឋប្រើប្រាស់ឡជីវឧស្ម័ននេះកាន់តែច្រើន អ្វីដែលទទួលបាន មិនមែនតែពលរដ្ឋខ្លួននោះទេ គឺប្រទេសជាតិទាំងមូលផងដែរ ។ ទី១កសិករមិនចាំបាច់ទិញជីគីមីមកដាក់ដំណាំដែលអាចធ្វើឱ្យប៉ះពាល់សុខភាពអ្នកបរិភោគ មិនត្រូវការកាប់បំផ្លាញដើមឈើ ដើម្បីមកធ្វើអុសឬផលិតជាធ្យូងដើម្បីផ្គត់ផ្គង់នោះទេ ហើយមួយទៀត ពលរដ្ឋកម្ពុជានឹងទទួលបានសុខភាពល្អមិនមានជំងឺដំណាត់ដែលនាំឱ្យបាត់បង់ថវិកាសម្រាប់ព្យាបាលជំងឺផងដែរ ។
លោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទបានឱ្យដឹងផងដែរថា ឡជីវឧស្ម័នបានដើរតួនាទីយ៉ាងសំខាន់ក្នុងផលិតកម្មចិញ្ចឹមសត្វទំពារអៀង (គោ ក្របី ចៀម និងពពែ) និងសត្វជ្រូកផងដែរ តាមរយ:ការប្រើប្រាស់ថាមពលកកើតឡើងវិញបានពីលាមកសត្វ ចេញជាចំហេះសម្រាប់ចំអិនអាហារ ភ្លើងបំភ្លឺលំនៅឋាន កាកសំណល់ឡជាជីធម្មជាតិមានគុណប្រយោជន៍សម្រាប់ផលិតកម្មបន្លែ និងឈើហូបផ្លែ។ មិនតែប៉ុណ្ណោះ ឡជីវឧស្ម័នបានចូលរួមកាត់ បន្ថយ និងលុបបំបាត់ពពួកបរ៉ាសិតដែលមាននៅក្នុងលាមកសត្វ និងរក្សាបរិស្ថាន (ក្លិន) ក្នុងភូមិ ឋាន និងក្នុងកសិដ្ឋានបានល្អ និងជាពិសេសជួយកាត់បន្ថយការបំភាយឧស្ម័នផ្ទាំងកញ្ចក់ចូលទៅក្នុងបរិយាកាស ហើយនេះគឺជាកត្តាសំខាន់មួយដែលធ្វើឲ្យមានការប្រែប្រួលអាកាសធាតុ ។
លោកបន្តថា ទាំងថាមពល និងកាកសំណល់បានពីឡជីវឧស្ម័ន បានចូលរួមចំណែកលើកកម្ពស់កម្រិតជីវភាពរបស់ប្រជាកសិករនៅជនបទបានយ៉ាងល្អប្រសើរតាមរយ:ការកាត់បន្ថយការប្រើប្រាស់ថាមពល អគ្គីសនី ប្រេងឥន្ធន: ការកាប់បំផ្លាញឈើសម្រាប់ធ្វើអុស និងព្យូង និងជីគីមីប្រើលើដំណាំ ៕
ចែករំលែកព័តមាននេះ