ខេត្តសៀមរាប៖ ក្នុងពេលជំងឺកូវីដ១៩ បានឆ្លងរាលដាល នៅតាមមូលដ្ឋាន ក្នុងខេត្តសៀមរាប នាពេលនេះ នៅតែមានក្រុមអ្នកចូលចិត្ត ជួបជុំផឹកស៊ី បន្តស៊ីផឹក ដោយមិនខ្លាចឆ្លងកូវីដឡើយ។ អាជ្ញាធរសមត្ថកិច្ច បានអប់រំ ណែនាំ និងហាមឃាត់ មិនឲ្យជួបជុំទៀតឡើយ។
លោក ស៊ិន ចាន់ថុល អភិបាលស្រុកពួក បានបញ្ជាក់ថា គណៈបញ្ជាការឯកភាពរដ្ឋបាលស្រុកពួក បានណែនាំ អប់រំ ដល់បងប្អូនប្រជាពលរដ្ឋ នៅតាមបណ្តាមូលដ្ឋាន ភូមិ ឃុំ ដែលបានអនុវត្តចាប់រាត្រីថ្ងៃទី ១៣ និងថ្ងៃទី១៤ មិថុនា នៅឃុំត្រីញ័រ ឃុំរើល ឃុំសំរោងយា។ អាជ្ញាធរសមត្ថកិច្ចយើង អប់រំណែនាំដល់បងប្អូន កុំឲ្យមានការជួបជុំ ប្រមូលផ្តុំគ្នា ផឹកស៊ី។
លោក ក៏បានគូសបញ្ជាក់ថា យើងគ្រប់គ្នា ត្រូវបង្កើនការប្រុងប្រយ័ត្នខ្ពស់ ចូលរួមអនុវត្តវិធានការការពារ ៣កុំ ៣ការពារ និង សេចក្តីណែនាំរបស់ក្រសួងសុខាភិបាល ឲ្យបានខ្ជាប់ខ្ជួន និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ជាពិសេសត្រូវអនុវត្តវិធានការរដ្ឋបាល និងវិធានការចត្តាឡីស័ក។ ម្យ៉ាងទៀត បុគ្គលទាំងឡាយណា ល្មើសនឹងវិធានការនេះ នឹងប្រឈមទទួលការផ្តន្ទាទោសពិន័យអន្តរការណ៍ ឬដាក់ពន្ធនាគារ ដោយអនុលោមតាមខ្លឹមសារច្បាប់ និងលិខិតបទដ្ឋានគតិយុត្តជាធរមាន។
យោងតាមអនុក្រឹត្យ ស្ដីពី កាតព្វកិច្ចពាក់ម៉ាស់ តាមមាត្រា ១៩ ចែងថា បុគ្គល ដែលមិនពាក់ម៉ាស់ នៅកន្លែងចាំបាច់ ដែលក្រសួងសុខាភិបាល បានណែនាំ នឹងត្រូវរងការផាកពិន័យពី ២០ ម៉ឺនរៀល ទៅ ១លានរៀល ប្រសិនបើបុគ្គលនោះ មិនធ្វើតាមការព្រមាន លើកទី១ ។ ចំណែកអ្នករៀបចំកម្មវិធីអ្វីមួយ ដែលមិនគោរពទៅតាមគោលការណ៍គម្លាតសង្គម ត្រូវរងការផាកពិន័យពី ១លាន ទៅ៥លានរៀល ក្នុងករណីមិនធ្វើតាមការព្រមាន លើកទី១៕ ច័ន្ទ រស្មី
ចែករំលែកព័តមាននេះ