រាជធានីភ្នំពេញ ៖ ដើម្បីលើកកម្ពស់ចំណេះដឹងពលរដ្ឋកម្ពុជា ធនាគារអភិវឌ្ឍន៍អាស៊ី បានចាប់ដៃគូសហការជាមួយវិទ្យាស្ថានបណ្ដុះបណ្ដាលនិងស្រាវជ្រាវដើម្បីអភិវឌ្ឍន៍កម្ពុជា ដោយ បញ្ចូលឯកសារបោះពុម្ពផ្សាយក្នុងទម្រង់ឌីជីថល របស់ធនាគារអភិវឌ្ឍន៍អាស៊ីមាន ទៅក្នុងបណ្ណាល័យអនឡាញរបស់CDRI រួមជាមួយកម្មវិធី…
រាជធានីភ្នំពេញ ៖ ដើម្បីលើកកម្ពស់ចំណេះដឹងពលរដ្ឋកម្ពុជា ធនាគារអភិវឌ្ឍន៍អាស៊ី បានចាប់ដៃគូសហការជាមួយវិទ្យាស្ថានបណ្ដុះបណ្ដាលនិងស្រាវជ្រាវដើម្បីអភិវឌ្ឍន៍កម្ពុជា ដោយ បញ្ចូលឯកសារបោះពុម្ពផ្សាយក្នុងទម្រង់ឌីជីថល របស់ធនាគារអភិវឌ្ឍន៍អាស៊ីមាន ទៅក្នុងបណ្ណាល័យអនឡាញរបស់CDRI រួមជាមួយកម្មវិធី ផ្សព្វផ្សាយសៀវភៅសំខាន់មួយស្ដីពី ដំណើរឆ្ពោះទៅកាន់វិបុលភាពរបស់អាស៊ី ។នេះបើតាមសេចក្តីប្រកាសព័ត៌មានរបស់ធនាគារអភិវឌ្ឍន៍អាស៊ី ចេញផ្សាយនៅព្រឹកថ្ងៃទី ១៦ មិថុនា ២០២១នេះ ។
នាយិកាប្រចាំប្រទេសកម្ពុជារបស់ធនាគារអភិវឌ្ឍន៍អាស៊ី លោកស្រី Sunniya Durrani-Jamal បានមានប្រសាសន៍ឱ្យដឹងថា ប្រតិបត្តិការរបស់ធនាគារអភិវឌ្ឍន៍អាស៊ី មានលើសពីការផ្ដល់ជំនួយហិរញ្ញប្បទាន ដោយរួមបញ្ចូឡនូវការផ្ដល់នូវចំណេះដឹងសម្រាប់ដំណោះស្រាយ ដែលជាមធ្យោបាយល្អបំផុត ដើម្បីធានាកំណើន និងការអភិវឌ្ឍប្រកបដោយនិរន្តរភាព ។ តួនាទីនេះ កាន់តែមានសារសំខាន់ក្នុងកាលៈទេសៈដែលប្រទេសកម្ពុជាកំពុងងើបចេញពីវិបត្តិសុខភាពសាធារៈ និងសេដ្ឋកិច្ច បណ្ដាលមកពី កូវីដ១៩។
លោកបណ្ឌិត អេង នេត្រា នាយកប្រតិបត្តិស្ដីទីនៃវិទ្យាស្ថាន CDRI បានឱ្យដឹងផងដែរថា សៀវភៅស្ដីពីដំណើរឆ្ពោះទៅកាន់វិបុលភាពរបស់អាស៊ី ស្ថិតនៅក្នុងចំណោមឯកសារចំណេះដឹងរបស់ ADB ជាច្រើនក្នុងទម្រង់ឌីជីថល ដែលមានក្នុងបណ្ណាល័យអនឡាញរបស់CDRI ។ វិទ្យាស្ថានជឿជាក់ថា ភាពជាដៃគូសម្រាប់បណ្ណាល័យអនឡាញនេះនឹងចូលរួមចំណែកយ៉ាងសំខាន់ ក្នុងការកសាងធនធានមនុស្សនៅកម្ពុជា ។រហូតមកដល់ពេលនេះ CDRI បានបញ្ចូលឯកសារដែលបានបោះពុម្ពផ្សាយដោយ ADB ចំនួនជាង១ពាន់ហើយទៅក្នុងបណ្ណាល័យអនឡាញ ។
លោកបន្តថា CDRI គឺជាមជ្ឈមណ្ឌលចំណេះដឹងដំបូងគេ ដែលត្រូវបានជ្រើសរើសជាដៃគូសម្រាប់បណ្ណាល័យបញ្ញើផ្លូវការ នៃកម្មវិធីបណ្ណាល័យបញ្ញើរបស់ABD ។ ប្រទេសកម្ពុជា ស្ថិតនៅក្នុងចំណោមប្រទេសចំនួន១៥ នៅទូទាំងទ្វីបអាស៊ីនិងប៉ាស៊ីហ្វិក ដែលត្រូវបានជ្រើសរើសសម្រាប់កម្មវិធីនេះ ក្នុងគោលបំណងលើកកម្ពស់ចំណេះដឹង និងភាពច្នៃប្រឌិត ដើម្បីដោះស្រាយបញ្ហានានាក្នុងការងារអភិវឌ្ឍន៍ប្រទេស ។
យោងតាមសេចក្តី ប្រកាសព័ត៌មានរបស់ធនាគារអភិវឌ្ឍន៍អាស៊ីហៅកាត់ថា ADB បានឱ្យដឹងថា បច្ចុប្បន្ន ធនាគារអភិវឌ្ឍន៍អាស៊ី កំពុងអនុវត្តគម្រោងវិនិយោគ ដែលមានទឹកប្រាក់២,១ពាន់លានដុល្លារអាមេរិកនៅកម្ពុជា តាមរយៈយុទ្ធសាស្ត្រភាពជាដៃគូប្រចាំប្រទេសឆ្នាំ ២០១៩-២០២៣ ដោយមានបញ្ចូលកម្មវិធីជំនួយបច្ចេកទេស និងចំណដឹងដ៏ទូលំទូលាយ ។ នៅក្នុងឆ្នាំ២០២១ ធនាគារអភិវឌ្ឍន៍អាស៊ី គ្រោងនឹងបោះពុម្ព ផ្សាយឯកសារចំណេះដឹងចំនួន២៧និងរៀបចំកម្មវិធីផ្សព្វផ្សាយចំណេះដឹង១១បន្ថែមទៀត រួមទាំងឯកសារនិងកម្មវិធីដើម្បីគាំទ្រដល់ការអភិវឌ្ឍសេដ្ឋកិច្ច និងការងើបឡើងវិញរបស់ប្រទេសកម្ពុជាពីការរាតត្បាតកូវីដ១៩ ។
ធនាគារអភិវឌ្ឍន៍អាស៊ី ប្ដេជ្ញាថា នឹងសម្រេចឱ្យបាននូវវិបុលភាពបរិយាប័ន្ន ភាពធន់និងនិរន្តរភាពក្នុងតំបន់អាស៊ីប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង ៕
ចែករំលែកព័តមាននេះ