រាជធានីភ្នំពេញ ៖ រថយន្តកូរ៉េមួយគ្រឿង ដោយសារតែអ្នកបើកបរស្រវឹង បានរេចង្កូតទៅបុកក្បាលនាគពុះចែកផ្លូវបាក់អស់១កង់ កាលពីវេលាម៉ោង០៩ និង៣០នាទីយប់ថ្ងៃទី១៩ វិច្ឆិកា ២០១៥ ស្ថិតនៅមុខខារ៉ាអូខេវីនីស តាមបណ្ដោយផ្លូវព្រះមុន្នីរ៉េត ក្នុងសង្កាត់ទួលស្វាយព្រៃ២ ខណ្ឌចំការមន។
រថយន្តបង្កប្រភេទកូរ៉េចំណុះ១តោនកន្លះ ជារថយន្តដឹកខ្សាច់ និងដឹកថ្មពណ៌ខៀវ ពាក់ស្លាកលេខភ្នំពេញ 2C-9571 ជិះគ្នា២នាក់មិនស្គាល់អត្តសញ្ញាណ បើកបរក្នុងទិសដៅពីកើតទៅលិចក្នុងស្ថានភាពស្រវឹង ។ តាមប្រភពពីសន្តិសុខយាមនៅមុខកន្លែងកើតហេតុឱ្យដឹងថា មុនពេលកើតហេតុ គេឃើញរថយន្តបង្កជិះគ្នា២នាក់ក្នុងល្បឿនលឿន ហើយស្រវឹងស្រាផង ជិះក្នុងទិសដៅពីកើតទៅលិច លុះមកដល់ចំណុចខាងលើ ស្រាប់តែរថយន្តបានរេចង្កូតទៅខាងឆ្វេងទៅបុកក្បាលនាគពុះចែកទ្រូងផ្លូវ បណ្ដាលឱ្យបាក់១កង់ ធ្វើឱ្យយរថយន្តបែកធុងទឹក និងដាច់កាឡេកង់មុខខាងឆ្វេង មិនអាចបន្តដំណើរទៅមុខទៀតបាន តែមិនបណ្តាលឱ្យមានគ្រោះថ្នាក់ដល់មនុស្សទេ។
ភ្លាមៗនោះ គេឃើញអ្នកបើកបរ និងអ្នករួមដំណើរក្នុងរថយន្តបានបើកទ្វាររថយន្ត ហើយរត់គេចខ្លួនបាត់ បន្សល់ទុកតែរថយន្តនៅនិងកន្លែងកើតហេតុ ត្រូវបានសមត្ថកិច្ចស្ទូចយកទៅកាន់ការិយាល័យចរាចរណ៍ជើងគោករាជធានីភ្នំពេញ ដើម្បីធ្វើការដោះស្រាយនៅពេលក្រោយ ។
ចែករំលែកព័តមាននេះ