ក្មេងស្រីតូចអាយុ៤ខែ ត្រូវបានគេចាត់ទុកថា ជាមនុស្សអច្ឆរិយៈដោយសារនៅរស់ពីការកប់ក្នុងគំនរឈើបាក់បែក អត់ចំណីអាហាររយៈពេល៤ថ្ងៃ នៅតំបន់ភាគឦសានប្រទេសជប៉ុន ដែលរងគ្រោះធ្ងន់ធ្ងរដោយសារការរញ្ជួយដីដ៏ខ្លាំងមួយកម្រិត៨,៩រិចស្ទ័រ បង្កឱ្យកើតមានរលកយក្សស៊ូណាមី កាលពីថ្ងៃទី១១ មីនា កន្លងមក ។ ក្មេងស្រីនេះបានរបូតធ្លាក់ចេញពី ម្តាយនៅពេលម្តាយរបស់គេព្យាយាមរត់គេចពីរលកយក្សស៊ូណាមី តាំងពីថ្ងៃដំបូងនៃការរញ្ជួយដីនេះធ្វើឱ្យគេធ្លាក់លើដីកប់ទឹក ហើយកម្ទេចឈើធ្លាក់ពីលើ ។
ក្មេងស្រីនេះទើបរកឃើញកាលពីល្ងាចថ្ងៃទី១៤ មីនា កន្លងមក នៅពេលក្រុមអ្នកជួយសង្គ្រោះ និងទាហានរុករកតាមគំនរបាក់បែកដើម្បីជួយសង្គ្រោះអ្នកនៅរស់ ។ មុនពេលមានការឈានទៅធ្វើការសង្គ្រោះនេះ គឺនៅវេលាសុរិយារៀបអស្តង្គតទៅហើយ ស្រាប់តែមានឮសម្លេងហាក់ដូចជាក្មេងស្រែកយំ ទាហាននៃកងកម្លាំងការពារជាតិជប៉ុន និងក្រុមអ្នកជួយសង្គ្រោះបាននាំគ្នាធ្វើដំណើរសំដៅទៅ កាន់កន្លែងឮសំឡេងនោះ បន្ទាប់មកក៏រើគំនរឈើបាក់បែកចេញស្រាប់តែឃើញក្មេងស្រីតូចនេះស្ថិតក្នុងស្ថានភាពគួរឱ្យសង្វេគបំផុត ។ ក្មេងស្រីនេះត្រូវបានគេចាត់ទុកថា ជាមនុស្សអច្ឆរិយៈ ហើយបានជួបជុំឪពុកម្តាយរបស់គេវិញ។
គេឆ្ងល់ណាស់ថា ហេតុអ្វីជាក្មេងស្រីនេះមិនលង់ទឹកស្លាប់ ព្រោះនៅពេលនាងធ្លាក់ចេញពីដៃម្តាយរបស់នាងគឺធ្លាក់ចូលក្នុងទឹក ហើយកប់ក្រោមគំនរឈើទៀត ។ ហេតុការណ៍នេះធ្វើឱ្យមនុស្សផងទាំងឡាយមានការភ្ញាក់ផ្អើលយ៉ាងខ្លាំង ព្រោះជារឿងកម្រជួបប្រទះបំផុត ។ ក្រោយពីរកឃើញ ទាហានបានយកនាងតូចទៅមុជទឹកឱ្យយ៉ាងស្អាត បន្ទាប់មកយកកន្សែងពោះគោរុំបង្កើននូវភាពកក់ក្តៅ។ ក្មេងស្រីនេះមិនត្រឹមតែមិនលង់ទឹកប៉ុណ្ណោះទេ ថែមទាំងពុំមានរងរបួសទៀតផង ជាហេតុធ្វើឱ្យហេតុការណ៍របស់នាងត្រូវបានគេចាត់ទុកថា ជារឿងអាថ៌កំបាំងមួយ ។ ការរកឃើញក្មេងស្រីនេះបានផ្តល់ក្តីសង្ឃឹមថា នឹងរកឃើញអ្នកនៅរស់ច្រើននាក់ទៀត ដែលកប់ក្នុងគំនរបាក់បែក ។
មុននេះបុរសវ័យចំណាស់ម្នាក់ត្រូវបានជួយសង្គ្រោះក្រោយពីត្រូវរលកស៊ូណាមីបក់បោកទៅកណ្តាលសមុទ្ររយៈពេល៣ថ្ងៃ ។
- ធនាគារជប៉ុនផ្តល់ប្រាក់ឧបត្ថម្ភលើផលប៉ះពាល់នៃការរញ្ជួយដី
ធនាគារជប៉ុន(BOJ) បានបញ្ចេញប្រាក់យ៉ាងច្រើនជាប្រវត្តិសាស្ត្រ រួមទាំងបង្កើនកម្មវិធីទិញទំនិញទ្វេដងដើម្បីការពារសេដ្ឋកិច្ចពីផលប៉ះពាល់នៃការរញ្ជួយដីដ៏អាក្រក់នៅក្នុងប្រទេស ។ តាមរបាយការណ៍របស់«ប្លូមប៊ើក» ផ្សាយថា ធនាគារ BOJ ត្រៀមចំណាយប្រាក់១៥លានលានយេន ឬប្រហែល១,៨៣សែនលានដុល្លារចូលទីផ្សារហិរញ្ញវត្ថុ ដើម្បីការពារស្ថិរភាពនៃការធ្លាក់ចុះរបស់ទីផ្សារភាគហ៊ុន និងការកើនឡើងភាពប្រថុយប្រថានក្នុងការបញ្ចេញប្រាក់កម្ចី ។ លើសពីនេះ លោកសាអាគី ឈីរ៉ាកាវា ទេសាភិបាលធនាគារជប៉ុន បានយល់ស្របឱ្យបង្កើនប្រាក់បង្វិលបង្កភាពងាយស្រួលសម្រាប់ការទិញទំនិញដល់ទៅ១០លានលានយេន ។
គួរបញ្ជាក់ថា មានការព្យាករណ៍ទុកថា អ្នកស្លាប់បាត់បង់ជីវិតពីគ្រោះធម្មជាតិលើកនេះអាចកើនឡើងដល់ទៅ១ម៉ឺននាក់ ខណៈពេលមានមនុស្សស្នាក់នៅជំរំភៀសខ្លួនបណ្តោះអាសន្នប្រហែល៣៥០.០០០នាក់ ។ តាមរបាយការណ៍របស់នាយកដ្ឋានប៉ូលិសជាតិប្រទេសជប៉ុនបញ្ជាក់ថា បច្ចុប្បន្នគេប្រទះឃើញមានអ្នកស្លាប់ចំនួន១.៥៩៧នាក់ បាត់ខ្លួន១.៤៨១នាក់ និងរបួស១.៦៨៣នាក់ ។
- ប្រទេសនៅអាស៊ីត្រួតពិនិត្យម្ហូបអាហារដែលនាំចូលពីប្រទេសជប៉ុន
តាមទីភ្នាក់ងារ AFP ផ្សាយឱ្យដឹងថា រដ្ឋាភិបាលនៃប្រទេសជាច្រើននៅអាស៊ីរួមទាំងហុងកុង ម៉ាឡេស៊ី ហ៊្វីលីពីន សិង្ហបុរី និងតៃវ៉ាន់ បានបញ្ជាឱ្យធ្វើការត្រួតពិនិត្យអាហារដែលនាំចូលពីប្រទេសជប៉ុន ថាតើមានសារធាតុវិទ្យុសកម្មលាយឡំឬអត់ ? ទោះជាបែបណា អ្នកនាំពាក្យអង្គការសុខភាពពិភពលោក(WHO) បញ្ជាក់ថា ដូចដែលទិន្នន័យទទួលបានគឺមានភាពប្រឈមមុខពីកាំរស្មីវិទ្យុសកម្មដែលធ្វើឱ្យប៉ះពាល់ដល់សុខភាពប្រជាជនតិចតួចបំផុត ព្រោះថា ការបែកធ្លាយមានកម្រិតទាប និងប្រជាជនបានភៀសខ្លួនចេញពីតំបន់គ្រោះថ្នាក់ទាន់ពេលវេលា។
- ក្រុមហ៊ុនផលិតទំនិញនានានៅប្រទេសជប៉ុនផ្អាកសកម្មភាពបណ្តោះអាសន្ន
ក្រុមហ៊ុនផលិតទំនិញជាច្រើននៅប្រទេសជប៉ុន ដូចជា ក្រុមហ៊ុនសូនី និងតូយ៉ូតា បានចេញបញ្ជាបិទរោងចក្ររបស់ខ្លួន ក្រោយពីការរញ្ជួយដីដ៏ធ្ងន់ធ្ងរជាប្រវត្តិសាស្ត្រវាយប្រហារប្រទេសជប៉ុន បង្កឱ្យមានការខូចខាតដល់ប្រភពផលិតទំនិញ និងរោងចក្រអគ្គិសនីបណ្តាលឱ្យមានកង្វះខាតចរន្ត ។ លោកអាត ស៊ូអូ អូម៉ាការី អ្នកនាំពាក្យក្រុមហ៊ុនសូនី របស់ជប៉ុនបង្ហើបឱ្យដឹងថា ក្រុមហ៊ុនសូនីដែលជាអ្នកនាំចេញទំនិញអេឡិចត្រូនិកដ៏ធំរបស់ជប៉ុនបានបញ្ជាឱ្យបិទរោងចក្រចំនួន៣កន្លែង។ ចំណែកក្រុមហ៊ុនតូយ៉ូតា ក៏ប្រកាសបិទទីតាំងផលិតដល់ទៅ១២កន្លែងនៅក្នុងប្រទេសជប៉ុនដែរ ខណៈពេលក្រុមហ៊ុនហុងដា បានបញ្ជាក់ថា នឹងបិទទីតាំងផលិតនៅក្នុងទីក្រុងចំនួន៤ ។
- សិង្ហបុរី និងតៃវ៉ាន់ ត្រួតពិនិត្យអាហារនាំចូលពីជប៉ុន បារម្ភពីសារធាតុវិទ្យុសកម្មដោយសារការផ្ទុះចង្ក្រានរ៉េអាក់ទ័រ
ទីភ្នាក់ងារ AFP ផ្សាយថា ប្រទេសសិង្ហបុរី និងកោះតៃវ៉ាន់ ធ្វើការត្រួតពិនិត្យអាហារនាំចូលពីប្រទេសជប៉ុន យ៉ាងតឹងរ៉ឹង ដើម្បីឱ្យមានភាពប្រាកដប្រជាថា គ្មានឡូកឡំនឹងកាំរស្មីវិទ្យុសកម្ម បន្ទាប់ពីចង្ក្រានរ៉េអាក់ទ័រ នៅរោងចក្រអគ្គិសនីរ៉េអាក់ទ័រ ហ្វូគូឈីម៉ា ផ្ទុះកាលពីថ្ងៃទី ១២ មីនា កន្លងទៅ ។ នៅក្នុងសេចក្តីថ្លែងការណ៍របស់ AVA បញ្ជាក់ថា «ដើម្បីបង្ការការឆ្លង អង្គការស្បៀងអាហារ និងបសុសត្វសិង្ហបុរី (AVA) ចាំបាច់ធ្វើការត្រួតពិនិត្យផលិតផលម្ហូបអាហារពីប្រទេសជប៉ុន ព្រោះនៅឯប្រភពផលិតប្រឈមមុខនឹងការឡូកឡំសារធាតុវិទ្យុសកម្ម។ យើងនឹងយកគំរូអាហារទៅត្រួតពិនិត្យសារធាតុវិទ្យុសកម្ម ជាពិសេសអាហារឆៅ ហើយ AVA នឹងធ្វើការតាមដានស្ថានភាពក្នុងប្រទេសជប៉ុនយ៉ាងដិតដល់» ។
AVA បង្ហើបឱ្យដឹងថា អាហារពីប្រទេសជប៉ុន ភាគច្រើនត្រូវនាំចូលតាមនាវា ប៉ុន្តែភោជនីយដ្ឋាននៅប្រទេសជប៉ុនមួយចំនួន នឹងប្រើការដឹកជញ្ជូនតាមផ្លូវអាកាសដូចជាត្រីស្រស់ជាដើម។ ប្រទេសសិង្ហបុរីមានភោជនីយដ្ឋានជប៉ុន យ៉ាងច្រើន ព្រោះជាប្រភេទម្ហូបអាហារមានការពេញនិយមយ៉ាងខ្ពស់ ។ កាលពីឆ្នាំមុន សិង្ហបុរីបាននាំចូលទំនិញពីជប៉ុនមានតម្លៃប្រហែល៣៣.៣០០លានដុល្លារសិង្ហបុរី គឺជាង២,៥ម៉ឺនដុល្លារអាមេរិក ។ ស្របពេលជាមួយគ្នានេះដែរ នៅតៃវ៉ាន់ក៏ត្រៀមត្រួតពិនិត្យម្ហូបអាហារនាំចូលពីជប៉ុនដូចគ្នា ដោយបច្ចុប្បន្នកំពុងស្ថិតក្នុងដំណាក់កាលត្រួតពិនិត្យផលិតផលម្ហូបអាហារយ៉ាងដិតដល់ ។
- កំរិតវិទ្យុសកម្មមានខ្ពស់ជាងធម្មតាវាស់ឃើញនាព្រឹកថ្ងៃ១៥មីនា នៅក្រុងតូក្យូ
នាវេលាម៉ោង៧ព្រឹក ថ្ងៃទី១៥ មីនា តម្លៃភាគហ៊ុននៅក្រុងតូក្យូបានធ្លាក់ចុះដល់ទៅ១០,៥៥% ព្រោះពួកអ្នកវិនិយោគមានការព្រួយបារម្ភជ្រួលច្របល់ដោយសារការកើនឡើងនៃវិបត្តិនុយក្លេអ៊ែរក្រោយការរញ្ជួយដី។ នាវេលាម៉ោង៥ព្រឹក កំរិតវិទ្យុសកម្មខ្ពស់ខុសពីធម្មតាត្រូវបានវាស់ឃើញនៅក្រុងតូក្យូ។ នេះជាការប្រកាសរបស់សាលាក្រុងដោយបញ្ជាក់ថា កំរិតនេះនៅខ្សោយខ្លាំងនៅឡើយទេ ពុំទាន់អាចប៉ះពាល់ដល់សុខភាពមនុស្សឡើយ។ នាព្រឹកថ្ងៃទី១៥ មីនា នោះដែររេអាក់ទ័រទី៤នៃមជ្ឈមណ្ឌលនុយក្លេអ៊ែរ ហ្វូគូស៊ីម៉ាទី១ដែលភ្លើងឆេះហាក់ដូចជាត្រូវបានពន្លត់ហើយ។ យោងតាមម៉ាស៊ីនឃោសនាជប៉ុនជាច្រើនថា ពួកអ្នកពន្លត់ភ្លើងអះអាងពីការបញ្ចប់គ្រោះអគ្គីភ័យ នេះ។
ចំណែកឯស្ថានទូតបារាំងប្រចាំប្រទេសជប៉ុនបានបដិសេធអំពីរឿងដែលថា មានពពកវិទ្យុសកម្មបោកបក់សំដៅឆ្ពោះមកកាន់តំបន់ក្រុងតូក្យូ ដោយអះអាងថា ទីក្រុងដ៏ធំបំផុតលើពិភពលោកនោះពុំរងការគំរាមកំហែងដោយវិទ្យុសកម្មឡើយ។ ការព្យាករណ៍ឧតុនិយមគូសបញ្ជាក់ថា ខ្យល់កំពុងតែគួចវិល។
នាយករដ្ឋមន្ត្រីជប៉ុន លោកណាអូតូ កានថ្លែងថា កំរិតវិទ្យុសកម្មមានការកើនឡើងខ្ពស់នៅមជ្ឈមណ្ឌលនុយក្លេអ៊ែរហ្វូគូស៊ីម៉ាទីមួយជាកន្លែងមានអគ្គីភ័យមួយកើតឡើងនៅរេអាក់ទ័រទី៤។ អត្រាវិទ្យុសកម្មមានខ្ពស់លើសពីធម្មតាត្រូវបានវាស់ហើយនៅក្រុងអ៊ីបារ៉ាគី ស្ថិតនៅចន្លោះតំបន់ហ្វូគូស៊ីម៉ាដែលមានមជ្ឈមណ្ឌលនុយក្លេអ៊ែរមួយកំពុងរងការខូចខាតដោយការរញ្ជួយដី និងក្រុងតូក្យូ។ ទីភ្នាក់ងារព័ត៌មានក្យូដូរាយការណ៍ថា ទីក្រុងអ៊ីបារ៉ាគី ស្ថិតនៅចម្ងាយជាង១០០គីឡូម៉ែត្រភាគឥសានក្រុងតូក្យូ។ នាវេលាម៉ោង៦ព្រឹក ថ្ងៃទី១៥ មីនា មានការផ្ទុះរេអាក់ទ័រទី២ នៃមជ្ឈមណ្ឌលនុយក្លេអ៊ែរ ហ្វូគូស៊ីម៉ាទីមួយ។ ប្រទេសជប៉ុនបានស្នើជំនួយពីសហរដ្ឋអាមេរិក និងទីភ្នាក់ងារថាមពលបរមាណូអន្តរជាតិក្រោយកើតមានបញ្ហានៃការផ្ទុះ និងឆេះរេអាក់ទ័រនៅឯមជ្ឈមណ្ឌលនុយក្លេអ៊ែរហ្វូគូស៊ីម៉ាដើម្បីបង្ការគ្រោះមហន្តរាយនៃវិទ្យុសកម្ម ៕
ចែករំលែកព័តមាននេះ