ខេត្តកណ្តាល ៖ អ្នកគ្រូក្រមុំស្រស់សោភាម្នាក់បង្រៀននៅសាលាឯកជនប៊ែលធី សាខាក្រុងតាខ្មៅ ត្រូវឃាតករចាក់ច្រើនកាំបិត សម្លាប់ក្នុងរូបភាពយ៉ាងសាហាវព្រៃផ្សៃ នៅក្បែរដីចំការជាកន្លែងស្ងាត់ចុងភូមិស្វាយតានី ឃុំព្រែកគយ ស្រុកស្អាង ។ សពអ្នកគ្រូត្រូវបានអ្នកភូមិទៅធ្វើចម្ការប្រទះឃើញ កាលពីម៉ោង៦ព្រឹក ថ្ងៃទី២០ វិច្ឆិកា និងបង្កឱ្យមានការភ្ញាក់ផ្អើលដល់អ្នកភូមិ។
មន្ត្រីនគរបាលស្រុកស្អាង ដែលទៅពិនិត្យកន្លែងកើតហេតុបានឱ្យដឹងថា អ្នកគ្រូរងគ្រោះឈ្មោះ ផែន សុធាវី អាយុ២៣ឆ្នាំ ជាគ្រូបង្រៀនភាសាអង់គ្លេស នៅសាលារៀនប៊ែលធី នៅក្រុងតាខ្មៅ មានស្រុកកំណើតនៅភូមិសំប៉ានលើ ឃុំព្រែកអំបិល ស្រុកស្អាង ។ នៅព្រឹកថ្ងៃទី២០ វិច្ឆិកា នគរបាលទទួលព័ត៌មានថា មានប្រជាជនទៅធ្វើចម្ការ បានប្រទះឃើញសពដេកស្លាប់នៅក្បែរផ្លូវលំទៅចម្កា អ្នកភូមិ ។
ក្រោយពីទទួលព័ត៌មាននេះភ្លាម នគរបាលស្រុក និងនគរបាលជំនាញខេត្ត បានទៅពិនិត្យសពឃើញថា សពអ្នកគ្រូរងគ្រោះត្រូវឃាតករសម្លាប់ក្នុងចន្លោះពីម៉ោង៩ទៅ១១យប់ ថ្ងៃទី១៩ វិច្ឆិកា ។ សពមានស្នាមចាក់ដោយកូនកាំបិតលើដងខ្លួនច្រើនកន្លែង ស្ទើរសុះសាច់ពីខាងមុខ ។ សពស្លៀកខោខូវប៊យជើងវែង និងពាក់អាវយឺតដៃវែង មានកាបូបមួយនៅស្ពាយពីក្រោយខ្នង និងមានស្បែកជើងពាក់ជាប់នៅនឹងជើង ។ នៅក្នុងកាបូបស្ពាយជនរងគ្រោះមានទូរស័ព្ទដៃម៉ាកសាំសុងមួយគ្រឿង និងឯកសារផ្សេងៗមួយចំនួន ។
មន្ត្រីនគរបាលបានបញ្ជាក់ឱ្យដឹងទៀតថា ករណីនេះ នគរបាលកំពុងស្រាវជ្រាវ និងសន្និដ្ឋានជំហានដំបូងថា អាចជាករណីឃាតកម្ម ដោយរឿងគំនុំ ឬជារឿងសម្លាប់បំបិតមាត់រឿងអ្វីមួយ ។ ប៉ុន្តែមិនបានបញ្ជាក់ច្បាស់លាស់ទេ ព្រោះកំពុងស្រាវជ្រាវ តែបានកំណត់មុខសញ្ញាជនសង្ស័យខ្លះៗហើយ និងបានហៅមកសាកសួរ ដោយសាររកភស្តុតាងដាក់បន្ទុកមិនទាន់បាននៅទ្បើយ ។
បើតាមអ្នកដែលទៅចោមរោមមើលសពបាននិយាយថា ករណីសម្លាប់អ្នកគ្រូសាលាឯកជននេះ ជាករណីប្លន់យកម៉ូតូដែលជនរងគ្រោះជិះម៉ាកគុបជ្រុងសេ50 ព្រោះក្រោយពីកើតហេតុម៉ូតូរបស់អ្នកគ្រូរងគ្រោះបានបាត់ផងដែរ ។
បើតាមសាច់ញាតិនារីរងគ្រោះបានឱ្យដឹងថា អ្នកគ្រូបង្រៀនភាសាអង់គ្លេសរូបនេះ បានមកជួលបន្ទប់ស្នាក់នៅក្បែរ សាលារៀន១សប្តាហ៍ឬ២សប្តាហ៍ ទើបទៅផ្ទះម្តង ដោយមានម៉ូតូគុបជ្រុងសេ៥០មួយគ្រឿងជាមធ្យោបាយធ្វើដំណើរ។ នៅថ្ងៃកើតហេតុ ក្រុមគ្រួសារក៏មិនបានដឹងថានាងទៅណាមកណាដែរ រហូតដល់ព្រឹកថ្ងៃទី២០ វិច្ឆិកា ក៏ទទួលព័ត៌មានថា អ្នកគ្រូត្រូវគេសម្លាប់ ប៉ុន្តែមិនដឹងពីមូលហេតុអ្វីច្បាស់ទេ គ្រាន់តែដឹងថា បានបាត់ម៉ូតូដែលនាងធ្លាប់ជិះនោះ ។
សពនារីរងគ្រោះត្រូវបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។
ព័ត៌មានចុងក្រោយនៅវេលារសៀលថ្ងៃដដែល បុរសជាគ្រូបង្រៀននៅសាលាជាមួយគ្នាឈ្មោះ រុំ សុខលាង អាយុ២១ឆ្នាំ បានសារភាពថា ខ្លួនជាអ្នកសម្លាប់អ្នកគ្រូរូបនោះ ។ ទាក់ទិនដល់ការកាប់សម្លាប់នេះ ត្រូវបានបុរសឈ្មោះ សុខលាងសារភាពថា ពួកខ្លួនជាសង្សារនឹងគ្នា តែគេមិនចង់ឈានទៅដល់ការយកគ្នាជាប្តីប្រពន្ធទេ ដោយសារតែនាងប្រចណ្ឌពេក និងតែងរំអុករូបគេឲ្យទៅចុះអេតាស៊ីវិល ។
ដោយការធុញចប់អារម្មណ៍ក៏មានគំនិតត្រូវតែសម្លាប់ទើបប្រើល្បិចបបួលទៅចុះអេតាស៊ីវិល(សំបុត្រអាពាហ៍ពិពាហ៍) ហើយឆក់ឱកាសដល់កន្លែងស្ងាត់ក៏ចាក់សម្លាប់តែម្តង គឺច្រើនជាង២០កាំបិត ។ ទោះបីជាបែបណា ទាក់ទងនឹងម៉ូតូរបស់នាងដែលបាត់នោះមិនទាន់ត្រូវបានដឹងថានៅទីណាទេ ដែលសមត្ថកិច្ចសង្ស័យថា អាចមានអ្នករួមគំនិតផងដែរដែលតម្រូវឱ្យធ្វើការស្រាវជ្រាវបន្ត ៕
ចែករំលែកព័តមាននេះ