ខេត្តកណ្តាល ៖ ក្រុមចោរជិះរថយន្តដើរប្លន់ម៉ូតូពីពលរដ្ឋធ្វើដំណើរតាមដងផ្លូវបានជាច្រើនលើកនៅស្រុកមុខកំពូល ត្រូវអស់លក្ខរបស់សមត្ថកិច្ចហើយ ដែលហេតុការណ៌បង្ក្រាបនេះធ្វើឡើងនៅថ្ងៃទី០៨ ខែមិថុនា ឆ្នាំ២០២១ វេលាម៉ោង០៣និង០០នាទីទៀបភ្លឺ ស្ថិតចំណុចលើផ្លូវជាតិលេខ៦ មុខឡឥដ្ឋរបស់ឈ្មោះព្រាប កុយ ស្ថិតក្នុងភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្ដាល។
ជនសង្ស័យខាងលើ មានចំនួន០៤នាក់ (ស្រី០១នាក់) ទី១-ឈ្មោះ ផុន សុផានិត ភេទប្រុស អាយុ២៦ឆ្នាំ ជនជាតិខ្មែរ មុខរបរ មិនពិតប្រាកដមានទីលំនៅបច្ចុប្បន្នផ្ទះលេខ២៣ ផ្លូវជាតិលេខ១ ភូមិបោះអង្កាញ់ សង្កាត់ព្រែកឯង ខណ្ឌមានជ័យ រាជធានីភ្នំពេញ។ ទី២-ឈ្មោះ ស៊ឹង ណារ៉ាក់ ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្នផ្ទះលេខ១៧១ ផ្លូវបេតុង ភូមិចុងព្រែក សង្កាត់ព្រែកឯងខណ្ឌច្បារអំពៅ រាជធានីភ្នំពេញ។ ទី៣-ឈ្មោះ ទិត្យ បញ្ញាខារិន ភេទប្រុស អាយុ១៩ឆ្នាំ មុខរបរមិនពិតប្រាកដ មានទីលំនៅបច្ចុប្បន្នផ្ទះលេខ១៤៩ ផ្លូវលំ ភូមិបោះអង្កាញ់ សង្កាត់ព្រែកឯងខណ្ឌច្បារអំពៅ រាជធានីភ្នំពេញ និងទី៤-ឈ្មោះ ម៉ាលី រ៉យ៉ើ ភេទស្រី អាយុ២០ឆ្នាំជនជាតិខ្មែរអ៊ីស្លាម មុខរបរលក់អីវ៉ាន់តាមអនឡាញ មានទីលំនៅបច្ចុប្បន្ន ភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
លោកវរសេនីយ៍ឯក ឯក លន់ អធិការនគរបាលស្រុកមុខកំពូល ដែលបានដឹកនាំកម្លាំងអន្តរាគមន៍ស្រុក សហការជាមួយកម្លាំងប៉ុស្តិ៍នគរបាលរដ្ឋបាលទាំង០៧ ឃុំ និងកម្លាំងប្រជាការពារ ចេញល្បាតពួនស្ទាក់ និងបន្តការស្រាវជ្រាវ ក្នុងភូមិសាស្ត្រស្រុក ដើម្បីច្បាមចាប់មុខសញ្ញាជិះរថយន្តម៉ាកTOYOTA PRIUSដែល ធ្វើសកម្មភាពក្នុងករណីខាងលើ។ រហូតមកដល់ថ្ងៃទី០៨ ខែមិថុនា ឆ្នាំ២០២១វេលាម៉ោង០២និង៣០នាទី កម្លាំងយើងបានចេញល្បាតពួនស្ទាក់ រហូតដល់វេលាម៉ោង០៣និង០០នាទី ក៏បានឃើញរថយន្តនិងជនសង្ស័យខាងលើ ឈប់នៅចិញ្ចើមផ្លូវជាតិលេខ៦ ស្ថិតនៅភូមិឡឥដ្ឋ ឃុំព្រែកដំបង ស្រុកមុខកំពូល ខេត្តកណ្ដាល ។
ដោយមានការសង្ស័យ កម្លាំងល្បាតយើងក៏បានឈប់រថយន្តបម្រុងចុះសួរនាំ ត្រួតពិនិត្យ ភ្លាមនោះជនសង្ស័យ ក៏បាននាំគ្នា បើករថយន្តរត់គេចតាមបណ្ដោយផ្លូវជាតិលេខ៦ ពេលមកដល់ចំណុចតារាងបាល់នំបញ្ចុករបស់ឈ្មោះ យឹម ប៊ុនលាង ស្ថិតនៅភូមិលើ ឃុំព្រែកអញ្ចាញ ស្រុកមុខកំពូល ខេត្តកណ្ដាល ជនសង្ស័យក៏បានទម្លាក់ដាវចោលនៅទីនោះ ហើយកម្លាំងយើងក៏បានដេញពីក្រោយ រហូតមកដល់ចំណុចមុខឡឥដ្ឋរបស់ឈ្មោះ ព្រាប កុយ ស្ថិតនៅភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្ដាល ក៏ត្រូវកម្លាំងយើងមួយក្រុមទៀត ស្ទាក់ចាប់បានរថយន្តនោះជាប់ ហើយក៏បាននាំជនសង្ស័យ នឹងរថយន្តខាងលើ មកធ្វើការសួរនាំនៅអធិការដ្ឋាននគរបាលស្រុក ។
នៅវេលាម៉ោង០៤និង០០នាទីទាបភ្លឺ ប្រជាពលរដ្ឋឈ្មោះ ខន សុផល ភេទស្រី អាយុ៥៤ឆ្នាំ បានជិះម៉ូតូទៅទិញបន្លែនិងត្រីសាច់នៅផ្សារព្រែកអញ្ចាញ ហើយក៏រើសបានដាវនោះ រហូតដល់វេលាម៉ោង១០និង០០នាទីព្រឹក ឈ្មោះ ខន សុផល ក៏បានយកដាវខាងលើមកប្រគល់ឱ្យសមត្ថកិច្ចយើង។
នៅចំពោះមុខសមត្ថកិច្ច ជនសង្ស័យទាំង០៤នាក់បានឆ្លើយសារភាពថា នៅយប់ថ្ងៃទី០៨ ខែមិថុនា ឆ្នាំ២០២១ ក្រុមខ្លួនបានមកឈប់រថយន្តខាងលើ រៀបចំធ្វើសកម្មភាពប្លន់យកម៉ូតូនៅតាមបណ្ដោយផ្លូវជាតិលេខ៦ តែមិនទាន់បានធ្វើសកម្មភាពក៏ត្រូវសមត្ថកិច្ចឃាត់បាន ។
ហើយកន្លងមក ក្រុមខ្លួនធ្លាប់មកធ្វើសកម្មភាពក្នុងស្រុកមុខកំពូលតាមបណ្ដោយផ្លូវជាតិលេខ៦ ចំនួន០៣លើកបានសម្រេចចំនួន០១លើក គឺប្លន់ម៉ូតូពីជនរងគ្រោះឈ្មោះយ៉ុន۔សុផានិត កាលពីថ្ងៃទី២៥ ខែឧសភា ឆ្នាំ២០២១វេលាម៉ោង០៥និង១០នាទីទាបភ្លឺ ចំណុច ភូមិក្រង់ស្វាយ ឃុំស្វាយអំពារ ស្រុកមុខកំពូល ខេត្តកណ្ដាល បានម៉ូតូម៉ាកហុងដាC125 ពណ៌ខ្មៅ ស៊េរីឆ្នាំ២០២០ ចំនួន០១គ្រឿង ក្រោយពីយកម៉ូតូបាន ក៏យកទៅលក់ឲ្យឈ្មោះទី នៅម្ដុំឃ្លាំងរំសេវរាជធានីភ្នំពេញ ក្នុងមួយគ្រឿងបានតម្លៃ៦០០$។ បច្ចុប្បន្នជនសង្ស័យទាំង០៤នាក់ត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលស្រុកមុខកំពូល។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ