ខេត្តបន្ទាយមានជ័យ ៖ យុវជនម្នាក់បានបាត់ពីផ្ទះរយៈពេល២ថ្ងៃ លុះព្រឹកឡើងថ្ងៃទី១៩ វិច្ឆិកា ២០១៥ ភ្ញាក់ផ្អើលប្រទះឃើញសពអណ្តែតក្នុងទឹកស្ទឹងជិតស្ពានថ្មីព្រះពន្លា ស្ថិតក្នុងភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
ប្រភពបានឱ្យដឹងថា ជនរងគ្រោះឈ្មោះអៀ អ៊ីវឆាយ អាយុ២១ឆ្នាំ មានទីលំនៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
ប្រភពឪពុក-ម្តាយបានប្រាប់សមត្ថកិច្ចថា កាលពីថ្ងៃទី១៧ វិច្ចិកា ២០១៥ កូនប្រុសរបស់គាត់ (សព) បានសុំពួកគាត់ទិញម៉ូតូថ្មី១គ្រឿងម៉ាកស្គូពី ប៉ុន្តែពួកគាត់មិនព្រម លុះដល់វេលាម៉ោង០៨ និង៣០នាទីយប់ថ្ងៃដដែលបាត់កូនពីផ្ទះ ហើយពួកគាត់ដើររក ក៏ប្រទះឃើញមកអង្គុយនៅក្រោមដើមអំពិល ក្បែរស្ទឹងជិតស្ពានថ្មស្ពានព្រះពន្លា ហើយពួកគាត់អង្វរលួងលោមឱ្យទៅផ្ទះវិញ ។ បន្ទាប់ពីគេទៅផ្ទះបានកន្លះម៉ោងក្រោយមក នៅយប់ថ្ងៃដដែលនោះ ក៏បានរត់ចេញពីផ្ទះម្តងទៀត ។ លុះព្រឹកឡើងឮថា គេប្រទះឃើញសពមនុស្សប្រុសស្លាប់អណ្តែតក្នុងទឹកស្ទឹង ពេលគាត់មកមើល ទើបដឹងថា ជាសពកូនប្រុសរបស់គាត់ ។
លោកអធិការក្រុងសិរីសោភ័ណបានបញ្ជាក់ថា តាមការត្រួតពិនិត្យនោះ សពគឺពិតជាស្លាប់ដោយសារលង់ទឹកពិតប្រាកដមែន ។
ចែករំលែកព័តមាននេះ