អ៊ីស្រាអែល-ប៉ាឡេស្ទីន ៖ កងយន្តហោះអ៊ីស្រាអែល កាលពីថ្ងៃទី១៦ មិថុនា បានវាយប្រហារលើទីតាំងទាំងឡាយរបស់ក្រុមហាម៉ាស់ប៉ាឡេស្ទីននៅជ្រោយហ្គាហ្សា បន្ទាប់ពីពួកប៉ាឡេស្ទីនបញ្ជូនបាល់ឡុងហោះភ្ជាប់ភ្លើង ឆ្ពោះមកកាន់អ៊ីស្រាអែល ដែលនោះជាឧប្បត្តិហេតុគួរឲ្យកត់សម្គាល់ដំបូងៗ រវាងភាគីទាំង២ចាប់តាំងពីមានបទឈប់បាញ់គ្នា ពោលគឹការបញ្ចប់សង្គ្រាមផ្លេកបន្ទោរមួយកាលពីខែឧសភាមក ។
ការវាយប្រហារតាមអាកាសទាំងនេះជាលើកដំបូងរបស់អ៊ីស្រាអែល ក្រោយការចូលកាន់តំណែងរបស់នាយករដ្ឋមន្ត្រីថ្មីអ៊ីស្រាអែល លោកណាហ្វតាលីបេននេត ជាអតីតរដ្ឋមន្ត្រីការពារប្រទេស ដែលបញ្ចប់ការកាន់អំណាច១២ឆ្នាំរបស់លោកបេនចាមីន នេតាន់យ៉ាហ៊ូ ។
តាមប្រភពប៉ាឡេស្ទីននានាថា កងយន្តហោះវបានវាយប្រហារយ៉ាងហោចណាស់ លើទីតាំងមួយនៅភាគខាងលិចទីក្រុងខាន់យូណេស ភាគខាងត្បូងជ្រោយហ្គាហ្សា ។ ការវាយប្រហារតាមអាកាសរបស់អ៊ីស្រាអែល និងការបញ្ជូនបាល់ឡុងហោះភ្ជាប់ភ្លើងមកអ៊ីស្រាអែលនេះ ជាឧប្បត្តិហេតុដំបូងសំខាន់រវាងអ៊ីស្រាអែល និងក្រុមហាម៉ាសនៅហ្គាហ្សា ចាប់តាំងពីមានបទឈប់បាញ់គ្នា កាលពីថ្ងៃទី២១
ឧសភា ដែលបញ្ចប់សង្គ្រាមផ្លេកបន្ទោរ១១ថ្ងៃ ដែលបណ្ដាលឲ្យមនុស្សស្លា.ប់២៦០នាក់ខាងប៉ាឡេស្ទីន និង១៣នាក់់ខាងអ៊ីស្រាអែល ។
ឧប្បត្តិហេតុថ្មីទាំងនេះកើតមានខាងក្រៅក្បួនបាតុកម្មដ៏ចម្រូងចម្រាស់របស់ពួកសកម្មជន ជាតិនិយមនិងស្ដាំនិយមជ្រុលអ៊ីស្រាអែល នៅក្រុងហ្សេរុយសាឡឹមខាងកើត កាលពីយប់ថ្ងៃទី១៥ មិថុនា ដែលបាតុកម្មនោះនាំឲ្យមានការភ័យខ្លាច ដល់ការផ្ទុះជាថ្មីនៃការប្រទូស្តរ៉ាយគ្នារវាងក្រុមហាម៉ាស់និងអ៊ីស្រាអែល ។ ការបង្ហោះបាល់ឡុងបញ្ជូនភ្លើងមកកាន់អ៊ីស្រាអែល បណ្ដាលឲ្យមានភ្លើងឆាបឆេះ២០កន្លែងនៅភាគខាងត្បូងអ៊ីស្រាអែល ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ