មានទាហានម្នាក់ជួលអ្នកស្រុកឱ្យកា.ប់ឆ្ការព្រៃយកភ្នំពោន
- កំពត
ខេត្តកែប ៖ បុរស២នាក់ម្នាក់ឈ្មោះ អេង ឃុយ អាយុ៤៩ឆាំ្ន និងម្នាក់ទៀតឈ្មោះ សូរ ផល អាយុ៤៨ឆាំ្ន…
ខេត្តកែប ៖ បុរស២នាក់ម្នាក់ឈ្មោះ អេង ឃុយ អាយុ៤៩ឆាំ្ន និងម្នាក់ទៀតឈ្មោះ សូរ ផល អាយុ៤៨ឆាំ្ន នៅភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ត្រូវបាននគរបាលនៃស្នងការដ្ឋានខេត្តកែបចាប់បានបញ្ជូនទៅតុលាការខេត្តកំពត កាលពីវេលាម៉ោង១០ព្រឹក ថ្ងៃទី៦ ខែមិថុនា ឆាំ្ន២០២១កន្លងមកនេះ ទាក់ទិនរឿងឈូសឆាយដីភ្នំតាំងពីជើងភ្នំពោនឡើងចង់ដល់កំពូលទៅហើយ ដោយអត់ខ្លាចការព្រមានពីសមត្ថកិច្ចឡើយ ។
លោកវរសេនីយ៍ត្រី ង៉ែត ទូច ស្នងការរងទទួលផែនការិយាល័យនគរបាលសេដ្ឋកិច្ចខេត្តកែប បានប្រាប់ឱ្យដឹង កាលពីព្រឹកថ្ងៃទី៦ មិថុនាថា ពលរដ្ឋចំនួន១៩នាក់ ត្រូវបានឃាត់ខ្លួនកាលពីព្រឹកថ្ងៃទី៤ មិថុនា ក្នុងនោះមានត្រាក់ទ័រ មួយគ្រឿងផង ពាក់ព័ន្ធនឹងការឈួសឆាយនិងកាប់ស្ការដីព្រៃនៅតួភ្នំពោនក្នុងស្រុកដំណាក់ចង្អើរ ។ លោក ង៉ែត ទូច បាននិយាយប្រាប់ឱ្យដឹងថា ការឃាត់ខ្លួនមនុស្សជាច្រើននាក់ ទៅកាប់ព្រៃលើភ្នំពោននេះក៏មានរដ្ឋបាលព្រៃឈើខេត្តកែបឆ្ការម្នាក់ចូលរួមផងដែរ ។
លោកបន្តថា បន្ទាប់ពីឃាត់ខ្លួននគរបាលក៏បានសួរនាំអ្នកពាក់ព័ន្ធឃើញថាមនុស្សចំនួន១៧នាក់ ជាអ្នកសុីឈ្នួលកាប់ឆ្ការព្រៃឱ្យគេ ត្រូវបានឱ្យត្រឡប់ទៅផ្ទះវិញ ។ ចំណែកឯមនុស្ស២នាក់ទៀត នគរបាលសហការជាមួយរដ្ឋបាលព្រៃឈើបានកសាងសុំណុំរឿងបញ្ជូនទៅកាន់តុលាការខេត្តកំពតកាលពីព្រឹកថ្ងៃទី៦ មិថុនា ព្រោះជាមេការធំ ។ ក្រោយបន្តិចមកឈ្មោះ២នាក់នេះត្រូវបានរួចខ្លួនពីបទចោទប្រកាន់ ហើយរលាស់ខ្លួនយ៉ាងស្អាតទៅផ្ទះវិញ ដែលមានលោក សារឿន ជាមេទាហានម្នាក់នៅពីក្រោយ ។ ចំណែកគ្រឿងចក្រឈូសឆាយ១គ្រឿងនេះ ក៏បានរបូតរលូតទៅតាមនឹងដែរ ។
លោក វង្យ សុផល នាយខណ្ឌរដ្ឋបាលព្រៃឈើខេត្តកែបបាននិយាយប្រាប់ឱ្យដឹង កាលពីព្រឹកថ្ងៃទី៦ ខែមិថុនាថា មុននិងឈានទៅដល់ការឃាត់អ្នករុករានដី នៅភ្នំពោននេះ អាជ្ញាធរជំនាញរដ្ឋបាលព្រៃឈើបានជួនដំណឹងជាផ្លូវការ របស់មន្ទីរកសិកម្មរុក្ខាប្រម៉ាញ់និងនេសាទខេត្តកែបជាច្រើនដងរួចមកហើយ ឱ្យអ្នកកាប់រុករានទន្ទ្រានយកដីភ្នំនោះ ផ្អាកធ្វើសកម្មភាព ។ ប៉ុន្តែការជូនដំណឹងរបស់អាជ្ញាធរខេត្តហាក់ដូចមិនមានប្រសិទ្ធភាព ទើបមានការឃាត់ខ្លួន
តាមបុរស២នាក់ដែលត្រូវឃាត់ខ្លួន ក៏ដូចប្រជាជនទាំង១៧នាក់ និយាយថា ពួកគេស៊ីឈ្នួលឱ្យឈ្មោះ សារឿន ជាមេទាហានម្នាក់ នៅក្រសួងការពារជាតិ ។ ពួកគេប្រាប់កោះសន្តិភាពថា លោក សារឿន មានដីនៅជិតជើងភ្នំពោននេះដែរ ម្ល៉ោះហើយក៏បានជួលអ្នកភូមិឱ្យជួយកាប់ឆ្ការព្រៃនៅតួភ្នំនេះ ចោលទាំងអស់ ដើម្បីវាតទីយកភ្នំទាំងមូលតែម្តង ។ ឯអ្នកស្រុកជាអ្នកស៊ីឈ្នួលគេទេ ព្រោះគាត់អាងសក្តិធ្ងន់ស្មា ។
ម្សិលមិញនេះ មិនអាចសុំការបំភ្លឺបានទេ ពីលោកសារឿន ។ ដរាបណាសុំការបំភ្លឺបានយើងនឹងចុះផ្សាយបន្តទៀត ។
ចែករំលែកព័តមាននេះ