៧ពន្ធនាគារ ឆ្លងកូវីដ ក្នុងនោះ អ្នកជាប់ឃុំ ជាង ១ម៉ឺននាក់ បានចាក់វ៉ាក់សាំង
- ភ្នំពេញ
ភ្នំពេញ៖ យ៉ាងហោចណាស់ មានពន្ធនាគារ ចំនួន ៧ បានឆ្លងជំងឺកូវីដ១៩ រួមមាន៖ ពន្ធនាគារខេត្តព្រះសីហនុ មណ្ឌលអប់រំកែប្រែទី១ មណ្ឌលអប់រំកែប្រែទី២…
ភ្នំពេញ៖ យ៉ាងហោចណាស់ មានពន្ធនាគារ ចំនួន ៧ បានឆ្លងជំងឺកូវីដ១៩ រួមមាន៖ ពន្ធនាគារខេត្តព្រះសីហនុ មណ្ឌលអប់រំកែប្រែទី១ មណ្ឌលអប់រំកែប្រែទី២…
ភ្នំពេញ៖ យ៉ាងហោចណាស់ មានពន្ធនាគារ ចំនួន ៧ បានឆ្លងជំងឺកូវីដ១៩ រួមមាន៖ ពន្ធនាគារខេត្តព្រះសីហនុ មណ្ឌលអប់រំកែប្រែទី១ មណ្ឌលអប់រំកែប្រែទី២ ពន្ធនាគាររាជធានីភ្នំពេញ ពន្ធនាគារខេត្តកណ្តាល ពន្ធនាគារខេត្តកំពង់ស្ពឺ និងពន្ធនាគារខេត្តបន្ទាយមានជ័យ។ ក្នុងពេលមានអ្នកឆ្លងកូវីដ១៩ នៅក្នុងពន្ធនាគារនេះ ក្រុមអ្នកជាប់ឃុំ ក៏ត្រូវបានចាក់វ៉ាក់សាំងបង្ការជំងឺកូវីដ១៩ បានជាង ១ម៉ឺននាក់ហើយ។
សេចក្តីប្រកាសរបស់អគ្គនាយកដ្ឋានពន្ធនាគារ ចុះថ្ងៃទី១១ ខែមិថុនា ឆ្នាំ២០២១ បង្ហាញថា ស្ថានភាពនៃជំងឺកូវីដ១៩ ក្នុងពន្ធនាគារ នៅកម្ពុជា មកដល់ពេលនេះ មានចំនួន ៧ពន្ធនាគារ រួមមាន៖ ពន្ធនាគារខេត្តព្រះសីហនុ មណ្ឌលអប់រំកែប្រែទី១ មណ្ឌលអប់រំកែប្រែទី២ ពន្ធនាគាររាជធានីភ្នំពេញ ពន្ធនាគារខេត្តកណ្តាល ពន្ធនាគារខេត្តកំពង់ស្ពឺ និងពន្ធនាគារខេត្តបន្ទាយមានជ័យ។ ក្នុងនោះ ជំងឺកូវីដ១៩ នៅពន្ធនាគារខេត្តព្រះសីហនុ កាលពីចុងសប្តាហ៍ទី១ នៃខែឧសភា គឺកើតឡើងដំបូង លើជនជាតិចិន ម្នាក់ ដែលត្រូវបណ្តេញចេញ ពេលអនុវត្តទោសចប់។ ដោយឡែក នៅពន្ធនាគារ ៦ផ្សេងទៀត ដែលមានការឆ្លងរាលដាលជំងឺកូវីដ១៩ មិនត្រូវបានអគ្គនាយកដ្ឋានពន្ធនាគារ លើកបង្ហាញពីប្រភពនៃការឆ្លងជំងឺកូវីដ១៩ ឡើយ។ ក្នុងនោះ ចំនួនអ្នកជាប់ឃុំ រួមទាំងមន្ត្រីអនុរក្សពន្ធនាគារ ដែលឆ្លងកូវីដ នៅក្នុងពន្ធនាគារទាំង ៧នោះ ក៏មិនត្រូវបានអគ្គនាយកដ្ឋានពន្ធនាគារ បង្ហាញពីចំនួនឲ្យដឹងជាក់លាក់ទេ តែថា ការឆ្លងនៅកន្លែងនីមួយៗ មានប្រមាណពី ១០ ទៅ ២០% នៃចំនួនជនជាប់ឃុំសរុប។
អគ្គនាយកដ្ឋានពន្ធនាគារ លើកឡើងថា «យើងបានញែកចេញដាក់នៅដោយឡែក ហើយដំណើរការព្យាបាលតាមច្ចេកទេសសុខាភិាល បូកផ្សំនូវការយកចិត្តទុកដាក់ បំបិនអាហាររូបត្ថម្ភបន្ថែម ដាំទឹកក្រូចឆ្មារ ទឹកស្លឹកគ្រៃ ទឹកខ្ញី ឲ្យហូបជាប្រចាំ គួបផ្សំការចេញហាត់ប្រាណទៀងទាត់ជាប្រចាំ ឃើញថា ស្ថានភាពសុខភាពរបស់ពួកគេបានល្អប្រសើរ ចំពោះអ្នកដែលមានជំងឺប្រចាំកាយ ដូចជា សួត របេង អេដស៍។ល។ ធ្ងន់ធ្ងរ យើងបញ្ជូនទៅព្យាបាលនៅមន្ទីរពេទ្យខាងក្រៅ តាមគោលការណ៍សុខាភិបាល»។
យ៉ាងណាក៏ដោយ ក្នុងសេចក្តីប្រកាស អគ្គនាយកដ្ឋានពន្ធនាគារ បានលើកឡើងថា ជនជាប់ឃុំ នៅមណ្ឌលអប់រំកែប្រែទី១ ទី២ ពន្ធនាគារខេត្តព្រះសីហនុ និងពន្ធនាគាររាជធានីភ្នំពេញ ប្រមាណជាង ១ម៉ឺននាក់ បានចាក់វ៉ាក់សាំងការពារជំងឺកូវីដ១៩ ប្រភេទ Sinovac គ្រប់ចំនួនទាំង ២ដូស។ ថ្មីៗនេះ សម្តេចតេជោ ក៏បានផ្តល់វ៉ាក់សាំងការពារជំងឺកូវីដ១៩ ប្រភេទ Covishield ( Astra Zeneca ) ដើម្បីចាក់ដល់ជនជាប់ឃុំ នៅពន្ធនាគារខេត្តកណ្តាល កំពង់ស្ពឺ បន្ទាយមានជ័យ កំពត និងពន្ធនាគារខេត្តស្វាយរៀង ចំនួន ៦៧៦០ដូសថែមទៀត។
សេចក្តីប្រកាស ក៏បានលើកឡើងថា ក្រោមការជ្រោមជ្រែងពីអាជ្ញាធរសុខាភិបាល អគ្គនាយកដ្ឋានពន្ធនាគារ បានសម្របសម្រួលការពិនិត្យសំណាកជនជាប់ឃុំទាំងអស់ ចំនួន ៣លើក បន្ទាប់ពីបានរកឃើញថា មានការផ្ទុះរាលដាលនៃជំងឺកូវីដ១៩ នៅតាមមណ្ឌលអប់រំកែប្រែ និងពន្ធនាគាររាជធានីខេត្ត ទាំង ៧ពន្ធនាគារ ហើយជាលទ្ធផល គិតត្រឹមថ្ងៃទី១១ ខែមិថុនា ឆ្នាំ២០២១ អ្នកជំងឺកូវីដ១៩ បានជាសះស្បើយមួយចំនួនធំ នៅគ្រប់គោលដៅទាំងអស់ ជាពិសេសខេត្តព្រះសីហនុ ពិនិត្យឃើញអវិជ្ជមានប្រមាណ ៩២% នៃចំនួនអ្នកឆ្លងសរុប៕
ចែករំលែកព័តមាននេះ