ខេត្តបន្ទាយមានជ័យ ៖ មន្ត្រីសាខា ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ក.ប.ប. ខេត្តបន្ទាយមានជ័យ នៅថ្ងៃព្រហស្បតិ៍ ថ្ងៃទី១៧ ខែមិថុនា ឆ្នាំ២០២១ បានធ្វើការបំផ្លាញស្រាថ្នាំចិនសែយីហោ «តាំង គួយ» ចំនួន ២,៣១៣យួរ ស្មើ ២៧,៧៥៦ដប ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ក្រោមអធិបតីភាពលោកស្រី រស់ សុផានី អភិបាលរង នៃគណៈអភិបាលខេត្តបន្ទាយមានជ័យ ព្រមទាំងមានការអញ្ជើញចូលរួមពីលោកព្រះរាជអាជ្ញារង អមសាលាដំបូងខេត្ត មន្ត្រីមន្ទីរពាណិជ្ជកម្មខេត្ត និងមន្ត្រីជាច្រើនរូបទៀត ។
សូមរម្លឹកដែរថា មានពលរដ្ឋច្រើននាក់ បានពុលស្រា ត្រូវបានបញ្ជូនទៅព្យាបាលនៅមន្ទីរពេទ្យ ក្រោយពិសាស្រាថ្នាំប៉ូវកម្លាំង ឈ្មោះ តាំង គួយ កាលពីថ្ងៃទី១១ ខែមិថុនា ឆ្នាំ២០២០ លោក អ៊ុំ រាត្រី អភិបាលខេត្តបន្ទាយមានជ័យ បានបញ្ជាមន្ត្រីពាក់ព័ន្ធ ចុះដកហូតស្រាថ្នាំចិនសែន តាំង គួយ នៅតាមទីតាំងនានា ក្នុងក្រុងសិរីសោភ័ណ និងក្រុងប៉ោយប៉ែត ។ ហើយចេញសេចក្តីជូនដំណឹងដល់អាជីវករទាំងអស់ ផ្អាកលក់ស្រាថ្នាំ តាំង គួយ រហូតដល់មានការជូនដំណឹងថ្មី ។
ស្រាថ្នាំចិនសែ តាំង គួយ បានបណ្តាលឲ្យអ្នកពុល នៅស្រុកម៉ាឡៃ និងក្រុងប៉ោយប៉ែត ខេត្តបន្ទាយមានជ័យ បានកើនរហូតដល់៤១នាក់ហើយ (ស្រី៣នាក់) ក្នុងនោះបានបណ្តាលឲ្យស្លាប់ ៧នាក់ (ជនជាតិថៃ ចំនួន០១នាក់) ។
កាលថ្ងៃទី១២ ខែមិថុនា ឆ្នាំ២០២០ ក្រោយពីបានទទួលព័ត៌មានពីការពុលស្រាថ្នាំចិនសែ នៅខេត្តបន្ទាយមានជ័យ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានកំណត់យកវិធានការចំនួន៣ សម្រាប់បើកយុទ្ធនាការទ្រង់ទ្រាយធំនៅទូទាំងប្រទេស ។
វិធានការណ៍ទី១ បើកការស្រាវជ្រាវ និងស៊ើបអង្កេត កន្លែងកើតហេតុ ស្ថិតនៅក្នុងខេត្តបន្ទាយមានជ័យ ដោយបានសាកសួរព័ត៌មាន និងយកគំរូសំណាក ស្រាថ្នាំចិនសែនេះ មកវិភាគនៅរថយន្តមន្ទីរពិសោធន៍ចល័តផ្នែកម្ហូបអាហារ និងមន្ទីរពិសោធន៍ខា្នតតូចរបស់សាខាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ខេត្តបន្ទាយមានជ័យ។ ជាលទ្ធផលមន្ត្រីជំនាញបានធ្វើតេស្ត រកឃើញសារធាតុមេតាណុល ក្នុងកម្រិតខ្ពស់ជាង០.៣៥% ដែលជាអត្រាខ្ពស់ អាចបណ្ដាលឱ្យស្លាប់បាន ប្រសិនបើទទួលទានច្រើន។
វិធានការណ៍ទី២ មន្ត្រីជំនាញ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានបើកប្រតិបត្តិការបង្ក្រាបទីតាំងផលិត និងចែកចាយស្រាថ្នាំចិនសែនេះ ដោយសហការជាមួយព្រះរាជអាជ្ញា អមសាលាដំបូងរាជធានីភ្នំពេញ ស្នើសុំបើកទីតាំងផលិត ដើម្បីស្វែងរកវត្ថុតាង និងរឹបអូសផលិតផលស្រាថ្នាំចិនសែទាំងនោះ ។
វិធានការណ៍ទី៣ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានបញ្ជាឱ្យសាខា ក.ប.ប. រាជធានី-ខេត្ត ទាំងអស់ប្រមូលត្រលប់មកវិញ នូវស្រាថ្នាំចិនសែយីហោ «តាំង គួយ» ដែលមានការសង្ស័យ មានហានិភ័យដល់សុខភាព និងគ្រោះថ្នាក់ដល់អាយុជីវិត ដល់អ្នកប្រើប្រាស់ ។
របាយការណ៍បណ្តោះអាសន្ន ប្រតិបត្តិការទូទាំងប្រទេសមន្ត្រីជំនាញ នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានរឹបអូសបានស្រាថ្នាំចិនសែយីហោ «តាំង គួយ» បានចំនួន១៣,៩៨៩ ដប ស្នើនឹង៦,៩៩៤.៥០លីត្រ។
រហូតដល់ថ្ងៃទី១២ ខែមិថុនា ឆ្នាំ២០២០ អធិការនគរបាលខណ្ឌជ្រោយចង្វារលោក សៀម សុត្ថាវុធ បានអោយដឹងថា កម្លាំងសមត្ថកិច្ច បានចុះបិទតាំងផលិតស្រា ស្លាកយីហោ តាំងគួយ នៅព្រឹកមិញនេះ ។ ដោយឡែកម្ចាស់ទីតាំងវិញ លោកថា បានរត់គេចខ្លួនតាំងពី ឮដំណឹងមានអ្នកស្លាប់មកម្លេះ ។
លោក សៀម សុត្ថាវុធ ប្រាប់យ៉ាងដូច្នេះថា «អត់មានឃាត់ខ្លួនមនុស្សទេ គាត់រត់ចេញពីផ្ទះពីរ ទៅបីថ្ងៃហើយ ចាក់សោរផ្ទះចោល ។ បាទ! បិទហើយទីតាំងនោះ ព្រឹកមិញ ព្រះរាជអាជ្ញា គាត់ចុះមកធ្វើការជាមួយមូលដ្ឋានយើង ។ យើងអត់មានបានរកឃើញអីទេ គឺរកឃើញតែសំបកដបពាក់ព័ន្ធ នឹងការផលិត» ៕
ចែករំលែកព័តមាននេះ