រាជធានីភ្នំពេញ ៖ ទោះបីជាមានការស្នើសុំពីវិស័យឯកជនក្នុងការបើកដំណើរការសាលារៀនឯកជនយ៉ាងណាក្តី ក្រសួងអប់រំយុវជន និងកីឡា បានប្រកាសនៅតែបន្តបិទសាលារៀន ទាំងសាធារណៈ និងឯកជនបន្តទៀត ដោយសារព្រឹត្តិការណ៍នៃការផ្ទុះជំងឺកូវីដ១៩ ថ្ងៃ២០ កុម្ភៈមិនទាន់ចប់នៅឡើយ ។
លោក រស់ សុវាចា អ្នកនាំក្រសួងអប់រំ យុវជន និងកីឡាបានប្រាប់ឲ្យដឹងនៅ ថ្ងៃទី១៧ ខែមិថុនា ឆ្នាំ២០២១ថា ក្រសួងអប់រំស្វាគមន៍ និងថ្លែងអំណរគុណចំពោះកិច្ចសហការណ៍ពីសំណាក់ក្រសួង-ស្ថាប័នពាក់ព័ន្ធដៃគូរអភិវឌ្ឍន៍ វិស័យឯកជន ជាពិសេសមាតាបិតា សិស្ស-និស្សិត និងអាជ្ញាធរមូលដ្ឋានក្នុងការចូលរួមចំណែកលើកកម្ពស់គុណភាពអប់រំសម្រាប់អ្នកសិក្សាមុន និងក្នុងបរិបទកូវីដ-១៩ ។
លោកបញ្ជាក់ថា ៖« ក្រសួងអប់រំ យុវជន និងកីឡា មានជំហរបន្តផ្អាកគ្រឹះស្ថានសិក្សាសាធារណៈ និងឯកជននៅទូទាំងប្រទេសដោយបន្តតាមដាន និងវាយតម្លៃស្ថានភាពព្រឹត្តិការណ៍សហគមន៍ ២០ កុម្ភៈ។
ចំពោះមុខនេះ ក្រសួងអប់រំ យុវជន និងកីឡាលើកទឹកចិត្តគ្រប់ភាគីពាក់ព័ន្ធ ជាពិសេសបុគ្គលិកអប់រំ មាតាបិតា សិស្ស-និស្សិត បន្តអនុវត្តឱ្យបានខ្ជាប់ខ្ជួននូវវិធានការ ៣ការពារ ៣កុំ»។ លោកបន្តថា គ្រឹះស្ថានសិក្សាសាធារណៈ និងឯកជនត្រូវបន្តការបង្រៀន និងរៀនពីចម្ងាយ និងតាមអនឡាញស្របតាមគន្លងជីវិតថ្មីនៃវិស័យអប់រំ ។
ក្រសួងអប់រំ យុវជន និងកីឡា បានចេញរួចហើយ នូវសេចក្តីណែនាំស្ដីពីការបង្រៀន និងរៀនពីចម្ងាយ និងតាមប្រព័ន្ធអេឡិចត្រូ និចសម្រាប់គ្រឹះស្ថានបឋមសិក្សា និងមធ្យមសិក្សាសាធារណៈ ឆ្នាំសិក្សា ២០២០-២០២១ ។
លោកបន្ថែមថាក្រសួងអប់រំ យុវជន និងកីឡានឹងចេញសេចក្តីណែនាំស្ដីពីការបង្រៀន ពីចម្ងាយ និងតាមប្រព័ន្ធអេឡិចត្រូនិចសម្រាប់គ្រឹះស្ថានសិក្សាឯកជនឆ្នាំសិក្សា ២០២០-២០២១ ។ ដោយបន្តអនុវត្តន៍វិធានការ ៣ការពារ ៣កុំ ឲ្យបានខ្ជាប់ខ្ជួន ក្រសួងអប់រំ យុវជន និងកីឡា លើកទឹកចិត្តអ្នកផ្តល់សេវាអប់រំឯកជន អ្នកទទួលសេវាអប់រំឯកជន និងភាគីពាក់ព័ន្ធបន្តពិភាក្សាគ្នា ចរចារគ្នា រកដំណោះស្រាយសមស្រប ប្រកបដោយការយោគយល់គ្នាកម្រិតខ្ពស់ និងសម្បទានគ្នាទៅវិញទៅមក ព្រោះទាំងអស់គ្នាសុទ្ធតែទទួលផលពីកូវីដ-១៩ ។
ទន្ទឹមនឹងនេះ ក្រសួងអប់រំ យុវជន និងកីឡា គោរពអនុវត្តតាមគោលការណ៍នានា របស់រាជដ្ឋាភិបាល ។ លោកបណ្ឌិតហេង វ៉ាន់ដា ដែលជាប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា និងជានាយកវិទ្យាស្ថានវ៉ាន់ដា កាលពីថ្ងៃទី១៦ មិថុនាបាន ដាក់សំណើ៧ចំណុចទៅក្រសួងអប់រំជួយដោះស្រាយក្នុងនោះរួមមាន៖ ទី១. សំណើសុំបើកសាលារៀនឡើងវិញដោយថ្នាក់ឧត្តមសិក្សានិងថ្នាក់ k-12 រៀនជាលក្ខណៈ online plus ដូចគ្នាដែលមានការទទួលខុសត្រូវរបស់សាលានីមួយៗជាមួយនឹងគោរពតាមគោលការណ៍ ស្តង់ដាវិធានការអនាម័យរបស់ក្រសួង អប់រំយុវជននិងកីឡា និងស្នើកំណត់ថ្ងៃប្រឡងបាក់ឌុប។
ទី២. សំណើសុំបិទត្រឹមទីតាំងដែលកើតមានជំងឺកូវីដ១៩ ឬទីតាំងដែលសង្ស័យដែលកើតមានជំងឺកូវីដ១៩ ចំពោះតែថ្នាក់ឬទីតាំងជាក់លាក់ណាមួយដែលមានកើតជំងឺកូវីដ១៩ឬដែលសង្ស័យកើតជំងឺកូវីដ១៩ ជាជាងការបិទសាលាទាំងមូលតែម្ដង ។
ទី៣.សំណើសុំចាក់វ៉ាក់សាំងឲ្យបានពេញលេញចំពោះសិស្សនិស្សិតនិងបុគ្គលិកអប់រំផ្នែកឯកជនជាពិសេសចំពោះសិស្សនិស្សិតនិងបុគ្គលិកអប់រំផ្នែកឯកជននៅតាមបណ្ដាលខេត្តនានាដើម្បីកាត់បន្ថយហានិភ័យនៃការឆ្លងជំងឺកូវីដ១៩ដែលការចាក់វ៉ាក់សាំងនោះអាចធ្វើបាននៅតាមទីតាំងសាលាផ្ទាល់តែម្ដង។
ទី៤. សំណើសុំធនាគារជាតិនៃកម្ពុជាបន្ថយអត្រាការប្រាក់ពិសេសស្នើសុំបន្ថយអត្រាការប្រាក់កាតព្វកិច្ចចំពោះធនាគារឯកជនដើម្បីឲ្យធនាគារឯកជនមានលទ្ធភាពបន្ថយអត្រាការប្រាក់មកដល់គ្រឹះស្ថានអប់រំឯកជននិងស្នើសុំពន្យារពេលនៃការសងត្រឡប់វិញ។
ទី៥. សំណើសុំផ្អាកការបង់ថ្លៃសេវាបេឡាជាតិរបបសន្តិសុខសង្គម ប.ស.ស និងអាចទទួលបានអត្ថប្រយោជន៍ដែលផ្ដល់ដោយបសសជាធម្មតា។
ទី៦.សំណើសុំបង្កើតល្បឿនអ៊ីនធឺណិតសម្រាប់វិស័យអប់រំដោយស្នើសុំក្រសួងប្រៃសណីយ៍និងទូរគមនាគមន៍បង្កើនល្បឿន អ៊ិនធើណេតឱ្យបានលឿនសម្រាប់វិស័យអប់រំដើម្បីឆ្លើយតបឱ្យបានល្អប្រសើរចំពោះការប្រើប្រាស់ក្នុងការរៀនតាមអនឡាញរបស់សិស្សនៅក្នុងបរិបទនៃជំងឺកូវីដ១៩និង ទី៧. សំណើសុំព្យួរការបង់ពន្ធកាត់ទុកលើប្រាក់បៀវត្សបុគ្គលិកអប់រំផ្នែកឯកឯកជនបើអាចបន្ធូរបន្ថយត្រឹមរយៈពេល ៦ខែ ។
ជាមួយគ្នានោះដែរលោកបណ្ឌិតក៏បានលើកឡើងជុំវិញដំណើរការរបស់គ្រឹះស្ថានអប់រំឯកជននៅកម្ពុជានាពេលនេះថា កំពុងយ៉ាប់យ៉ឺនខ្លាំងណាស់ ព្រោះតែវិបត្តិហិរញ្ញវត្ថុ ។ ដូច្នេះហើយ លោកបានស្នើសុំឱ្យក្រសួងអប់រំ យុវជន និងកីឡា ឆាប់បើកសាលារៀនឡើងវិញ។
លោកថា បើសិនក្រសួងអប់រំមិនបើកសាលារៀនឡើងវិញទេ គឺគ្រឹះស្ថានអប់រំឯកជនត្រូវបង្ខំចិ ត្តកាត់ជម្រុះបុគ្គលិកចេញហើយ ព្រោះលែងមានប្រាក់ខែសម្រាប់បើកឱ្យទៀតហើយ៕
ចែករំលែកព័តមាននេះ