រថយន្ដកាមរីបាឡែនមួយគ្រឿងបើកបរលក្ខណៈគ្រួសារធ្វើដំណើរឆ្លងផ្លូវ ក៏ត្រូវរថយន្តដឹកទំនិញធន់ធំរបស់ក្រុមហ៊ុនមួយបុកចំពាក់កណ្តាលរថយន្ដបាឡែននោះពេញទំហឹង រួចរុញច្រានបុកផ្ទប់ទៅនឹងចំហៀងផ្លូវម្ខាងទៀត បណ្តាលឲ្យកៀបជាប់ស្ត្រីម្នាក់
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្ដកាមរីបាឡែនមួយគ្រឿងបើកបរលក្ខណៈគ្រួសារធ្វើដំណើរឆ្លងផ្លូវ ក៏ត្រូវរថយន្តដឹកទំនិញធន់ធំរបស់ក្រុមហ៊ុនមួយបុកចំពាក់កណ្តាលរថយន្ដបាឡែននោះពេញទំហឹង រួចរុញច្រានបុកផ្ទប់ទៅនឹងចំហៀងផ្លូវម្ខាងទៀត បណ្តាលឲ្យកៀបជាប់ស្ត្រីម្នាក់បាក់.កស្លា.ប់ភ្លាមៗនៅក្នុងរថយន្ត និងក្មេងចាស់ប្រុសស្រី៤ទៀតរបួសធ្ងន់ ។ ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី១៦ ខែមិថុនា ឆ្នាំ២០២១ នៅចំណុចស្តុប ណដប្រ៊ីដ ផ្លូវ២០០៤ កែងផ្លូវ២០១៩ ស្ថិតក្នុងសង្កាត់អូរបែកក្អម ខណ្ឌសែន ។
បើតាមប្រភពពីកន្លែងកើតហេតុ បានប្រាប់អោយដឹងថា មុនកើតហេតុ គឺពួកគាត់ឃើញរថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ2AA-8975 បើកបរលក្ខណៈគ្រួសារ មានប្តីប្រពន្ធ និងកូនៗប្រុសស្រីចំនួន៣នាក់ ធ្វើដំណើរតាមបណ្ដោយផ្លូវ២០០៤ ទិសដៅពីលិចទៅកើត ។
ប្រភពដដែលបន្តថា លុះមកដល់ចំណុចស្តុបណដប្រ៊ីដ ក៏ឆ្លងផ្លូវក្នុងល្បឿនយឺតៗ ស្រាប់តែមានរថយន្តដឹកទំនិញធន់ធំមួយគ្រឿងរបស់ក្រុមហ៊ុនដឹកជញ្ជូន L.M.H ម៉ាក FUSO ពាក់ស្លាកលេខភ្នំពេញ 3A-2426 បើក និងរួមដំណើរដោយយុវជន៣នាក់ ដែលធ្វើដំណើរតាមបណ្ដោយផ្លូវទ្រង់មាន់ ឆ្លងកាត់ទទឹងផ្លូវគ្នាមកក្នុងល្បឿនលឿនឆ្លងផ្លូវមកបុកចំពាក់កណ្តាលរថយន្ដកាមរីបាឡែនពេញទំហឹង រួចរុញច្រានទៅចំហៀងម្ខាងផ្លូវទៀត បណ្ដាលឲ្យកៀបជាប់មនុស្សនៅក្នុងរថយន្តកាមរីបាឡែន ធ្វើឱ្យ ស្ត្រីម្នាក់ដែលអង្គុយខាងស្តាំអែបតៃកុងស្លា.ប់ ចំណែកតៃកុងរបួសធ្ងន់ និង៣នាក់ផ្សេងទៀតក៏របួសធ្ងន់ដូចគ្នា ក្នុងនោះក៏មានក្មេងចំនួន២នាក់ផងដែរ ដោយក្មេងស្រីអាយុ៥ឆ្នាំរបួសធ្ងន់សន្លប់ស្តូកស្តឹង និងក្មេងប្រុសម្នាក់ទៀតក៏របួសធ្ងន់ដូចគ្នា ។
ប្រភពដដែលបន្តទៀតថា ចំណែករថយន្តរងគ្រោះវិញរងការខូចខាតស្ទើរតែទាំងស្រុងមើលលែងស្គាល់ទៅហើយ បន្ទាប់ពីបង្កហេតុនោះ ក្រុមអ្នកបើករថយន្តបង្កវិញក៏បានចុះពីលើរថយន្ត រួចនាំគ្នារត់គេចខ្លួន តែត្រូវប្រជាពលរដ្ឋដេញចាប់បានព្រូរថយន្តចំនួន២នាក់ ចំណែកឯតៃកុងរត់គេចខ្លួនបាត់ស្រមោល ។
ក្រោយពេលកើតហេតុ ជនរងគ្រោះត្រូវបានសមត្ថកិច្ចទាក់ទងហៅរថយន្ដសង្គ្រោះគ្លីនិកឯកជន មកដឹកទៅសង្គ្រោះភ្លាមៗផងដែរ នៅសល់ស្ត្រីដែលស្លា.ប់កៀបជាប់ក្នុងរថយន្ត ត្រូវបានប្រជាពលរដ្ឋនាំគ្នាជួយគាស់ និងទាញយកចេញលើកដាក់លើរថយន្តដឹកស.ព ដើម្បីរង់ចាំទាក់ទងរកសាច់ញាតិ មកទទួលយកទៅធ្វើបុណ្យតាមប្រពៃណី ។ ហើយនៅសល់រថយន្ដទាំងពីរគ្រឿង ក៏ត្រូវបានសមត្ថកិច្ចវាស់វែង រួចយកទៅរក្សាទុកបណ្តោះអាសន្ននៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយបន្តនៅពេលក្រោយទៀត ៕
ចែករំលែកព័តមាននេះ