ខេត្តត្បូងឃ្មុំ ៖ ស្របពេលដែលវត្តបុព្វសុវណ្ណារាមដារ ហៅវត្តដារ ស្ថិតនៅឃុំដារ ស្រុកមេមត់ កំពុងតែមានការខ្វះខាតបច្ច័យសម្រាប់កសាងសមិទ្ធផលនានាក្នុងទីអារាម នោះក៏ត្រូវបានអង្គកឋិនទានមួយផ្តួចផ្តើមដោយអ្នកស្រី ខាន់ ចាន្នី ព្រមទាំងកូនៗបានដង្ហែរចូលនាព្រឹកថ្ងៃទី១៥ វិច្ឆិកា ២១៥ រួមជាមួយជាមួយនិងពុទ្ធបរិស័ទចំណុះជើងវត្ត បាននាំបច្ច័យចំនួនជាង៤២លានរៀល ដើម្បីរួមចំណែកក្នុងវិស័យព្រះពុទ្ធសាសនាឲ្យកាន់តែមានភាពរីកចម្រើនតទៅមុខទៀត ។
ព្រះតេជគុណ ជាន ប៊ុនធឿន ចៅអធិការវត្តដារ មានសង្ឃដីកាឲ្យដឹងថា ជារៀងរាល់ឆ្នាំតែងតែមានពុទ្ធបរិស័ទចំណុះជើងវត្ត រួមទាំងអ្នកនៅទីជិតទីឆ្ងាយបានរៀបចំបុណ្យកឋិនទានដង្ហែមកកាន់វត្តដារ ដែលកំពុងតែជួបនូវកង្វះខាតបច្ច័យសម្រាប់កសាងនូវសមិទ្ធផលនានាក្នុងទីអារាមនេះ ។
ព្រះតេជគុណ ជាន ប៊ុនធឿន មានសង្ឃដីកាបន្តឲ្យដឹងទៀតថា សម្រាប់នៅព្រឹកថ្ងៃទី១៥ វិច្ឆិកានេះ អ្នកស្រី ខាន់ ចាន្នី, លោក ស្រ៊ុន ធី, លោក ស្រ៊ី លាភ, លោកស្រី ស្រ៊ុន ស្រីស ព្រមទាំងបុត្រាបុត្រីនៅភូមិដារផ្សារ ឃុំដារ ស្រុកមេមត់ បានរៀបចំអង្គកឋិនទានមួយដោយមានភាពអធិកអធមដង្ហែចូលមកកាន់វត្តរបស់ព្រះអង្គ ។ សម្រាប់បច្ច័យដែលប្រមូលបានសរុបគឺមានចំនួនជាង៤២លានរៀល ទាំងនេះបង្ហាញពីការយកចិត្តទុកដាក់ និងស្រលាញ់នូវព្រះពុទ្ធសាសនារបស់លោកស្រី ចាន្នី ព្រមទាំងកូនៗ។ ចំពោះបច្ច័យទាំងនេះត្រូវបានប្រគល់ជូនដល់គណៈកម្មការវត្តគ្រប់គ្រង ដើម្បីយកទៅកសាងសាលាពុទ្ធិកបឋមសិក្សា ដែលស្ថិតនៅក្បែរច្រកចូលក្នុងវត្ត ។
សព្វថ្ងៃនេះមានព្រះសង្ឃចំនួន៣៥អង្គនិមន្តមកពីតាមបណ្តាវត្តនានា ក្នុងនោះមានដូចជា ខេត្តកំពង់ចាម ត្បូងឃ្មុំ ស្រុកកងមាស ព្រមទាំងបណ្តាវត្តផ្សេងៗទៀតជាច្រើនកំពុងតែគង់នៅរៀនព្រះធម៌ ។
ព្រះតេជគុណ ជាន ប៊ុនធឿន បញ្ជាក់ថា នាពេលកន្លងមកអ្នកស្រី ខាន់ ចន្នី ព្រមទាំងកូនៗបានចូលរួមបុណ្យកឋិនទានជាមួយនឹងពុទ្ធបរិស័ទផ្សេងទៀតជាច្រើននាក់ បានដង្ហែមកវត្តដារសំរាប់នៅឆ្នាំ២០១៥នេះបានរៀបចំកឋិនទានកាន់តែមានភាពអធិកអធមឡើងតែម្តង រួមជាមួយកូនៗដែលបង្ហាញពីទឹកចិត្តកាន់តែមានសទ្ធាជ្រះថ្លាចំពោះព្រះពុទ្ធសាសនា ដែលពលរដ្ឋកម្ពុជាប្រមាណ៩០ភាគរយកំពុងតែគោរពប្រតិបត្តិព្រះពុទ្ធសាសនា ។ ព្រះអង្គមានជំនឿមុតមាំថា នៅឆ្នាំក្រោយៗទៀតមានអង្គកឋិនទានដង្ហែមកពីកន្លែងផ្សេងទៀតមកកាន់វត្តដារ ហើយព្រះអង្គនឹងប្រឹងប្រែងខិតខំកៀងគរបច្ច័យដើម្បីមកកសាងសមិទ្ធផលក្នុងទីអារាមសំដៅឲ្យមានការរីកចម្រើនឡើងៗ ៕
ចែករំលែកព័តមាននេះ