ក្នុងស្រុកអន្លង់វែង រយៈពេល២ថ្ងៃតែប៉ុណ្ណោះ ត្រូវបានរកឃើញអ្នកឆ្លងជំងឺកូវីដ១៩ ចំនួន៧នាក់ក្នុងសហគមន៍ និងត្រូវបានបិទខ្ទប់ទីតាំងជាបន្តបន្ទាប់ ក្រោយពីបានរកឃើញមាន
ខេត្តឧត្តរមានជ័យ ៖ ក្នុងស្រុកអន្លង់វែង រយៈពេល២ថ្ងៃតែប៉ុណ្ណោះ ត្រូវបានរកឃើញអ្នកឆ្លងជំងឺកូវីដ១៩ ចំនួន៧នាក់ក្នុងសហគមន៍ និងត្រូវបានបិទខ្ទប់ទីតាំងជាបន្តបន្ទាប់ ក្រោយពីបានរកឃើញមានអ្នកវិជ្ជមានកូវីដ ហើយអ្នកដែលពាក់ព័ន្ធវិញ ក៏ត្រូវបាននាំយកទៅធ្វើចត្តាឡីស័កផងដែរ។
លោកនៅ សំអន ប្រធានមន្ទីរពេទ្យបង្អែកស្រុកអន្លង់វែង បានប្រាប់ឱ្យដឹងថា នៅក្នុងស្រុកអន្លង់វែង គិតត្រឹមថ្ងៃទី១៣ និងថ្ងៃ១៤ រយៈពេល២ថ្ងៃនេះ ត្រូវបានរកឃើញវិជ្ជមានកូវីដ១៩ ចំនួន៧នាក់ ហើយត្រូវបានបញ្ជូនទៅសំរាកព្យាបាលនៅឯមន្ទីរពេទ្យបង្អែកខេត្តឧត្តរមានជ័យហើយ ។ ចំណែកទីតាំង៨កន្លែងក្នុងស្រុកនេះ ក៏ត្រូវបានបិទខ្ទប់ រួមទាំងអ្នកពាក់ព័ន្ធដែលមានប្រុសស្រីជាង៥០នាក់ ក៏តម្រូវឱ្យធ្វើចត្តាឡីស័កនៅនឹងផ្ទះ ដើម្បីយកសំណាក និងតាមដាន ព្រមទាំងយាមកាមការពារបំផុត ។ លើសពីនេះក្រុមគ្រូពេទ្យក៏ខិតខំធ្វើការចុះស្រាវជ្រាវស្វែងរកអ្នកដែលពាក់ព័ន្ធឱ្យចូលខ្លួនមកពិនិត្យ ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩មួយនេះ ទាំងអស់គ្នាផងដែរ។
ទាក់ទិនករណីខាងលើនេះ នារសៀលថ្ងៃទី១៥ ខែមិថុនា ឆ្នាំ២០២១ លោក ឃ្លោក ហួត ប្រធានសុខាភិបាលខេត្តឧត្តរមានជ័យ បានឱ្យដឹងដែរថា នៅក្នុងខេត្តឧត្តរមានជ័យ ក្រុមការងារគ្រូពេទ្យចត្តាឡីស័កបានរកឃើញអ្នកឆ្លងមានវិជ្ជមានកូវីដ១៩ ចំនួន១៣៤នាក់ហើយ ក្នុងនោះពលករឆ្លងដែនមកពីប្រទេសថៃចំនួន១១៧នាក់ និងអ្នកដែលឆ្លងក្នុងសហគមន៍ចំនួន១៧នាក់ ។
ហើយក្រុមអាជ្ញាធរ រួមទាំងក្រុមគ្រូពេទ្យក៏បានរៀបចំទីតាំងសម្រាប់ព្យាបាលអ្នកជំងឺកូវីដ១៩ មានចំនួន៣ទីតាំង ដោយទីតាំងទី១ គឺយកផ្ទះសំណាក់ឧត្តមរដ្ឋា និងទីតាំងទី២ យកមន្ទីរពេទ្យបង្អែកខេត្តនិងទីតាំងទី៣ យកមន្ទីរពេទ្យបង្អែកស្រុកអន្លង់វែងកំពង់ ហើយទីតាំងទាំង៣នេះ គឺនៅខេត្តមានចំនួន២ទីតាំង និងនៅស្រុកអន្លង់វែង មាន១ទីតាំងផងដែរ៕
ចែករំលែកព័តមាននេះ