សហព័ន្ធបាល់ទាត់អឺរ៉ុប (UEFA) បានអះអាងជាថ្មីថា ព្រឹត្តិការណ៍ប្រកួតជ្រើសរើសជើងឯកអឺរ៉ុប២០១៦(Euro 2016) គឺមិនមានការកែប្រែ និងផ្លាស់ប្តូរទីកន្លែងក្រៅពីប្រទេសបារាំងឡើយ ។
នៅក្នុងសេចក្តីថ្លែងការណ៍កាលពីថ្ងៃចន្ទសប្តាហ៍នេះ សហព័ន្ធUEFAបាននិយាយថា ខ្លួនបានធ្វើការងារជាមួយអាជ្ញាធរបារាំងអស់៣ឆ្នាំហើយដើម្បីធានាសុវត្ថិភាព និងសន្តិសុខព្រឹត្តិការណ៍ប្រកួត ។ សេចក្តីថ្លែងការណ៍បានបន្ថែមថា៖ «យើងមានទំនុកចិត្តថា វិធានការចាំបាច់នានានឹងត្រូវយកមកអនុវត្តដើម្បីធានាបាននូវសន្តិសុខ និងសុវត្ថិភាព» ។
គួរកត់សម្គាល់ថា ឱកាសធ្វើជាម្ចាស់ផ្ទះព្រឹត្តិការណ៍ប្រកួតបាល់ទាត់ជើងឯកអឺរ៉ុបឆ្នាំ២០១៦របស់បារាំងបានស្ថិតនៅក្រោមការពិនិត្យពិច័យសាជាថ្មី ក្រោយពីផ្ទុះការវាយប្រហារមួយនៅទីក្រុងប៉ារីស កាលពីរាត្រីថ្ងៃសុក្រដែលបានសម្លាប់មនុស្សអស់១២៩នាក់ ។
មន្ត្រីរៀបចំព្រឹត្តិការណ៍ប្រកួតខាងលើលោក Jacques Lambert បានទទួលស្គាល់ថា កម្រិតនៃហានិភ័យបានកើនឡើងខ្ពស់ ប៉ុន្តែថា ការពិចារណាលុបចោល Euro2016 គឺនឹងក្លាយជាល្បែងលេងរបស់ពួកភេរវជនទៅវិញ ។ លោកបានបន្តថា ៖ «យើងនឹងធ្វើសេចក្តីសម្រេចចិត្តយ៉ាងចាំបាច់មួយដើម្បីឱ្យ Euro2016 ប្រព្រឹត្តទៅក្នុងលក្ខខណ្ឌសុវត្ថិភាពបំផុត» ។
សូមបញ្ជាក់ថា ព្រឹត្តិការណ៍ប្រកួតបាល់ទាត់ Euro2016 នឹងប្រារព្ធធ្វើនៅប្រទេសបារាំងចាប់ពីថ្ងៃទី១០ ខែមិថុនា ដល់ថ្ងៃទី១០ ខែកក្កដា ។ ការចាប់គូលើកចុងក្រោយនឹងធ្វើនៅទីលានប្រគំតន្ត្រី Palais des congrès de Paris ទីក្រុងប៉ារីស ថ្ងៃទី១២ ខែធ្នូ ឆ្នាំ២០១៥ ៕
ចែករំលែកព័តមាននេះ