រាជធានីភ្នំពេញ ៖ លោក ផ្លុង មឿក ហៅតាមឿក តារាកំប្លែងជើងចាស់ វ័យ៨៣ឆ្នាំ កំពុងតែញាំញីដោយជំងឺប្រចាំកាយ រួមទាំងវ័យជរា និងជីវភាពខ្វះខាតផងនោះ កាលពីថ្ងៃទី១៨ វិច្ឆិកា ២០១៥នេះ បានទទួលអំណោយមនុស្សធម៌មួយចំនួន និងថវិកា៤លានរៀលពីចលនាយុវជនកម្ពុជាក្រុម១៥៧ តាមរយៈលោក ម៉ឹង ពន្លក ក្រោយពីទទួលបាននូវការផ្តាំផ្ញើរបស់កូនស្រីតាមឿកនៅសហរដ្ឋអាមេរិក។
លោក ម៉ឹង ពន្លក ប្រធានចលនាយុវជនកម្ពុជា ក្រុម១៥៧ បានឲ្យដឹងថា ខណៈលោក និងក្រុមយុវជនបានទៅបំពេញទស្សនកិច្ចនៅសហរដ្ឋអាមេរិក កាលពីដើមខែវិច្ឆិកានោះ កូនស្រីលោកតាមឿក ដែលរស់នៅក្រុងឡុងប៊ិច រដ្ឋកាលីហ្វ័រនីញ៉ា បានផ្តាំផ្ញើ និងពឹងពាក់ឲ្យជួយមើលឳពុកគាត់ គឺលោកតា ផ្លុង មឿក ដែលកំពុងរស់នៅស្រុកខ្មែរ មានជីវភាពខ្វះខាត។
លោក ម៉ឹង ពន្លក បានបញ្ជាក់ថា បន្ទាប់ពីទទួលបានការផ្តាំផ្ញើពីកូនស្រីរបស់តាមឿក លោកក៏បានចាត់ចែងឲ្យសមាជិកក្រុម១៥៧ ស្វែងរកកន្លែងស្នាក់នៅរបស់តាមឿក និងបានរៃអង្គាសប្រាក់គ្នាម្នាក់បន្តិចៗ សរុបចំនួន១.០០០ដុល្លារ ដើម្បីផ្តល់ជូនលោកតាមឿក ដល់គេហដ្ឋានតែម្តង។
លោក ម៉ឹង ពន្លក បានមានប្រាសាសន៍បន្ថែមទៀតថា ក្រៅពីថវិកាចំនួន៤លានរៀល របស់សមាជិកសជិការក្រុម១៥៧នៅមានអំណោយមនុស្សធម៌មួយចំនួនទៀតដែលផ្តល់ជូនតាមឿក ក្នុងនោះរួមមាន រទេះរុញចំនួនពីរគ្រឿងដែលជាអំណោយ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្តល់ជូនតាមឿក និងប្រពន្ធ ដែលជរា និងមានជំងឺមិនអាចធ្វើដំណើរដោយខ្លួនឯងបាន និងទឹកដោះគោ ១កេសធំ, ទូរសទ្សន៍១គ្រឿង ទឹកត្រី១យួរ ទឹកស៊ីអីវ១យួរ រួមទាំងអង្ករ២៥០គីឡូក្រាម។
សូមបញ្ជាក់ថា លោក ផ្លុង មឿក តារាកំប្លែងជើងចាស់ បច្ចុប្បន្ននេះមានវ័យ៨៣ឆ្នាំ និងប្រពន្ធឈ្មោះ ពិ រា វ័យ៧៩ឆ្នាំ ដែលមានជំងឺស្លាប់មួយចំហៀងខ្លួន រស់នៅជាមួយកូនស្រីទី៤ ក្នុងផ្ទះជួលលេខGB17 ម្តុំប៊ូឌីង សង្លាត់ទន្លេបាសាក់ ខណ្ឌចំការមន៕
ចែករំលែកព័តមាននេះ