រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវបានប្រជាពលរដ្ឋដែលដាំបន្លែនៅច្រាំងទន្លេប្រទះឃើញអណ្តែតទឹកទន្លេសាប និងចេះតែរសាត់តាមខ្យល់ទៅទើនឹងកំប្លោក នៅចំណុចមាត់ច្រាំទន្លេ ហើយក៏បានរាយការណ៍ទៅនគរ បាលមូលដ្ឋាន ដើម្បីចាត់ចែងនាំគ្នាអូសឡើងច្រាំង ត្រួតពិនិត្យ ស្រាប់តែធ្វើតេស្តរកឃើញវិជ្ជមានកូវីដ១៩តែម្តង។ ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៩ព្រឹក ថ្ងៃទី១៦ ខែមិថុនា ឆ្នាំ២០២១ នៅចំណុចច្រាំងទន្លេសាប ស្ថិតក្នុងភូមិព្រែកតាសេក សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
សេចក្តីរាយការណ៍បន្តថា ស.ពបុរសរូបនោះត្រូវបាននគរបាលអោយដឹងថា មានឈ្មោះ នៅ វ៉ាន់ធិន អាយុ៣៩ឆ្នាំ ក្នុងចំណោមកូនភ្លោះ៣នាក់ មុខរបរជាអ្នករត់ម៉ូតូកង់៣ ដឹកអីវ៉ាន់តាមអនឡាញ មានលំនៅភូមិតំណាក់ធំ សង្កាត់ស្ទឹងមានជ័យ ខណ្ឌមានជ័យ។
តាមប្រភពព័ត៌មានពីកន្លែងកើតហេតុបានអោយដឹងថា កាលពីវេលាម៉ោងប្រមាណ១១យប់ ថ្ងៃទី១៤ ខែមិថុនា គេបានឃើញបុរសម្នាក់ដែលមានភិនភាគស្លៀកពាក់ខោអាវដូចគ្នានឹងស.ពបុរសរូបនេះ បានបីកូនប្រុសអាយុប្រមាណ៣ឆ្នាំចុះពីលើកង់៣ ហើយប្រុងលោតទឹកសម្លា.ប់ខ្លួន តែមិនបានសម្រេចឡើយ ដោយសារត្រូវអ្នកដំណើរបានរាយការណ៍ទៅសមត្ថកិច្ចជួយឃាត់ទាន់។
ប្រភពដដែលបន្តថា ភ្លាមៗនោះ បុរសរូបនេះក៏បានធ្វើដំណើរទៅបាត់ទៅ តែគេពុំដឹងថា បុរសរូបនោះ ទៅលោតទឹកសម្លា.ប់ខ្លួនតាំងពីពេលណានោះទេ ស្រាប់តែនៅព្រឹកថ្ងៃទី១៦ ខែមិថុនានេះ ក៏មានប្រជាពលរដ្ឋដែលរស់នៅតាមមាត់ទន្លេបានប្រទះឃើញស.ពអណ្តែតទឹក ដោយមានភិនភាគដូចបុរសដែលគិតខ្លីខាងលើនោះ ។
តាមប្រភពពីបងស្រីជនរងគ្រោះបានអោយដឹងថា កាលពី៣ថ្ងៃមុន ប្អូនប្រុសគាត់មិនដឹងថា មានវិបត្តិអ្វីទេ អោយតែមកពីរត់ម៉ូតូកង់៣វិញ គឺគិតតែពីអង្គុយផឹក ដោយមិននឹកស្មានថា មកលោតទឹកសម្លា.ប់ខ្លួនបែបនេះឡើយ ។
ទោះបីជាយ៉ាងណា គេពុំទាន់ដឹងថា តើបុរសនោះមានវិបត្តិអ្វីឡើយ? ហើយនៅព្រឹកនោះគេក៏បានឃើញក្រុមគ្រួសារបានចុះទៅកន្លែងកើតហេតុផងដែរ ។ ចំណែកស.ពជនរងគ្រោះក៏ត្រូវបាននគរបាលចាត់ចែងអូសឡើងច្រាំង ដើម្បីត្រួតពិនិត្យ ។ បន្ទាប់ពីត្រួតពិនិត្យរួច ក្រុមគ្រូពេទ្យក៏បានធ្វើតេស្តរហ័ស ស្រាប់តែរកឃើញថា ស.ពជនរងគ្រោះគឺមានវិជ្ជមានកូវីដ១៩តែម្តង ក្រោយមកសមត្ថកិច្ចក៏រង់ចាំរថយន្តរបស់ក្រុមគ្រូពេទ្យមកដឹកស.ពជនរងគ្រោះទៅបូជាសិន ទើបប្រគលធាតុអោយក្រុមគ្រួសារ ដើម្បីធ្វើបុណ្យតាមប្រពៃណី ៕
ចែករំលែកព័តមាននេះ