រាជធានីភ្នំពេញ ៖ ដោយយល់ឃើញពីឧត្តមភាព និងឥស្សរភាពរបស់វិទ្យាស្ថានខុងជឺនៃរាជបណ្ឌិត្យសភាកម្ពុជា សាកលវិទ្យាល័យវេស្ទើន បានរៀបចំកម្មវិធីបាឋកថាស្តីពីទំនាក់ទំនងកម្ពុជា-ចិន តាមរយៈវិថីសូត្រនាសតវត្សរ៍ទី ២១ នាព្រឹកថ្ងៃទី១៧ ខែវិច្ឆិកា ឆ្នាំ ២០១៥ នេះ នៅសាកលវិទ្យាល័យវេស្ទើនសាខាទួលស្វាយព្រៃ ដោយមាននិស្សិតវិទ្យាស្ថានវេស្ទើនប្រមាន៣០០នាក់ចូលរួម ។
លោកឆាយ រ័ត្នមុន្នី នាយកប្រតិបត្តិនៃសាកលវិទ្យាល័យវេស្ទើនសាខាទួលស្វាយព្រៃបានមានប្រសាសន៍ថា គោលបំណងសំខាន់នៃការរៀបចំកម្មវិធីនេះ ដើម្បីធ្វើការបញ្ជាក់ជូនប្អូនៗសិស្សនិស្សិត ឱ្យបានដឹងពីប្រវត្តិទំនាក់ទំនងនៃវិថីសូត្រ ដែលមានប្រវត្តិយូរលង់មកហើយ និងត្រូវបានគេបោះបង់ចោល តែក៏ត្រូវប្រទេសចិនបានចាប់ផ្ដើមស្ដារឡើងវិញ ដើម្បីភ្ជាប់ទំនាក់ទំនងសេដ្ឋកិច្ចនយោបាយរវាងប្រទេសចិនទៅកាន់ពិភពលោកដែលមានប្រទេសកម្ពុជាផងដែរ ។
លោក សរ សត្យា សាកលវិទ្យាធិការរង ទទួលបន្ទុក រដ្ឋបាល និងហិរញ្ញកិច្ច នៃសាកលវិទ្យាល័យវេស្ទើន ក៏បានគាំទ្រដល់បេសកកម្មការងាររបស់វិទ្យាស្ថានខុងជឺ នៃរាជបណ្ឌិត្យសភាកម្ពុជា ហើយប្តេជ្ញាចិត្ត រួមសហការជាមួយវិទ្យាស្ថាន ក្នុងការបង្កើនកម្តៅភាសាចិននៅកម្ពុជា ហើយរួមចំណែកជាមួយរាជរដ្ឋាភិបាលកម្ពុជាក្នុងកិច្ចពង្រឹង និងពង្រីកចំណងមិត្តភាពជាមួយប្រទេសចិន។
លោកបណ្ឌិត ជា មុនីឫទ្ធិ នាយកវិទ្យាស្ថានខុងជឺនៃរាជបណ្ឌិត្យសភាកម្ពុជាបានជម្រាបជូនអង្គពិធីពីទស្សនៈ ខ្សែក្រវាត់១ ផ្លូវ១ ដែលជាវិថីសូត្រនាសតវត្សរ៍ទី២១ ហើយក៏បានពន្យល់យ៉ាងក្បោះក្បាយពីគុណតម្លៃនៃការប្រឡងសញ្ញាបត្រ HSK (តេស្តចំណេះដឹងភាសាចិនតាមរយៈសំណេរ) និង HSKK (តេស្តចំណេះដឹងភាសាចិនតាម រយៈការប្រឡងផ្ទាល់មាត់) ដើម្បីទទួលបានឱកាសដាក់ពាក្យស្នើសុំអាហារូបករណ៍ទៅបំពេញទស្សនកិច្ចសិក្សា និងទៅបន្តការសិក្សានៅប្រទេសចិន ។
សញ្ញាបត្រទាំងពីរនេះ មានតម្លៃ២ឆ្នាំ ហើយសម្រាប់ឆ្នាំ២០១៦ នេះ វិទ្យាស្ថានបានរៀបចំការប្រឡងសញ្ញាបត្រ HSK ចំនួនពីរលើកគឺលើកទី១ នៅថ្ងៃទី៩ មករា ហើយលើកទី២ នៅថ្ងៃទី១២ មិថុនា ដោយឡែកសញ្ញាបត្រ HSKK ក៏មានការប្រឡងចំនួនពីរលើកផងដែរគឺ លើកទី១ នៅថ្ងៃទី២០ ខែមីនា ហើយលើកទី២ នៅថ្ងៃទី១០ ខែធ្នូ ។
គួរបញ្ជាក់ថា ភាសាចិនត្រូវបានមជ្ឈដ្ឋានមហាជននៅកម្ពុជាកំពុងចាប់អារម្មណ៍យ៉ាងខ្លាំងក្នុងរយៈពេលកន្លះទសវត្សចុងក្រោយនេះ ក្នុងពេលដែលទំនាក់ទំនងកម្ពុជា និងចិនបានក្លាយជាទំនាក់ទំនងជាយុទ្ធសាស្ត្រ និងគ្រប់ជ្រុងជ្រោយ គេអាចនិយាយដោយសង្ខេបថា ភាសាចិន កំពុងឡើងកម្តៅខ្លាំងនៅកម្ពុជាក្រោយពេលដែលមានវត្តមានរបស់វិទ្យាស្ថានខុងជឺ ចាប់ពីឆ្នាំ២០០៩ មក ៕
ចែករំលែកព័តមាននេះ