ទីភ្នាក់ងារព័ត៌មានចិនស៊ីនហួនៅថ្ងៃទី២៣ មីនា រាយការណ៍ថា បណ្តាញភ្លើងអគ្គិសនីនៅម៉ាស៊ីនរេអាក់ទ័រទាំង៦របស់រោងចក្រថាមពលនុយក្លេអ៊ែរហ្វូគូស៊ីម៉ារបស់ជប៉ុនដែលរងប៉ះពាល់ដោយការរញ្ជួយដីដ៏ខ្លាំងមួយកម្រិត៩រីស្ទ័រ បង្កឱ្យកើតមានរលកយក្សស៊ូណាមី ដែលវាយប្រហារភាគឦសានប្រទេសជប៉ុនកាលពីថ្ងៃទី១១ មីនា កន្លងមក ត្រូវបានតភ្ជាប់ឡើងវិញអស់ហើយដោយបង្កលក្ខណៈកាន់តែងាយស្រួល សម្រាប់ដំណើរការឡើងវិញនូវប្រព័ន្ធត្រជាក់សំខាន់សម្រាប់ម៉ាស៊ីនរេអាក់ទ័រទាំងនោះ ។
ម៉ាស៊ីនរេអាក់ទ័រទី៣ ក្នុងចំណោមម៉ាស៊ីនរេអាក់ទ័រទាំង៦ ដែលរងប៉ះពាល់ធ្ងន់ធ្ងរជាងគេ ដោយសារការរញ្ជួយដីនោះត្រូវបានតភ្ជាប់ភ្លើងអគ្គិសនីក្រោយគេ ដោយប្រព័ន្ធផ្គត់ផ្គង់អគ្គិសនីពីខាងក្រៅ។
ម៉ាស៊ីនរេអាក់ទ័រទាំងនោះនឹងទទួលថាមពលពីប្រភពថាមពលឯករាជ្យជាជំហានសំខាន់ឆ្ពោះទៅរកការធ្វើឱ្យប្រព័ន្ធត្រជាក់របស់ម៉ាស៊ីនរេអាក់ទ័រទាំង៦ដំណើរការវិញដោយស្វ័យប្រវត្តិ។កិច្ចខិតខំប្រឹងប្រែងបញ្ចុះកំដៅបំពុងប្រេងម៉ាស៊ីនរេអាក់ទ័រនៅរោងចក្រនុយក្លេអ៊ែរហ្វូគូស៊ីម៉ា បន្តឡើងវិញ កាលពីរសៀលថ្ងៃទី២២ មីនា ដោយអ្នកពន្លត់អគ្គីភ័យបាញ់ទឹកជាច្រើនតោនដាក់បំពុងប្រេងម៉ាស៊ីនរេអាក់ទ័រទី៣ ។
អ្នកនាំពាក្យទីភ្នាក់ងារសុវត្ថិភាពនុយក្លេអ៊ែររបស់រដ្ឋាភិបាលជប៉ុន លោក Hidehiko Nishiyama ថ្លែងប្រាប់សន្និសីទកាសែតមួយថា ការតភ្ជាប់ប្រព័ន្ធអគ្គិសនីនៅម៉ាស៊ីនរេអាក់ទ័រទាំងនោះឡើងវិញ ធ្វើឱ្យស្ថានការណ៍នៅរោងចក្រនុយក្លេអ៊ែរហ្វូគូស៊ីម៉ាកាន់តែល្អប្រសើរ។
អាជ្ញាធរក្រុងតូក្យូនិយាយថា ការតភ្ជាប់ឡើងវិញនូវបណ្តាភ្លើងអគ្គិសនីនៅម៉ាស៊ីនរេអាក់ទ័រទាំង៦នោះជាសញ្ញាជួយធ្វើឱ្យស្ងប់ស្ងាត់ដល់ការភ័យខ្លាចពីសារធាតុវិទ្យុសកម្ម ៕
ចែករំលែកព័តមាននេះ