ព្រឹកថ្ងៃទី១៣ ខែវិច្ឆិកា នៅសាលប្រជុំសាលាខេត្ត មានបើកកិច្ចប្រជុំ ពិភាក្សាដោះស្រាយជាមួយម្ចាស់អាជីវកម្ម មានជាអាទិ៍ដូចជា ម្ចាស់សណ្ឋាគារ ម្ចាស់ផ្ទះសំណាក់ កាស៊ីណូ និងល្បែងភ្នាល់តាមអនឡាញ ក្រោមអធិបតីភាពលោកនាយឧត្តមសេនីយ៍ ឯម សំអាន
ខេត្តព្រះសីហនុ ៖ ព្រឹកថ្ងៃទី១៣ ខែវិច្ឆិកា នៅសាលប្រជុំសាលាខេត្ត មានបើកកិច្ចប្រជុំ ពិភាក្សាដោះស្រាយជាមួយម្ចាស់អាជីវកម្ម មានជាអាទិ៍ដូចជា ម្ចាស់សណ្ឋាគារ ម្ចាស់ផ្ទះសំណាក់ កាស៊ីណូ និងល្បែងភ្នាល់តាមអនឡាញ ក្រោមអធិបតីភាពលោកនាយឧត្តមសេនីយ៍ ឯម សំអាន រដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មការចម្រុះគ្រប់គ្រងអាជីវកម្ម និងលោក យន្ត មីន អភិបាលខេត្ត ។
កិច្ចប្រជុំ មានការចូលរួមពីតំណាងក្រសួងសេដ្ឋកិច្ចនិងហិរញ្ញវត្ថុ ប្រធានមន្ទីរទេសចរណ៍ មន្ទីរការងារ ស្នងការនគរបាលខេត្ត កងរាជអាវុធហត្ថខេត្ត និងតំណាងម្ចាស់អាជីវកម្ម ។
លោកនាយឧត្តមសេនីយ៍ ឯម សំអាន បានមានប្រសាសន៍ថា កិច្ចប្រជុំនាពេលនេះគឺដើម្បីផ្លាស់ប្តូរនិងពិភាក្សារកដំណោះស្រាយល្អៗក្នុងការគ្រប់គ្រងអាជីវកម្ម សណ្ឋាគារ ផ្ទះសំណាក់ កាស៊ីណូ និងល្បែងតាមប្រព័ន្ធអនឡាញ នៅក្នុងខេត្តព្រះសីហនុ ដែលជាមូលដ្ឋានគ្រឹះក្នុងការចូលរួមចំណែកកសាងអភិវឌ្ឍន៍នៅក្នុងខេត្តដោយវិនិយោគិន ។ ជាពិសេស អ្នកវិនិយោគជនជាតិចិន ដែលបានមកធ្វើវិនិយោគនៅខេត្តព្រះសីហនុ ក៏ដូចជាការមកធ្វើការវិនិយោគនៅតាមបណ្តាខេត្តនានានៅក្នុងព្រះរាជាណាចក្រកម្ពុជា ឱ្យកាន់តែមានចំនួនកើនឡើងបន្ថែមទៀត ។
លោកនាយឧត្តមសេនីយ៍ បន្តថា ប៉ុន្មានថ្ងៃចុងក្រោយនេះ មានជនជាតិចិនបានចាកចេញពីទឹកដីខេត្តព្រះសីហនុជាបន្តបន្ទាប់ គឺក្រោយពីមានការចាប់បញ្ជូនជនជាតិចិនចំនួន១៦៨នាក់ កាលពីថ្ងៃទី២៣ តុលា កន្លងមកទៅប្រទេសចិនវិញ ធ្វើឱ្យមានការប៉ះពាល់ដល់ជនជាតិបរទេស ដែលមកធ្វើការវិនិយោគនៅលើប្រព័ន្ធអនឡាញ និងធ្វើឱ្យមានការភ្ញាក់ផ្អើលដល់វិនិយោគិន ។ ដូច្នេះយើងជួបជុំគ្នានាពេលនេះ ដើម្បីស្វែងរកដំណោះស្រាយ និងរកវិធានការសមរម្យណាមួយ ដើម្បីជាការកែសម្រួលដល់អ្នកវិនិយោគឯកជន ក្នុងការចូលមកវិនិយោគ និងការចូលរួមចំណែកអភិវឌ្ឍន៍ខេត្តព្រះសីហនុ ឱ្យមានការរីកចម្រើនបន្តទៀត ។
លោក យន្ត មីន អភិបាលខេត្ត មានប្រសាសន៍ថា អាជ្ញាធរខេត្តនឹងចូលរួមពិគ្រោះយោបល់ជាមួយ ម្ចាស់កាស៊ីណូ សណ្ឋាគារ ផ្ទះសំណាក់ និងអាជីវករប្រកបមុខរបរតាមប្រព័ន្ធអនឡាញទាំងអស់ ដែលមកធ្វើការបណ្តាក់ទុនរកស៊ីក្នុងខេត្តព្រះសីហនុ ដែលរាជរដ្ឋាភិបាលកម្ពុជាបានអនុញ្ញាតចេញអាជ្ញាប័ណ្ណ ដើម្បីរួមគ្នាដោះស្រាយក្នុងការចូលមកធ្វើការវិនិយោគតាមផ្នែកជំនាញនីមួយៗ ឱ្យទទួលបានជោគជ័យទាំងអស់គ្នា ទាំងផ្នែកឯកជន និងអាជ្ញាធរ ដើម្បីចូលរួមចំណែកអភិវឌ្ឍន៍ប្រទេសជាតិ ពិសេសការអភិវឌ្ឍខេត្តព្រះសីហនុ ។
លោកអភិបាលខេត្តថ្លែងទៀតថា លោកនឹងបន្តការគាំទ្ររាល់វិនិយោគិន ដែលមានច្បាប់អនុញ្ញាតពីរាជរដ្ឋាភិបាល ហើយលោកអំពាវនាវដល់វិនិយោគិននៅក្នុងខេត្តទាំងអស់ សូមគោរពទៅតាមច្បាប់អនុញ្ញាតរបស់រាជរដ្ឋាភិបាល ចៀសវាងការប្រព្រឹត្តល្មើសច្បាប់ ហើយស្វែងរកវប្បធម៌អន្តរាគមន៍ ដោយអាងអ្នកមានលុយ និងមានអំណាចនៅខាងក្រោយខ្នង ដែលបង្កបញ្ហាប្រាសចាកទៅនឹងផ្លូវច្បាប់ ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត មានប្រសាសន៍ថា នៅក្នុងខេត្តព្រះសីហនុ មានកាស៊ីណូសរុបចំនួន១៦កន្លែង ក្នុងនោះមានច្បាប់អនុញ្ញាតចំនួន១៣កន្លែង និងមិនមានច្បាប់ចំនួន៣កន្លែង ។ ទីតាំងកាស៊ីណូទាំងនោះ មាននៅក្នុងសង្កាត់លេខ២ចំនួន១កន្លែង សង្កាត់លេខ៣ចំនួន៨កន្លែង និងសង្កាត់លេខ៤ចំនួន៧កន្លែង ។
កាលនៅក្នុងអំឡុងឆ្នាំ២០១០ នៅខេត្តព្រះសីហនុ មានកាស៊ីណូតែ៦កន្លែងទេ ប៉ុន្តែដោយសាររាជរដ្ឋាភិបាលកម្ពុជាមិនឱ្យបើកកាស៊ីណូនៅភ្នំពេញ ទើបកាស៊ីណូបានមកពង្រីកទីតាំងធ្វើអាជីវកម្មនៅខេត្តព្រះសីហនុ មានចំនួនច្រើន ។ ប៉ុន្តែរាជរដ្ឋាភិបាលកម្ពុជា មិនអនុញ្ញាតឱ្យជនជាតិខ្មែរចូលលេងល្បែងនៅក្នុងកាស៊ីណូទាំងនោះទេ ៕
ចែករំលែកព័តមាននេះ