ខេត្តកំពង់ចាម ៖ ប្រជាពលរដ្ឋរស់នៅក្នុងស្រុកចំការលើនិយមដាំផ្លែស្រកានាគនៅតាមដីផ្ទះដែលទំនេរ និងដីចំការមានជាច្រើនហិកតា ដើម្បីផ្គត់ផ្គង់ជីវភាពគ្រួសារ ។ក្នុងនោះមានក្រុមឈ្មួញបានចុះមកទិញ ដោយផ្ទាល់នាំទៅលក់នៅខេត្តព្រះវិហារ និងតំបន់មួយចំនួនទៀតផងដែរ ព្រោះតែមានរសជាតិឆ្ងាញ់ ។…
ខេត្តកំពង់ចាម ៖ ប្រជាពលរដ្ឋរស់នៅក្នុងស្រុកចំការលើនិយមដាំផ្លែស្រកានាគនៅតាមដីផ្ទះដែលទំនេរ និងដីចំការមានជាច្រើនហិកតា ដើម្បីផ្គត់ផ្គង់ជីវភាពគ្រួសារ ។ក្នុងនោះមានក្រុមឈ្មួញបានចុះមកទិញ ដោយផ្ទាល់នាំទៅលក់នៅខេត្តព្រះវិហារ និងតំបន់មួយចំនួនទៀតផងដែរ ព្រោះតែមានរសជាតិឆ្ងាញ់ ។
លោក អឿន វ៉ា វ័យ៦៨ឆ្នាំ រស់នៅភូមិតាំងក្រង់ ឃុំស្វាយទាបស្រុកចំការលើបានរៀបរាប់ឲ្យដឹងថា ចាប់តាំងពីក្រោយឆ្នាំ១៩៧៩ គាត់បានដាំដុះដំណាំក្នុងនោះរួមមាន ខ្នុរ ព្រមទាំងដំណាំរួមផ្សំជាច្រើនមុខទៀត ដើម្បីផ្គត់ផ្គង់ជីវភាពគ្រួសារ ។ ហើយមួយរយៈចុងក្រោយនេះ គឺគាត់បានដាំស្រកានាគជាប្រភេទពូជតៃវ៉ាន់ មកដាំនៅចំហៀងផ្ទះបានប្រមាណជាង១០០គុម្ពផងដែរ ។
កសិកររូបនេះ បានរៀបរាប់ឲ្យដឹងទៀតថា សម្រាប់ពូជនេះគាត់ទិញពីគេមួយគុម្ពតម្លៃ៤.០០០រៀល ពេលដែលយកមកដាំដុះក្នុងរយៈពេល៧ទៅ៨ខែនឹងចាប់ផ្ដើមហុចផលជាបណ្ដើរៗ ។
ជាមួយនោះមានម៉ូយនៅខេត្តព្រះវិហារ ជាប់ព្រំដែនថៃបានចុះមកទិញដល់ផ្ទះរបស់គាត់លក់បានមួយគីឡូចន្លោះពី៤.០០០ ទៅ៥.០០០រៀល តាមប្រភេទតូច ឬធំ ពេលដែលបេះម្ដងៗម្ដងបានប្រមាណ ១០០គីឡូក្រាម ។
ចំពោះផ្លែស្រកានាគពេលដែលហុចផល គឺមូយបានទូរស័ព្ទមកកក់ទុកជាមុន ទោះបីជាមានផ្លែប៉ុន្មានក៏មិនសល់ដែរ ។ មានពេលខ្លះអ្នកធ្វើដំណើរតាមរថយន្តជិះកាត់តាមផ្លូវថ្នល់មុខផ្ទះរបស់គាត់បានឈាងចូលទិញម្ដងប្រាំគីឡូទៅពិសា ព្រោះតែមានរសជាតិឆ្ងាញ់ ។
ទោះបីជាស្ថិតនៅក្នុងវ័យច្រើនបែបនេះ ក៏ពិតមែនតែគាត់ប្រឹងថែទាំដំណាំនេះព្រោះថា បានជួយលើកស្ទួយជីវភាពគ្រួសាររបស់គាត់ឲ្យបានប្រសើរ ។ នៅថ្ងៃអនាគត ពេលដែលកម្លាំងចុះខ្សោយធ្វើការដាំដុះមិនបានគាត់ និងផ្ទេរចំណេះដឹង ដែលមានទៅដល់ចៅប្រុសដែលរស់នៅជាមួយឲ្យមើលថែទាំជំនួសមិនដឹងថា ចៅនោះព្រមទទួលយក ឬមួយក៏យ៉ាងណានោះទេ ព្រោះចៅ គឺជាគ្រូបង្វឹកកីឡាម្នាក់ នៅក្នុងស្រុកចំការលើ ។
ចំណែកមន្ត្រីបម្រើការងារនៅមន្ទីរកសិកម្មរុក្ខាប្រមាញ់ និងនេសាទខេត្តមួយរូបបានបញ្ជាក់ឲ្យដឹង នៅព្រឹកថ្ងៃទី១៧ មិថុនា ២០២១ថា ក្នុងចំណោមស្រុក១០ក្រុង នៅក្នុងខេត្តកំពង់ចាម គឺមានតែស្រុកចំការលើមួយប៉ុណ្ណោះ ដែលប្រជាពលរដ្ឋនិយមដាំផ្លែស្រកានាគច្រើនជាងគេបំផុត ដើម្បីផ្គត់ផ្គង់ជីវភាពគ្រួសារក្នុងនោះមានអ្នកខ្លះទៀតបានដាំដុះរហូតដល់ខ្ទង់ពាន់គុម្ព ដើម្បីផ្គត់ផ្គង់លើទីផ្សារនានាក្នុងប្រទេសកម្ពុជា ៕
ចែករំលែកព័តមាននេះ