ការស្រាវជ្រាវរបស់អូស្ត្រាលី ៖ ៤៧% នៃភូមិទាំងអស់នៅកម្ពុជាមានបណ្តាញទឹកស្អាតនៅត្រឹមឆ្នាំ២០២០
- ភ្នំពេញ
រាជធានីភ្នំពេញ ៖ នៅថ្ងៃទី ១៥ ខែមិថុនានេះ លោក Luke Arnold ភារធារីស្ថានទូតអូស្ត្រាលីប្រចាំនៅកម្ពុជា បានជួបជាមួយ…
រាជធានីភ្នំពេញ ៖ នៅថ្ងៃទី ១៥ ខែមិថុនានេះ លោក Luke Arnold ភារធារីស្ថានទូតអូស្ត្រាលីប្រចាំនៅកម្ពុជា បានជួបជាមួយ…
រាជធានីភ្នំពេញ ៖ នៅថ្ងៃទី ១៥ ខែមិថុនានេះ លោក Luke Arnold ភារធារីស្ថានទូតអូស្ត្រាលីប្រចាំនៅកម្ពុជា បានជួបជាមួយ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីជំរុញកិច្ចសហប្រតិបត្តិការទ្វេភាគី លើការទទួលបានទឹកស្អាតប្រើប្រាស់របស់ប្រជាពលរដ្ឋនៅតាមបណ្តាខេត្តនានា ក្នុងប្រទេសកម្ពុជា។
នៅក្នុងជំនួបនេះ លោក Arnold បានសង្ខេបពី របកគំហើញនៃការស្រាវជ្រាវ និងការវិភាគចុងក្រោយលើបណ្តាញទឹកស្អាតនៅតាមខេត្តនានា ដល់ថ្នាក់ដឹកនាំក្រសួងឧស្សាហកម្ម ការសិក្សាផែនការវិនិយោគខេត្ត (The Provincial Investment Plan /PIP) នេះ បង្ហាញថា ខណៈដែលមានតែ ៤៧% នៃភូមិទាំងអស់នៅកម្ពុជា មានបណ្តាញទឹកស្អាតនៅត្រឹមឆ្នាំ ២០២០ តួលេខនៃបណ្តាញទឹកស្អាតនេះ អាចកើនឡើងយ៉ាងឆាប់រហ័សតាមរយៈកិច្ចសហប្រតិបត្តិការនិងភាពជាដៃគូរវាង ស្ថាប័នសាធារណៈ និង ឯកជន ដើម្បីបង្កើនការវិនិយោគនិងនវានុវត្តន៍ ពីសំណាក់វិស័យឯកជន សម្រាប់ការផ្គត់ផ្គង់ទឹកស្អាត។
លោក Arnold មានប្រសាសន៍ថា «អូស្ត្រាលីនឹងបន្តធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជាដើម្បីអភិវឌ្ឍវិស័យទឹកស្អាតបន្ថែមទៀត នេះក៏ព្រោះតែផលប៉ះពាល់ដោយផ្ទាល់ទៅលើសុខភាព និងជីវភាពរស់នៅរបស់ប្រជាពលរដ្ឋ នៅពេលដែលពួកគាត់មានទឹកស្អាតប្រើប្រាស់នៅផ្ទះ» ។ ការសិក្សាដ៏មានសារៈសំខាន់នេះ បានបង្ហាញពីកាឡានុវត្តភាពសំខាន់ៗនានា ដើម្បីពង្រីកការផ្គត់ផ្គង់ទឹកស្អាត ក្រោមកិច្ចសហការ និងភាពជាដៃគូ រវាងស្ថាប័នសាធារណៈ និងឯកជន។
លោក Arnold ក៏បានពន្យល់បន្ថែមទៀតថា ការរួមចំណែករបស់ស្ថានទូតអូស្ត្រាលីទៅលើបណ្តាញទឹកស្អាតកម្ពុជា មានសង្គតភាពទៅនឹងកម្មវិធីអភិវឌ្ឍហេដ្ឋារចនាសម្ព័ន្ធរបស់អូស្ត្រាលី នៅកម្ពុជា រួមទាំងការផ្តល់អាទិភាពដល់គម្រោងមួយចំនួន ដែលត្រូវបានគាំទ្រថវិកា ប្រកបដោយចីរភាព និង ដែលផ្តល់នូវផលប្រយោជន៍ពិតប្រាកដសម្រាប់ពលរដ្ឋនៅកម្ពុជា។
លោក ចម ប្រសិទ្ធ បានថ្លែងនៅក្នុងព្រឹត្តិការណ៍នោះថា «រដ្ឋាភិបាលគ្រោងនឹងផ្តល់ទឹកស្អាត ១០០% ដល់ពលរដ្ឋនៅទីប្រជុំជននៅត្រឹមឆ្នាំ ២០២៥ ហើយផ្តល់ទឹកស្អាតដល់ប្រជាជនកម្ពុជាទាំងអស់ នៅត្រឹមឆ្នាំ ២០៣០។ ដោយមានប្រព័ន្ធទិន្នន័យ ដែលកម្មវិធី 3i បានអភិវឌ្ឍ ជាមួយអគ្គនាយកផ្គត់ផ្គង់ទឹកស្អាតរបស់ក្រសួង យើង ខ្ញុំជឿជាក់ថាយើងកំពុងស្ថិតនៅលើមាគ៌ាដ៏ត្រឹមត្រូវដើម្បីសម្រេចបាននូវគោលដៅនេះ។ ខ្ញុំសូមថ្លែងអំណរគុណដល់អូស្ត្រលី ចំពោះជំនួយនិងការងារទាំងអស់ដែលបានផ្តល់មកកាន់ក្រសួង»។
ការសិក្សាស្រាវជ្រាវមួយនេះ ត្រូវបានធ្វើឡើងដោយកម្មវិធីរបស់អូស្ត្រាលី «វិនិយោគក្នុងវិស័យហេដ្ឋារចនាសម្ព័ន្ធ (3i)” ដែលកម្មវិធីទាំងមូលមានទឹកប្រាក់ចំនួន ៤៩ លានដុល្លារអូស្ត្រាលីនៅក្នុងប្រទេសកម្ពុជា។ ការសិក្សាស្រាវជ្រាវនេះ បានវាយតម្លៃវិសាលភាពនៃការផ្គត់ផ្គង់ទឹកស្អាតនៅទូទាំងខេត្តចំនួន ២២ របស់ប្រទេសកម្ពុជា ហើយគណនាទឹកប្រាក់វិនិយោគសរុបដើម្បីផ្គត់ផ្គង់ទឹកស្អាតទៅកាន់ភូមិទាំងអស់នៅកម្ពុជាដែលមិនទាន់មានបណ្តាញទឹកស្អាតដើម្បីប្រើប្រាស់។
តាមរយៈកម្មវិធី3i អូស្ត្រាលីបានអនុម័ត និងវិនិយោគថវិកាជាង ១៩,៨ លានដុល្លារអូស្ត្រាលីដល់ប្រតិបត្តិករទឹកឯកជនចំនួនជិត ៨០ ដើម្បីបង្កើត និងពង្រីកការផ្គត់ផ្គង់ទឹកស្អាត ដល់គ្រួសារជនបទ។ នៅពេលដែលកម្មវិធីនេះបញ្ចប់ ពលរដ្ឋកម្ពុជាជាងមួយលាននាក់ នឹងមានទឹកស្អាតប្រើប្រាស់ដោយសារកម្មវិធី3i ៕
ចែករំលែកព័តមាននេះ