រាជធានីភ្នំពេញ ៖ តាមការណែនាំពីក្រសួងការបរទេស និងសហប្រតិបត្តិការអន្តរជាតិ លោកឯកអគ្គរាជទូតកម្ពុជាប្រចាំនៅប្រទេសឥណ្ឌា បានជួបពិភាក្សាការងារជាមួយលោកជំទាវ Monika K.Mohta លេខាធិការ នៃក្រសួងការបរទេសឥណ្ឌា និងលោក Shri K.K Mittal លេខាធិការនៃក្រសួងវប្បធម៌ឥណ្ឌា ពាក់ព័ន្ធនឹងការសាងសង់ប្រាសាទចម្លងតាមរចនាបថប្រាសាទអង្គរវត្ត នៅរដ្ឋ Bihar ប្រទេសឥណ្ឌា។ នេះបើយោងតាមការប្រកាសឱ្យដឹងពីលោកជុំ សុន្ទរី អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ នៅថ្ងៃទី១៧ វិច្ឆិកា ។
ជាលទ្ធផលនៃការជួបពិភាក្សានេះ លោកជំទាវ Monika K.Mohta លេខាធិការក្រសួងការបរទេសឥណ្ឌា បានលើកទ្បើងថា រដ្ឋាភិបាលឥណ្ឌានឹងទប់ស្កាត់មិនឱ្យមានការសាងសង់ទេ ។ ក្រសួងបានជម្រាបក្រុមហ៊ុន The Mahavir Mandir Trust មិនឱ្យសាងសង់ប្រាសាទចម្លងតាមរចនាបថប្រាសាទអង្គរវត្តទ្បើយ ។
ក្រុមហ៊ុននេះបានសន្យាថា នឹងមិនសាងសង់ប្រាសាទចម្លងតាមរចនាបថប្រាសាទអង្គរវត្តទេ ប៉ុន្តែសុំសាងសង់ប្រាសាទមានរចនាបថប្រាសាទឥណ្ឌា ហើយនឹងបញ្ជូនគម្រោងសាងសង់នេះទៅក្រសួងវប្បធម៌ និងក្រសួងការបរទេសឥណ្ឌា ដើម្បីស្នើសុំការសាងសង់ ។
ចំណែកលោក Shri K.K Mittal លេខាធិការក្រសួងវប្បធម៌ឥណ្ឌា បានលើកទ្បើងថា ក្រសួងវប្បធម៌ឥណ្ឌា នឹងធ្វើការសិក្សា និងបញ្ជូនគម្រោងថ្មីនេះ ទៅក្រសួងការបរទេសឥណ្ឌា ៕
ចែករំលែកព័តមាននេះ