ខេត្តបន្ទាយមានជ័យ ៖ នៅថ្ងៃទី១៨ ខែមិថុនា ឆ្នាំ២០២១នេះក្រុមជួញដូរគ្រឿងញៀន ទាំង៨នាក់ ត្រូវបានបញ្ជូនទៅតុលាក្រោយពី កម្លាំងនគរបាលខេត្តបន្ទាយមានជ័យ និងនគរបាលខេត្តបាត់ដំបង សហការគ្នា…
ខេត្តបន្ទាយមានជ័យ ៖ នៅថ្ងៃទី១៨ ខែមិថុនា ឆ្នាំ២០២១នេះក្រុមជួញដូរគ្រឿងញៀន ទាំង៨នាក់ ត្រូវបានបញ្ជូនទៅតុលា
ក្រោយពី កម្លាំងនគរបាលខេត្តបន្ទាយមានជ័យ និងនគរបាលខេត្តបាត់ដំបង សហការគ្នា ឆ្មក់បង្ក្រាបឃាត់ខ្លួនបានជាបន្តបន្ទាប់ និងដកហូតបានថ្នាំញៀនជាង៣០គីឡូក្រាម ខណៈពួកគេកំពុងធ្វើសកម្មភាពជួញដូរគ្រឿងញៀនទ្រង់ទ្រាយធំ នៅក្រុងប៉ោយប៉ែត-ស្រុកម៉ាឡៃ ជាតំបន់ជាប់ព្រំដែនកម្ពុជាថៃ ។
ប្រតិបត្តិការនេះ មុនដំបូងឡើយ មន្ត្រីនគរបាលជំនេញ ខេត្តបន្ទាយមានជ័យ និងមន្ត្រីនគរបាលខេត្តបាត់ដំបង សហការណ៍គ្នា ចុះស្រាវជ្រាវចាប់ជនសង្ស័យ ក្នុងករណីគ្រោះថ្នាក់ចរាចរណ៍នោះទេ ជនបង្កបានបើករថយន្តបុកមនុស្សស្លាប់ នៅបាត់ដំបង បន្ទាប់មកជនបង្ក រត់មកលាក់ខ្លួននៅក្រុងប៉ោយប៉ែត ប៉ុន្តែកម្លាំងជំនាញបែរ រកឃើញប៉ះចំក្រុមឧក្រិដ្ឋជនជួញដូរគ្រឿងញឿនទ្រង់ទ្រាយធំទៅវិញ ដូចជាការរកអុសប្រទះចង្ក្រានហ្គាសដូច្នោះដែរ ។
ករណីបង្ក្រាបបទល្មើសគ្រឿងញៀន២ករណី នៅជាយដែនកម្ពុជាថៃ ដឹកនាំចុះបង្ក្រាបផ្ទាល់ដោយលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងដោយមានការដឹកនាំសម្របសម្រួលពីលោក កើត វណ្ណារ៉េត ព្រះរាជអាជ្ញានៃអយ្យកាអមសាលាដំបូងខេត្តបន្ទាយមានជ័យ និងលោក កែវ សុជាតិ ព្រះរាជអាជ្ញានៃអយ្យកាអមសាលាដំបូងខេត្តបាត់ដំបង ។
លោកវរសេនីយ៍ឯក ធិន ស៊ិនដេត ស្នងការរងទទួលការងារប្រឆាំងគ្រឿងញៀន បានឲ្យដឹងថា ប្រតិបត្តិការបង្ក្រាបករណីទី១ នៅព្រឹកថ្ងៃទី១៦ ខែមិថុនា ឆ្នាំ២០២១ កម្លាំងសមត្ថកិច្ចបានចុះបង្ក្រាបជនសង្ស័យបាន៤នាក់ និងដកហូតបានថ្នាំញៀន៣៣គីឡូក្រាម នៅក្នុងផ្ទះល្វែងមួយកន្លែង ផ្លូវទៅវត្តគោកស្បែង ស្ថិតក្នុងភូមិគីឡូម៉ែត្រ៤ សង្កាត់ផ្សារកណ្តាល ក្រុងប៉ោយប៉ែត ។
ជនសង្ស័យដែលសមត្ថកិច្ចឃាត់ខ្លួនមាន ៖
ទី១. ឈ្មោះ រ៉ុង យ៉ីហាក់ ភេទប្រុស អាយុ៣៦ឆ្នាំ
ទី២. ឈ្មោះ រ៉ុង គីមហ៊ាង ភេទប្រុស អាយុ៣៩ឆ្នាំ ជនសង្ស័យ២នាក់រស់នៅភូមិគីឡូម៉ែត្រលេខ៤ សង្កាត់ ក្រុងប៉ោយប៉ែត ទី៣. ឈ្មោះ សុខ សេថា ភេទប្រុស អាយុ២៣ឆ្នាំ
និងទី៤. ឈ្មោះ វ៉ាន់ ឈីដា ភេទស្រី អាយុ២៨ឆ្នាំ (ជនជាតិថៃ) ។
ការឆែកឆេរក្នុងផ្ទៈរកឃើញវត្ថុតាងរឹបអូសមាន ៖ ១. ម្ស៉ៅក្រាម សង្ស័យសាធាតុញៀនចំនួន៣៣កញ្ចប់ធំ ២. ម្ស៉ៅក្រាមសថ្លាសង្ស័យសាធាតុញៀនចំនួន៥ថង់ ៣. ថ្នាំច្រកពណ៌ផ្កាឈូក(រាងបេះដូង) ២កូនថង់ ៤. ថ្នាំគ្រាប់ពណ៌ក្រហមរាងមូល១ថង់២គ្រាប់ ៥. ថ្នាំច្រកថង់ពណ៌ខៀវ២កញ្ចប់ ៦. ថ្នាំគ្រាប់ពណ៌ត្រួចចេករាងចតុកោណ២ថង់ ៧. ជញ្ជីងថ្លឹងថ្នាំញៀនចំនួន២គ្រឿង ៨. មធ្យោបាយដឹកជញ្ចូនរថយន្ត១គ្រឿងម៉ាក់ហាយឡេនឌឺ ពាក់ផ្លាក់លេខបន្ទាយមានជ័យ 2C.3186 ៩. ម៉ូតូ(កង់៤) ចំនួន១គ្រឿង ។
លោកវរៈសេនីយ៍ឯក ធិន ស៊ិនដេត បានបញ្ជាក់ថា បានបន្តចុះប្រតិបត្តិការបង្ក្រាបករណីទី២-នៅរសៀលថ្ងៃទី១៦ ខែមិថុនា ឆ្នាំ២០២១ ដោយយោងតាមចម្លើយសារភាពជនសង្ស័យទាំង៤ បានឲ្យដឹងថា ថ្នាំញៀនទាំងនេះ ពួកគេទិញពីឈ្មោះ ឡេង គឹមឡាយ ភេទប្រុស អាយុ៥៥ឆ្នាំ មានផ្ទះនៅភូមិថ្មី ឃុំ.ស្រុកស្រុកម៉ាឡៃ ហើយភ្លាមៗនោះលោកក៏បានដឹកនាំកម្លាំងចុះទៅឡោមព័ទ្ធផ្ទះជនសង្ស័យ ហើយក៏ឃាត់ខ្លួនបាន មនុស្សប្រុសស្រី៤នាក់បន្ថែមទៀត រួមមាន ៖
ទី១. ឈ្មោះ គួន ស្រីឡាន់ ភេទស្រី អាយុ៣៣ឆ្នាំ
ទី២. ឈ្មោះ សេង ស្រីនិ ភេទស្រី អាយុ២៣ឆ្នាំ
ទី៣. ឈ្មោះ ឡុង សំរិទ្ធ ភេទប្រុស អាយុ៣០ឆ្នាំ
និងទី៤. ឈ្មោះ ហែម វ៉ាន់លី ភេទប្រុស អាយុ៥៥ឆ្នាំ ។
កម្លាំងធ្វើការឆែកឆេរក្នុងផ្ទៈរកឃើញវត្ថុតាងរឹបអូសមាន ៖ ១. ថ្នាំញៀនទឹកប្រភេទដបចំនួន៥ប្រអប់ ស្មើ១២៥ដប ២. ថ្នាំញៀនប្រភេទគ្រាប់ចំនួន៦៣គ្រាប់ ៣. ថ្នាំញៀនប្រភេទគ្រាប់ពណ៌ក្រហម ចំនួនប៥៥គ្រាប់ ៤. ថ្នាំញៀនគ្រាប់ពណ៌ខៀវចំនួន៨គ្រាប់ ៥. ថ្នាំញៀនប្រភេទម្ស៉ៅក្រាមសថ្លា១កញ្ចប់ និង១កូនថង់តូច ៦. អាវុធខ្លីម៉ាក់ឡុក១ដើមមាន១៦គ្រាប់ ៧.រថយន្តតូយូតាប្រូស១គ្រឿង ។
ដោយឡែក ជនសង្ស័យជាមេឧក្រិដ្ឋជនគ្រឿងញៀនឈ្មោះ ឡេង គឹមឡាយ ដែលកំពុងរត់គេចខ្លួនកម្លាំងបានធ្វើការស្រាវជ្រាវដើម្បីចាប់ខ្លួនចាត់ការតាមច្បាប់ ។
លោកស្នងការនគរបាលខេត្តបន្ទាយមានជ័យ ក៏បានបញ្ជាក់ដែរថា ប្រតិបត្តិការបង្ក្រាបបទល្មើសគ្រឿងញៀន២ករណី ជាប់ជាយដែន នៅភូមិសាស្គ្រស្រុកម៉ាឡៃ និងក្រុងប៉ោយប៉ែត ដែលឃាត់ខ្លួនជនសង្ស័យចំនួន៨នាក់(ស្រី៣នាក់) និងវត្ថុតាងគ្រឿងញៀនប្រមាណជាង៣០គីឡូក្រាម ក្រោយពេលសាកសួរចម្លើយ និងវត្ថុតាងគ្រឿងញៀន ត្រូវរៀបចំសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ៕
ចែករំលែកព័តមាននេះ