រាជធានីភ្នំពេញ ៖ កម្មករ កម្មការីនី បាននាំគ្នារត់ចេញពីតំបន់បិទខ្ទប់ជុំវិញ រោងចក្រហ្គ្រេនធ្វីន អ៊ីនធើណេសិនណល(ខេមបូឌា)ភីអិលស៊ី ហៅរោងចក្រQMI បន្ទាប់ពីអាជ្ញាធរសង្កាត់ចោមចៅទី៣ ដឹករនាំងដែកត្រៀមបិទខ្ទប់ ។ នេះបើតាមអាជ្ញាធរ មូលដ្ឋាន ក៍ដូចជាប្រជាពលរដ្ឋ ដែលជាម្ចាស់ ផ្ទះជួលរស់នៅ តំបន់ដែលត្រូវបិទខ្ទប់ នោះ។
តាមព័ត៌មានអោយដឹងទៀតថា កម្មករកម្មការីនី បាននាំគ្នាវេចបង្វិចរត់ចេញជាបន្តបន្ទាប់ នៅវេលាល្ងាច និងយប់ថ្ងៃទី៨ ខែ មិថុនា ឆ្នាំ២០២១ បន្ទាប់ពី អាជ្ញាធរ សង្កាត់ចោមចៅទី៣ ព្រមទាំងភូមិ បានដឹករនាំងដែកទៅដាក់ពង្រាយ នៅជុំវិញរោងចក្រកាត់ដេរហ្គ្រេនធ្វីន អ៊ីនធើណេសិនណល(ខេមបូឌា)ភីអិលស៊ី ហៅរោងចក្រQMI ដើម្បីត្រៀមបិទខ្ទប់មុនចេញសេចក្ដីសម្រេចរបស់រដ្ឋបាលរាជធានីភ្នំពេញដែលបានកំណត់ជា«តំបន់លឿងទុំ»។
តាមម្ចាស់ផ្ទះជួលម្នាក់ នៅក្នុងភូមិព្រៃព្រីងខាងជើង២ សង្កាត់ចោមចៅទី៣ បានអោយកោះសន្តិភាពដឹងនៅមុខប្រធានភូមិថា កម្មករបាននាំគ្នារត់ចេញអស់ប្រមាណ៤០ភាគរយ ចេញពីផ្ទះជួលរបស់គាត់ទៅរស់នៅតំបន់ខាងក្រៅ បន្ទាប់ពីដឹងថា អាជ្ញាធរ ត្រៀមបិទខ្ទប់។
តាមម្ចាស់ផ្ទះជួលខ្លះទៀត បានអោយដឹងថា កម្មករបានបិទទ្វារ រត់ចេញស្ទើរអស់ នៅវេលាល្ងាច បន្ទាប់ពីទំលាក់រនាំងដែក បានប្រមាណ១ម៉ោង និងបានចាកចេញជាបន្តបន្ទាប់រហូតដល់យប់។
តាមប្រភពពីកម្មករបានលើកហេតុផលថា ពួកគាត់មិនសុខចិត្តរស់នៅដោយវេទនានៅក្នុងតំបន់បិទខ្ទប់ឡើយ ព្រោះមិនអាចចេញចូលទៅទិញ អីវ៉ាន់ ឬទៅធ្វើការបាន, ណាមួយមួយរោងចក្រ QMI បានបិទទ្វារ មិនបានបើកប្រាក់ខែអោយកម្មករទៀត តើមានប្រាក់ឯណាទិញបាយហូប។ ដោយសារតែស្ថានភាពលំបាក់បែបនេះទើបរត់ចេញទៅនៅកន្លែងផ្សេងមួយរយះសិន ។
នៅព្រឹកថ្ងៃទី៨ ខែ មិថុនា ឆ្នាំ២០២១ ប្រធានភូមិព្រៃព្រីងខាងជើង២ ក៍បានបន្តចុះទៅស្រង់ស្ថិតិកម្មករ កម្មការីនីស្នាក់នៅបន្ទប់ជួលតាមការណែនាំរបស់អាជ្ញាធរខណ្ឌសង្កាត់ ដើម្បីចុះជួយឧបត្ថម្ភនៅពេលបិទខ្ទប់ ក៍បានអោយដឹងថា កម្មករមួយចំនួនពិតជាបានរត់ចេញពីផ្ទះជួល ដែលត្រូវបិទខ្ទប់នោះមែន។
គួរបញ្ជាក់ថា កម្មករ កម្មការីនីនៅរោងចក្រកាត់ដេរហ្គ្រេនធ្វីន អ៊ីនធើណេសិនណល(ខេមបូឌា)ភីអិលស៊ី ហៅរោងចក្រQMI ត្រូវបានរកឃើញវិជ្ជមានកូវីដជាបន្តបន្ទាប់រហូតដល់៣០២នាក់ កាលពីថ្ងៃទី៤-៥ និងទី៦ ខែមិថុនា ឆ្នាំ២០២១។ បន្ទាប់ពីផ្ទុះកូវីដ នៅវេលាល្ងាច និងយប់ថ្ងៃទី៦ ខែមិថុនា កម្មករ កម្មការីនីដែលធ្វើការនៅរោងចក្រផ្សេងៗ និងប្រជាពលរដ្ឋ ដែលស្នាក់នៅ ជុំវិញរោងចក្រនោះមានការភ្ញាក់ផ្អើលយ៉ាងខ្លាំងបន្ទាប់ពី ឃើញ រថយន្តបើកស៊ីរ៉ែនជាច្រើនគ្រឿងចេញចូលដឹកអ្នកជំងឺរហូតដល់យប់ជ្រៅ ។
ភ្លាមៗ អាជ្ញាធរមិនទាន់មានវិធានការនោះទេ ទុករយះពេល២ថ្ងៃ រហូតដល់រសៀលថ្ងៃទី៨ ខែ មិថុនា ឆ្នាំ ២០២១ ទើបអាជ្ញាធរ បានដឹករនាំងដែកត្រៀមបិទខ្ទប់តាមសម្រេចរបស់រដ្ឋបាលរាជធានីភ្នំពេញដែលបាន កំណត់ផ្នែកខ្លះ នៃភូមិចោមចៅ៣ នៃសង្កាត់ចោមចៅទី២ និងផ្នែកខ្លះនៃភូមិត្រពាំងពោធិ៍ ផ្នែកខ្លះ នៃភូមិព្រៃព្រីងខាងជើង២ និងផ្នែកខ្លះនៃភូមិជម្ពូវ័ន២ នៃសង្កាត់ចោមចៅទី៣ ខណ្ឌពោធិ៍សែនជ័យ ជា“តំបន់លឿងទុំ” សម្រាប់រយៈពេល១៤ថ្ងៃ គិតចាប់ពីម៉ោងសូន្យ នាថ្ងៃទី១០ រហូតដល់ថ្ងៃទី២៣ ខែមិថុនា ឆ្នាំ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ។
ទន្ទឹមការដាក់រនាំងដែក អាជ្ញាធរពុំបានដាក់កម្លាំងបិទខ្ទប់នោះទេ ទើបនៅវេលាម៉ោងប្រមាណ៩និង៣០នាទីព្រឹកថ្ងៃទី៩ ខែ មិថុនា ឆ្នាំ២០២១ អាជ្ញាធរក៍បានដាក់កម្លាំងបិទខ្ទប់ទាំងស្រុង គឺមុនសេចក្តីសម្រេច របស់រដ្ឋាបាលរាជធានីភ្នំពេញដែលបានកំណត់គិតពីម៉ោង គិតចាប់ពីម៉ោងសូន្យ នាថ្ងៃទី១០ រហូតដល់ថ្ងៃទី២៣ ខែមិថុនា ឆ្នាំ២០២១ ។ ទោះបីជាយ៉ាងណា កម្មករមួយចំនួនដែលស្នាក់នៅក្នុងតំបន់បិទខ្ទប់ហើយ ធ្វើការនៅរោងចក្រក្រៅតំបន់និងមួយចំនួនទៀតដែលជាកម្មករ រោងចក្រ QMI បាននាំគ្នា រត់ចេញមិនតិចជាង៥០ភាគរយនោះទេ ៕
ចែករំលែកព័តមាននេះ