រាជធានីភ្នំពេញ៖បច្ចុប្បន្ន កម្ពុជាបានចាត់ទុកដំឡូងមីគឺជាដំណាំសំខាន់ទី២ បន្ទាប់ពីដំណាំស្រូវសម្រាប់ផ្គត់ផ្គង់ឱ្យទីផ្សារក្នុងស្រុកនិងនាំចេញ ហើយក្រៅពីប្រើប្រាស់ក្នុងស្រុកកម្ពុជានៅអាចនាំចេញដំឡូងមីក្នុងមួយឆ្នាំមានទឹកប្រាក់រហូតដល់៤លានដុល្លារអាមេរិក ខណៈការដាំដុះដំឡូងមីនៅក្នុងស្រុកនិងថ្នាក់តំបន់រងផលប៉ះពាល់ពីរីករាលដាលឆ្លងនៃជំងឺ។
យោងលើរបាយការណ៍របស់អគ្គនាយកដ្ឋានកសិកម្មកាលពីថ្ងៃទី១៦មិថុនាឱ្យដឹងថា នៅឆ្នាំ២០២០ កម្ពុជាមានផ្ទៃដីដាំដុះដំឡូងមីសរុបចំនួន ៦៦៣.៩២៩ហិកតា ហើយអាចផ្តល់ទិន្នផលសរុបជាង ១២លានតោន និងទទួលបានទិន្នផលជាមធ្យមចំនួន ២០,៥៥តោនក្នុងមួយហិកតា។ ក្រៅពីការ ប្រើប្រាស់ក្នុងស្រុក កម្ពុជាបាននាំចេញដំឡូងមីស្រស់ ម្សៅដំឡូងមី ចំណិតដំឡូងមីស្ងួតគិតជាទឹកប្រាក់ប្រមាណពី ៣,៥០លានដុល្លារ ទៅ ៤ លានដុល្លារអាមេរិកក្នុងមួយឆ្នាំ។
ឯកឧត្តម វេង សាខុនរដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទធ្លាប់បានបង្ហាញថា គិតត្រឹមរយៈពេល៥ខែដើមឆ្នាំ២០២១ កម្ពុជាបាននាំចេញនូវ៖១)- ចំណិតដំឡូងមីក្រៀមមានចំនួនជាង១, ២លានតោនកើនឡើងចំនួន ២១,៥៨% ក្នុងនោះនាំចេញទៅប្រទេសថៃចំនួន ៨២៩. ០៥០ តោន, ប្រទេសវៀតណាមចំនួន ៣៦២. ៦៥១ តោន និងប្រទេសចិនចំនួន ១៩. ៦៥១តោន។
២)- ដំឡូងមីស្រស់ មានចំនួន ៣៣៩ ០០០ តោន (ថយចុះចំនួន -៥,២០%) ក្នុងនោះនាំចេញទៅប្រទេសថៃចំនួន ៦០ ០០០តោន និងប្រទេសវៀតណាមចំនួន ២៧៩ ០០០តោន ៣)-ម្ស៉ៅដំឡូងមីមានចំនួន ១៣. ៤៥៤ តោន កើនឡើងចំនួន ៣០,៩៧% ក្នុងនោះនាំចេញទៅប្រទេសចិនចំនួន ១២. ៨៤១ តោន, ប្រទេសអ៊ីតាលីចំនួន ៣៣,៨៤ តោន, ប្រទេសណេដឺឡេនចំនួន ១១៤ តោន, ប្រទេសថៃចំនួន ២៩៥,៨០ តោន និងសហរដ្ឋអាមេរិកចំនួន ១៧០ តោននិង៤)-កាកសំណល់ដំឡូងមីមានចំនួន ៣ ៧០៨,០០ តោន (ថយចុះចំនួន -៣៣,២៩%) នាំចេញទៅប្រទេសចិន។
បើតាមរបាយការណ៍របស់អគ្គនាយកដ្ឋានកសិកម្មលើកឡើងថា ស្របពេលនឹងកំណើនបរិមាណដំឡូងមីដែលទីផ្សារត្រូវការ និងកំណើនផ្ទៃដីដាំដុះ ដំណាំដំឡូង មីនៅក្នុងតំបន់ ក៏ផ្ទះឡើងនូវជំងឺឆ្លងសំខាន់ ២ប្រភេទគឺ៖ ទី១)- ជំងឺកញ្ចុំស្លឹក (CWBD) ដែលបច្ចុប្បន្នបានរីករាលដាលពាសពេញអាស៊ីអាគ្នេយ៍ នាំឱ្យប៉ះពាល់យ៉ាងខ្លាំងទៅលើគុណភាពដំឡូង កម្រិតជាតិម្សៅ និងទិន្នផលរហូតដល់ទៅ ៩០% ហើយចៀសមិនខានផលិតកម្ម តម្លៃ និងផលិតកម្មកែច្នៃត្រូវតែទទួលរងនូវផលប៉ះពាល់។ ទី២)- ជំងឺវីរុសម៉ូសាអ៊ិក (CMD) កម្ពុជាបានរកឃើញជំងឺនេះជាលើកដំបូងនៅក្នុងឆ្នាំ២០១៥ និងជាបន្តបន្ទាប់វាបានរាលឆ្លងទៅតាមបណ្តាខេត្តចំនួន១២ ក្នុងនោះ ខេត្តរតនគិរី, មណ្ឌលគិរី, ក្រចេះ, ត្បូងឃ្មុំ, ពោធិ៍សាត់, បាត់ដំបង, ព្រះវិហារ, កំពង់ធំ, បន្ទាយមានជ័យ, ឧត្តរមានជ័យ, កំពង់ចាម, និងខេត្តស្ទឹងត្រែង។
របាយការណ៍បានបញ្ចាក់ច្បាស់ថាជំងឺនេះគ្មានថ្នាំការពារ និងកម្ចាត់ទេ វិធានការសមស្រប និងមានប្រសិទ្ធភាពនោះគឺការប្រើប្រាស់ពូជធន់ ពូជត្រូវបានសម្រិតសម្រាំង មានប្រភពច្បាស់លាស់ និងគ្មានជំងឺ។
អគ្គនាយកដ្ឋានកសិកម្ម ក្រោមការជួយឧបត្ថម្ភហិរញ្ញវត្ថុពីមជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR) និងសហការជាមួយមជ្ឈមណ្ឌលអន្តរជាតិសម្រាប់កសិកម្មតំបន់ត្រូពិក (CIAT) បានអនុវត្ត គម្រោងមួយស្តីពី “ដំណោះស្រាយប្រកបដោយចីរភាពលើជំងឺដំណាំដំឡូងមីនៅតំបន់អាស៊ីអាគ្នេយ៍” មានរយៈពេល ០៤ឆ្នាំ (២០២០-២០២៣) ដោយអនុវត្តនៅខេត្តចំនួន១៤៖ ខេត្តកំពង់ចាម, បាត់ដំបង, បន្ទាយមានជ័យ, ក្រចេះ, ឧត្តរមានជ័យ, ត្បូងឃ្មុំ, កំពង់ធំ, ប៉ៃលិន, សៀមរាប, ព្រះវិហារ, ពោធិសាត់, រតនគិរី, មណ្ឌលគិរី និងខេត្តស្ទឹងត្រែង៕
ចែករំលែកព័តមាននេះ