ខេត្តព្រៃវែង ៖ ណាហ្គាវើលបេះដូងសប្បុរសបានសហការជាមួយក្លិបបាល់ទាត់ណាហ្គាវើល បានធ្វើការបណ្តុះបណ្តាលជំនាញបាល់ទាត់ដល់សិស្សសាលាអនុវិទ្យាល័យ ព្រៃស្រឡិតកាលពីថ្ងៃទី ១៤ វិច្ឆិកា
ខេត្តព្រៃវែង ៖ ណាហ្គាវើលបេះដូងសប្បុរសបានសហការជាមួយក្លិបបាល់ទាត់ណាហ្គាវើល បានធ្វើការបណ្តុះបណ្តាលជំនាញបាល់ទាត់ដល់សិស្សសាលាអនុវិទ្យាល័យ ព្រៃស្រឡិតកាលពីថ្ងៃទី ១៤ វិច្ឆិកា កន្លងទៅនេះ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា៖«នៅពេលដែលយើងបានចុះទៅទស្សនៈកិច្ចសាលាអនុវិទ្យាល័យព្រៃស្រឡិតដំបូង លោកគ្រូអ្នកគ្រូបានស្នើសុំសម្ភារកីឡា និងការបណ្តុះបណ្តាលបាល់ទាត់ ដូច្នេះដើម្បីជួយអភិវឌ្ឍសកម្មភាពកីឡានៅក្នុងសាលារបស់ពួកគេ។ ថ្ងៃនេះ យើងបាននាំយកបាល់ទាត់មួយចំនួន និងគ្រូបង្វឹកបាល់ទាត់ ដើម្បីបណ្តុះបណ្តាលសិស្សានុសិស្សនៅទីនេះ។ គ្រូបង្វឹករបស់យើងសប្បាយរីករាយដើម្បីចែករំលែកនូវបទពិសោធន៍បាល់ទាត់របស់ពួកគេជាមួយនិងសិស្សានុសិស្ស»។
លោកបានបន្ថែមទៀតថា៖“តាំងពីខែមិនាឆ្នាំ២០១៤មកណាហ្គាវើលបេះដូងសប្បុរសបានឧបត្ថម្ភបាល់ទាត់ និងបាល់ទះជាង ៦០០បាល់ ដល់សាលាបឋមសិក្សា សាលាអនុវិទ្យាល័យ សាលាវិទ្យាល័យ និងអង្គការមិនមែនរដ្ឋាភិបាលប្រហែលជា៩០ សម្រាប់សម្រួលដល់សកម្មភាពកីឡារបស់ពួកគេ។ កម្មវិធីកីឡារបស់យើងមានកុមារកម្ពុជាប្រមាណជា ១៥០០នាក់ នៅតាមបណ្តាខេត្តមួយចំនួន និងរាជធានីភ្នំពេញ ដែលបានទទួលផលប្រយោជន៍ពីកម្មវិធី។ តាមរយៈការបណ្តុះបណ្តាលបាល់ទាត់នេះ វានឹងជួយអភិវឌ្ឍកីឡាបាល់ទាត់ក៏ដូចជាវិស័យកីឡាក្នុងប្រទេសកម្ពុជាឲ្យបានល្អមួយកំរិតទៀត។
យើងសង្ឃឹមថា កីឡាករវ័យក្មេងរបស់យើងអាចក្លាយជាអ្នកលេងបាល់ទាត់អាជីពនៅថ្ងៃអនាគត ហើយអាចផ្ទេរជំនាញរបស់ពួកគេដល់ក្មេងជំនាន់ក្រោយបាន»។ យុវសិស្ស ឈា ងឡេង សិស្សថ្នាក់ទី៨ ដែលបានចូលរួមក្នុងការបណ្តុះបណ្តាលបាល់ទាត់នេះ បាននិយាយថា៖«ខ្ញុំរំភើបខ្លាំងណាស់ដែលមានកីឡាករបាល់ទាត់អាជីពជាច្រើនរូបមកពីក្លឹបបាល់ទាត់ណាហ្គាវើលដែលជាក្រុមបាល់ទាត់ដ៏ល្បីឈ្មោះក្នុងប្រទេសកម្ពុជា បានមកផ្តល់ឲ្យយើងនូវជំនាញបច្ចេកទេសបាល់ទាត់ដូចជា ការទប់បាល់ ការគ្រប់គ្រងបាល់ ការបណ្តើរបាល់ ការស៊ុតបាល់ និងវិន័យនៃការលេងបាល់ដល់ពួកយើង។
កាលពីមុនខ្ញុំលេងបាល់ដោយគ្មានដឹងពីរបៀបលេងឲ្យបានត្រឹមត្រូវ។ប៉ុន្តែឥឡូវនេះខ្ញុំដឹងនិងអាចលេងបានល្អ។ខ្ញុំសង្ឃឹងថា ពួកគេនឹងផ្តល់ការបណ្តុះបណ្តាលបាល់ទាត់បន្ថែមទៀតដល់យើងនៅថ្ងៃអនាគត»។
ដោយឡែក យុវសិស្ស ថុន បាននិយាយថា៖« នេះគឺជាលើកទីមួយហើយសម្រាប់រូបខ្ញុំ ដែលបានចូលរួមក្នុងការបណ្តុះបណ្តាលបាល់ទាត់ដែលបានរៀបចំដោយ ណាហ្គាវើលបេះដូងសប្បុរស។
ការបណ្តុះបណ្តាលបាល់ទាត់នេះ ខ្ញុំបានរៀន និងលេងជាមួយកីឡាករអាជីពជាច្រើនរូប។ យើងមិនត្រឹមតែបានទទួលការបណ្តុះបណ្តាលបាល់ទាត់ សម្ភារកីឡាពីក្លឹបបាល់ទាត់ណហ្គាវើលប៉ុណ្ណោះទេ ថែមទាំងបានទទួលការលើកទឹកចិត្តពីពួកគេទៀតផង។ យើងសូមអរគុណដល់ណាហ្គាវើលសម្រាប់កិច្ចខិតខំប្រឹងប្រែងទាំងនេះ»។
លោក ម៉ៅ សៀង នាយកសាលាអនុវិទ្យាល័យព្រៃស្រឡិតមានប្រសាសន៍ថា ៖«យើងរីករាយខ្លាំងណាស់ដែលឃើញណាហ្គាវើលមកទីនេះ។ គ្មានក្រុមហ៊ុនណាមកទីនេះដើម្បីជួយ និងបណ្តុះបណ្តាលសិស្សានុសិស្ស អំពីរបៀបលេងបាល់ទាត់នោះទេ។
ឥឡូវនេះ ណាហ្គាវើលបានមក និងបាននាំយកគ្រូបង្វឹកមកបង្រៀនសិស្សរបស់យើង។ យើងសូមថ្លែងអំណរគុណដល់ណាហ្គាវើលសម្រាប់កិច្ចខិតខំប្រឹងប្រែងទាំងឡាយហើយក៏បានឧបត្ថម្ភទាំងបច្ចេកទេសបាល់ទាត់ និងសម្ភារកីឡាដល់ពួកយើងផងដែរ»៕
ចែករំលែកព័តមាននេះ