រាជធានីភ្នំពេញ ៖ ក្រុមហ៊ុន ហ៊ុន អ អិម អេ ខេមបូឌា (RMA Cambodia) ដែលជាតំណាងចែកចាយផ្តាច់មុខរថយន្ត Ford នៅកម្ពុជា បានប្រារព្ធពិធីសម្ពោធជាផ្លូវការនៃការមកដល់នូវរថយន្ត Ford Explorer ស៊េរីថ្មី ឆ្នាំ២០១៦ ជាមួយបច្ចេកវិទ្យាដ៏ឆ្លាតវៃ បំពាក់ដោយម៉ាស៊ីន Ecoboost ដែលជួយបង្កើនកំលាំងបានយ៉ាងខ្លាំងហើយសន្សំការប្រើប្រាស់សាំងបានយ៉ាងមានប្រសិទ្ធិភាពខ្ពស់ ។
ពិធីសម្ពោធរថយន្តស៊េរីថ្មីនេះ ធ្វើឡើងកាលពីថ្ងៃទី ១៩ វិច្ឆិកា ២០១៥កន្លងទៅនេះ នៅសណ្ឋាគារសុខាភ្នំពេញ ដោយមានការចូលរួមពីសំណាក់លោកខៀវ កាញ៉ារីទ្ធ រដ្ឋមន្ត្រីក្រសួងព័ត៌មានផងដែរ ។
លោក David Westerman នាយកគ្រប់គ្រងទីផ្សារប្រចាំតំបន់អាស៊ីប៉ាស៊ីហ្វិចនៃក្រុមហ៊ុន ហ្វដ បានមានប្រសាសន៍ថា រថយន្ត Ford Explorer ស៊េរីថ្មី ផ្ដល់នូវការបញ្ចូលគ្នាតែមួយគត់នូវការបង្កើតនូវបច្ចកវិទ្យាថ្មីៗ ដែលមានសមត្ថភាព និងគុណភាពខ្ពស់សម្រាប់បំពេញចិត្តអតិថិជន ដែលជម្រុញធ្វើយ៉ាងណាឱ្យរថយន្តប្រភេទនេះ ឈរនៅលើលំដាប់ខ្ពស់ជាងគូរប្រកួតប្រជែងនៅក្នុងទីផ្សារប្រទេសកម្ពុជា ។
លោកបន្តថា ជាមួយនឹងការបំពាក់ដោយបច្ចេកវិទ្យាចុងក្រោយនៃ SYNC 2 សម្រាប់អ្នកបើកបរផ្សារភ្ជាប់នូវទូរស័ព្ទដៃជាមួយនឹងរថយន្ត ការបំពាក់ដោយពោងសុវត្ថិភាពចំនួនប្រាំពីរ ហើយមានពោងខ្សែក្រវ៉ាត់នៅជួរទីពីរចំនួនពីរផ្សេងទៀត, រ៉ាដាកំណត់ល្បឿន ដែលអាចបន្ថយល្បឿនដោយស្វ័យប្រវត្តិតាមល្បឿនរថយន្តខាងមុខ និងប្រព័ន្ធចូលចតដោយស្វ័យប្រវត្តិ រថយន្ត Ford Explorer បានក្លាយជារថយន្តមួយប្រភេទ ដែលស្ថិតនៅក្នុងភាពពេញនិយមសម្រាប់ការប្រើប្រាស់របស់ប្រជាជនទូទាំងពិភពលោកអស់រយៈពេលជាង ២៥ ឆ្នាំមកហើយ។
លោក ងន សាំង អគ្គនាយកក្រុមហ៊ុន អ អិម អេ ខេមបូឌា បានអោយដឹងថា យើងពិតជាមានមោទនភាព យ៉ាងក្រៃលែង ដែលយើងអាចនាំនូវរថយន្ដ Ford Explorer សម្រាប់ផ្គត់ផ្គង់ ក្នុងទីផ្សារប្រទេសកម្ពុជា ហើយលក្ខណៈពិសេសៗជាច្រើន នៃរថយន្ដនេះ នឹងធ្វើឲ្យអតិថិជន ដែលរំពឹងចង់បាននូវរថយន្ដប្រណីត សម្រាបការប្រើប្រាស់ ជាលក្ខណៈគ្រួសារ ក៏ដូចជាសម្រាប់ប្រតិបត្ដិការអាជីវកម្មពេញចិត្ដ ជាក់ជាពុំខាន ។
លោកខៀវ កាញ៉ារីទ្ធ រដ្ឋមន្ដ្រីក្រសួងព័ត៌មានបានថ្លែងថា «ខ្ញុំសូមកោតសរសើរ ដល់ភាពវ័យឆ្លាតរបស់ក្រុមហ៊ុន អ អិម អេ ខេមបូឌា ដែលចេះច្បិចយកនូវ ភាពលេចធ្លោ ឆក់យកភាពថ្មីស្អាត ដែលពិភពលោកនេះ គេត្រូវការ។ ជាងនេះទៅទៀតការនាំចូលរថយន្ដនេះតែម្ដង ជាមួយស៊េរីថ្មី រូបភាពថ្មីដ៏ទំនើប ដែលជាផ្នែកធ្វើឱ្យយុវវ័យសម័យនេះ មានភាពភ្ញាក់ផ្អើលស្របពេលប្រទេសយើងកំពុងរីកចម្រើន » ៕
ចែករំលែកព័តមាននេះ