រាជធានីភ្នំពេញ ៖ បង្គោលភ្លើង១ដើមបានបាក់រាបដល់ដី និងប្រអប់តេឡេម៉ែតរបស់រដ្ឋករទឹកចំនួន១ បានរងការខូចខាតផងដែរ ដោយសារតែបុរសជាជាងជួសជុលរថយន្តម្នាក់បើកសាករថយន្តម៉ាក LEXUS-450 មួយគ្រឿងរបស់ភ្ញៀវបោះពួយក្នុងល្បឿនយ៉ាងលឿនលុះដល់ចំណុចផ្លូវបំបែកជា៤វាក់ជាមួយនឹងម៉ូតូមួយគ្រឿងបួងចង្កូតគេចឡើងទៅលើខឿនផ្លូវទៅបុកពេញទំហឹង សំណាងល្អមិនបង្កឲ្យមានមនុស្សគ្រោះថ្នាក់។ ករណីនេះដែរ បានកើតឡើងកាលពីវេលាម៉ោង៣ និង៤៥នាទីល្ងាច ថ្ងៃទី១៥ ខែមិថុនា ឆ្នាំ២០២១ នៅចំណុចផ្លូវ R៦ កែងនឹងផ្លូវR៨ ក្នុងតំបន់បឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ។
តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញរថយន្តម៉ាក Lexus-450 ពណ៌ទឹកមាស ពាក់ស្លាកលេខ ភ្នំពេញ ២C-៧៩៩៧ មួយគ្រឿង ដែលបើកបរដោយបុរសជាជាងជួសជុលរថយន្តម្នាក់ បានបោះពួយក្នុងល្បឿនយ៉ាងលឿនតាមបណ្ដោយផ្លូវលេខ R៦ ក្នុងទិសដៅពីត្បូងទៅជើង។ លុះមកដល់ចំណុចកើតហេតុខាងលើដែលជាចំណុចផ្លូវបំបែកជា៤ បុរសជាអ្នកបើកបរក៏បានបួងចង្កូតបត់ឆ្វេងក្នុងបំណងទៅតាមផ្លូវ R៨វិញ ក៏ស្រាប់តែមានម៉ូតូមួយគ្រឿងមកពីមុខវាក់ទើបបើកឡើងទៅលើខឿនចិញ្ចើមផ្លូវទៅបុកបង្គោលភ្លើង១ដើមបាក់រាបដល់ដីនិងបង្កឱ្យប្រអប់តេឡេម៉ែតរបស់រដ្ឋករទឹកមួយទៀតរងការខូចខាតផងដែរ។
តាមប្រភពដដែលបានប្រាប់បន្តទៀតថា ពាក់ព័ន្ធទៅនឹងករណីរថយន្តម៉ាក LEXUS-450 ដែលបើកបរដោយបុរសជាជាងជួសជុលរថយន្តម្នាក់បើកសាកឡានរបស់ភ្ញៀវទៅបុកបង្គោលភ្លើង១ដើមបាក់រាបដល់ដី និងប្រអប់តេឡេម៉ែត្ររបស់រដ្ឋាករទឹក ១ទៀតរងការខូចខាតនេះដែរ គឺកើតឡើងដោយសារតែការបើកបរក្នុងល្បឿនលឿនខ្វះការប្រុងប្រយ័ត្ន ហើយរថយន្តបង្កក៏រងការខូចខាតផ្នែកខាងមុខផងដែរ តែសំណាងល្អមិនបានបង្កឲ្យមនុស្សណាម្នាក់រងគ្រោះថ្នាក់នោះទេ។ ក្រោយពេលកើតហេតុ កម្លាំងសន្តិសុខយាមនៅក្នុងតំបន់អភិវឌ្ឍន៍បឹងកក់ក៏បានឃាត់បុរសជាងជួសជុលជាអ្នកបើកបរ រួមទាំងរថយន្តម៉ាក LEXUS-450 បាននៅនឹងកន្លែងភ្លាមៗ ដើម្បីធ្វើការដោះស្រាយគ្នា។ដោយសារតែបង្គោលភ្លើង១ដើមដែលបាក់រាបដល់ដី និងប្រអប់តេឡេម៉ែត្រ១ដែលរងការខូចខាតលើជារបស់ក្រុមហ៊ុនឯកជន ក៏បានធ្វើការដោះស្រាយគ្នាបញ្ចប់រឿងនៅនឹងកន្លែងកើតហេតុផងដែរ៕ ដោយ ៖ ភី ផល
ចែករំលែកព័តមាននេះ